دسمبر پد ءَ اتکگ گوں وتی پشکپتگیں یاتاں- بالاچ بلوچ

نبشتانک: دسمبر پد ءَ اتکگ گوں وتی پشکپتگیں یاتاں

نبشتہ کار: بالاچ بلوچ

دی بلوچستان پوسٹ

شهید هلیم جان یک نہ تْرسیں سنگتے بوتگ ءُ وتی جنگی راهبندانی پاسدار بوتگ من ءَ یات اِنت شهید هلیم جان ءُ شهید گنی جان لھتے سنگت یک مکسدے ءَ رو اَنت گڑا مکسد ءَ چہ واتر بنت گڑا یک بندیگے هم آھاں گون بیت گڑا مکسد ءِ میان ءَ شهید گنی جان ءِ پاد مُڑ وارت ءُ هراب بیت ءُ درد بیت من لوگ ءَ نِشتگ اِت آں سنگتے اتک کہ ترا گنی لوٹ اِیت من شُت آں شهید گنی جان ءِ گْور ءَهاں! تو پہ ھیری من ءَ لوٹ اِتگ؟ هو منی پاد شر نہ اِنت تو چو کن اے گاڑی ءَ بہ زیر ءُ برو سنگت پلاں جاگہ ءَ نِشتگ اَنت سنگتاں سوار کن کہ سنگتاں روگی اِنت جاگھے-

گڑا من گاڑی زرت ءُ شُت آں سنگتانی نیمگ ءَ سنگت ڈیک دات اَنت سلام ءُ دْروت بوتیں بازیں سنگتے نشتگ اَت سنگت سوار بوت اَنت گڑا یک سنگتے ءَ گْوشت مارا پلاں جاگہ ءَ روگی اِنت من گْوشت من جاگہ ءَ نہ زاناں گڑا یک سنگتے ءَ گْوشت من سینکل سر ءَ پیسر باں تو منی رند ءَ آیان کن ما روان کت داں وتی منزل ءَ سر بوت اِیں سنگت ایر کپت اَنت یک بندیگے هم گون اَت سنگتاں چیرگیج چیر گِپت ءُ بندیگ نادینت گاڑی کمو دگہ نیمگے بُرت چیر دات سنگتاں گز پْروشت پِر دات کہ گِندگ مہ بیت سنگتاں پُرانیگے جوڑ کت ءُ لوبیا هم تیار بیت گڑا سنگتاں شام کت گپ ءُ مسکرا باز بیت نی سنگتانی وپسگ ءِ موڑ اَت بلے هنچو مگسک باز اَت تو هچ وڑ ءَ وپت کت نہ کن ئے شهید هلیم ءَ یک بشانگے گون اَت آ سنگت ءَ گْوشت من ئِے دئے من گوشت من ئِے دئے گُش اِیت من شمارا کس ءَ ئِے نہ دے آں ما کہ همے کیدی گپتگ بلے همے ایشی ءِ توک ءَ وپس اِیت گڑا شهید ھلیم ءَ بشانگ جوڑ کت ءُ بندیگ ءَ گْوشت ئِے برو توک ءَ ئِے بہ وپس بندیگ شت وپت مارا تھاریں شپ ءَ مگسکاں وارتگ بندیگ هنچیں گُرگ دیگ ءَ اِنت یک سنگتے ءَ درّائینت کلام بہ گیپت ایشی ءَ بشانگ ءِ تہ ءَ جنگ ءَ اِنت واب ءَ هچ سما ئِے نیست تو گْوش ئے وتی لوگ ءَ وپتگ سنگتاں ٹهک دات هو ایشی ءَ کلام بہ گِپت مارا مگسکاں کشت-

شپ ءَ واب نیتک روچ بیت سنگتاں چاه جوڑ کت سنگتاں چاه ءُ بسکوٹ وارت بندیگ بلے اردو زبان ءِ مردمے اَت کساس روچ زُهر بیت بندیگ گْوش اِیت “مجهے نماز پڑھنا ہے” من نماز کن آں شهید هلیم ءَ سنگت گْوشت اَنت برو اِت آپ بیار اِت بدئے اِت ئِے بلّے نماز کنت لهتے سنگت ءَ اَڑی کت آپ سک دیر اِنت ما کجا آپ بیار اِیں ایشی ءِ واست ءَ گڑا شهید هلیم ءَ گْوشت آپ شمارا الم آرگ لوٹ اِیت شما اگاں نیار اِت من وت رواں کاراں اے مئے جنگی راهبندانی هلاپ اِنت یک بندیگے گپتگ آئی ءِ گوما گوں مردُم گِری ءَ پیش بیا زوراکی کنگی نہ اِنت گڑا لهتے سنگت شت آپ اِش آرت بندیگ ءَ دات اِش پہ ورگ جوڑ کنگ ءَ هم آپ اِش آرت گوں سنگتاں ورگ جوڑ کت وارت گپ، مزاک ءُ مسکرا بوت سنگتاں گْوشت اے بندیگ ءَ زوتاں بہ بر اِت دیم ءَ مارا شپ ءَ مگسکاں گنتر ازاب کتگ وت بشانگ ءِ توک ءَ اِنت هچ پرواہ ئِے نیست شهید هیلم ءَ گوشت هو باندا بران ئِے سنگتاں بُرز ء‍َ لوٹ اِتگ شپ بیت ورگ وارت شهید هلیم یک دردے ءَ هم برے برے گپتگ گڈا سک بے وار ئِے کتگ شپ ءَ بزاں شهید ھلیم ءَ همے درد گپت من بِھ نہ دیستگ کہ شهید هلیم ءَ اے درد گرگ ءَ من هیران بوت آں سک بے وار اِنت هاکانی تہ ءَ لیٹ ورگ اِنت هنچیں دردے بوتگ سک بے وار ئِے کتگ ما چیزے سنگت ءَ گپتگ داشتگ دارگ نہ بوتگ من گْوشت بریں ترا بر اِیں ڈاکٹر ءَ اڑی کت ئِے گْوش اِیت من نیا آں گوں من گْوشت تئی درد ءَ ترا سک بے وار کتگ منی دیم ءَ همے گپ جت ئِے اے درد پہ ماتیں وتن ءِ راه ءَ هچ نہ اَنت مستریں درد منی دل ءِ تہ ءَ اِنت کہ ماتیں زمین گلام اِنت باریں کدی آجو بیت هما روچ ءَ بلوچستان آجو بیت منی درستیں درد هلاس بنت۔ شهید ھلیم ءَ سرجمیں شپ پہ درد گْوازینت روچ بیت گڑا سنگتاں برز ءَ هال کت سنگتاں گْوشت بندیگ ءَ بیار اِت برز ءَ گڑا منی دگہ لهتے سنگت سنگتانی همراہ اَنت گڑا ما سنگت اجازت کت اَنت شُت اِیں سنگت هم در کپت اَنت-

وھد جُنزان اَت ھمے وڑ ءَ 22 دسمبر 2013 ءَ شھید ھلیم جان، شھید سالم جان ءُ شھید گنی جان پہ سرڈگار ءَ ندر بوت اَنت-
دسمبر تو کہ وهدے کا ئے بازیں یاد گوں وت کار ئے گوں……!!!

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔