بلوچستان ءَ اکتوبر ءِ ماہ ءَ دگ ءِ وئیلاں یک سد ءُ بیست ءُ ھپت مردم بیران بوتگ ، وھدیکہ یک ھزار ءُ سَے سد ءُ ھشتاد ھشت مردم ٹپی بوتگ اَنت –

دی بلوچستان پوسٹ

بلوچستان ءَ ماہ ءِ اکتوبر ءَ یک ھزار ءُ بیست پنچ دگ ءِ وئیل دیم ءَ اتکگ – دگ ءِ وئیلانی آسر ءَ یک سد ءُ بیست ءُ ھپت مردم بیران بوتگ ءُ یک ھزار ءُ سَے سد ءُ ھشتاد ھشت مردم ٹپی بوتگ –
بلوچستان یوتھ اینڈ سول سوسائٹی ءِ نیمگ ءَ چہ سال دوھزار بیست ءِ ماہ اکتوبر ءَ بلوچستان ءِ شھدگانی سر ءَ دیم ءَ اتکگیں وئیلانی کَچ ءُ کِساس شنگ کُتگ اَنت –

رپورٹ ءِ رِد ءَ شال، مستونگ، پشین، قلات، بوستان ءُ کچلاک ءَ دو سد ءُ پنجاہ ءُ دو وئیل دیم ءَ اتکگ اَنت ، اے وئیلاں سَے سد ءُ پنجاہ مردم ٹپی بوتگ اَنت ءُ سِی ءُ ھشت مردم بیران بوتگ اَنت – ءُ بلوچستان ءِ دمگ ھزدار، سوراب، لسبیلہ، گڈانی، ھب، وندر ءُ اُتھل ءَ چارسد ءُ شست ءُ پنچ وئیل دیم ءَ اتکگ اَنت چرے وئیلانی سوب ءَ پنچ سد ءُ نود ءُ سَے مردم ٹپی بوتگ اَنت ءُ چِل ءُ دو مردم مرگ ءِ آماچ بوتگ اَنت ءُ وھدیکہ چمن، قلعہ عبداللہ، مسلم باغ، قلعہ سیف اللہ ءُ گلستان ءَ شست ءُ نُھ وئیلاں نود ءُ نُھ مردم ٹپی بوتگ ءُ ھپت مردم بیران بوتگ اَنت –

رپورٹ ءِ تہ ءَ دومی دمگانی درگت ءَ گوشگ بوتگ کہ بلوچستان ءِ دمگ ژوب، زیارت، ھرنائی، لورلائی ءُ دکی ءَ یک سد ءُ دہ وئیلاں دہ مردم بیران ءُ یک سد ءُ بیست ءُ نُھ مردم ٹپی بوتگ ءُ نوشکی، ھاران، دالبندین، چاگی، بیسیمہ، نوکنڈی ءَ سِی ءُ ھپت دگ ءِ وئیلاں چار مردم بیران ءُ شست ءُ یک مردم ٹپی بوتگ –

ھمے وڑ رپورٹ ءِ تہ ءَ دیمتر ءَ گوشگ بوتگ کہ بلوچستان ءِ دمگ گوادر، تربت، اورماڑہ، پسنی، پنجگور ءُ کیچ ءَ سی ءُ سَے دگ ءِ وئیلاں چار مردم بیران بوتگ ءُ چِل ءُ نُھ مردم ٹپی بوتگ اَنت – وھدیکہ سبی ، بولان، نصیرآباد، ڈیرہ مراد جمالی، بارکھان، سھبت پور، ڈیرہ بگٹی، جھل مگسی، اوستہ محمد، جعفرآباد، سوئی ءُ کوھلو ءَ پنجاہ ءُ نُھ دگ ءِ وئیلاں چہ بیست ءُ دو مردم بیران بوتگ ءُ یک سد ءُ ھپت مردم ٹپی بوتگ اَنت –

گڈی ءَ رپورٹ ءِ تہ ءَ گوشگ بوتگ کہ اے دگ ءِ وئیلاں بیران بوتگیں مردمانی تہ ءَ پانزدہ کسان سالیں زھگ ءُ سیزدہ زالبول ھم ھوار اَنت –