بلوچستان: شال، پنجگور ءُ مند ءَ پنچ بیگواھیں مردم یلہ کنگ بیتگ اَنت

دی بلوچستان پوسٹ

سر بیتگیں ھالانی رد ءَ ھشت ستمبر دوھزار ءُ ھژدہ ءَ امین آباد چاغی ءَ پاکستانی پوج ءُ چیریں ادارھانی دست ءَ آوار جنگ بیتگیں عبدالرؤف ء عبدالرزاق ھڈ جیل ءَ دیم ءَ آرگ بیتگ –

آئی ءِ برات سلام سابر ءَ ٹوئٹر ءَ یک ٹویٹے ءَ گوشتگ کہ منی برات گوستگیں شپ ءَ شال ھڈ جیل ءَ پولیس ءِ دست ءَ دیگ بیتگ ءُ اے وھد ءَ پولیس ءِ زندان ءَ بندیگ اِنت –

زانگ بہ بیت گوستگیں روچ ءَ وائس فار بلوچ مسنگ پرسنز ءَ سَے مردمانی یلہ بیگ ءِ ھال ھم راست کرتگ اَنت –

وائس فار بلوچ مسنگ پرسنز ءِ رد ءَ گوستگیں روچاں یلہ بیتگیں مردمانی پجار دوستمبر دوھزار ءُ نوزدہ ءَ بیگواھیں عدیل مراد، مند ءَ پنچ ماہ ءَ پیار بیگواہ بیتگیں مسلم ء نظر ءُ نصیر ء پیر مھمد ھم یلہ کنگ بیتگ اَنت –

ھمے وڑ ءَ وائس فار بلوچ مسنگ پرسنز ءَ ٹوئٹر ءَ شنگ کرتگیں دگہ یک ٹویٹے ءَ دگہ یک بیگواھیں مردمے ءِ ھال راست کرتگ –

وائس فار بلوچ مسنگ پرسنز ءِ رد ءَ بیست ءُ شش نومبر دوھزار ءُ ھژدہ ءَ پروم پنجگور ءَ بیگواہ بیتگیں مجیب بلوچ ء رسول بکش گوستگیں روچاں یلہ بیتگ ءُ وتی لوگ ءَ سر بیتگ –