نیکشھر ءَ دگ ءِ وئیلے ءَ شش مردم بیران

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ نیکشھر ءُ چھبار ءِ دگ ءَ یک گاڑی ءِ چپ بیگ ءِ سوب ءَ شش مردم بیران بیتگ اَنت –

اھوالکار ءِ رد ءَ وئیل مروچی بیتگ کہ یک گاڑی نیکشھر ءَ دراتکگ دیم پہ چھبار ءَ روگ ءَ بیتگ کہ میانی دمگ نیکوجھان ءَ کلٹی بیتگ چریشی ءَ گاڑی ءَ سواریں شش مردم بیران بیتگ اَنت –

دگ ءِ پھازوکیں پولیس ءَ ھال سربیگ ءَ پد پولیس ءَ وت ءَ وئیل جاہ ءَ رسینتگ ءُ بیران بیتگیں مردم چست ءُ کرتگ ءُ نیکشھر ءَ مھمد رسوللہ نادراہ جاہ ءَ برگ بیتگ اَنت –

پولیس ءِ گوشگ اِنت مھلوک کانود ءِ ایر رھبندانی مانیارگ ءِ سوب ءَ چوشیں پدردیں وئیل دیم ءَ آیگ ءَ اَنت –

پولیس بنشون ءَ رسانکدراں گوں گپ کنان ءَ گوشتگ کہ ھمک وھد ءَ چوشیں وئیل بیگ ءَ اَنت بلے اشانی گیشتریں سوب مردمانی بے دلگوشی ءَ بیگ ءَ اَنت –

آئی ءَ گوشت کہ مردم سرکار ءِ ایرکرتگیں کانوداں بہ منّ اَنت ءُ وتی جان ءُ ساہ ءِ رکینگ ءَ دلگوش بہ بنت –

ھمے وڑ ءَ گوستگیں روچ ءَ سراوان ءَ ھپتاد مِیل دور ھاش ءِ دگ ءَ گاڑیانی ٹکری بیتگ کہ چریشی ءَ دو مردم بیران بیتگ اَنت –

بیران بیتگیں مردم دزاپ ءَ برگ بیتگ اَنت کہ اشانی تہ ءَ دو کس بیران ءُ دو زدگ بیتگ اَنت –