اورماڑہ ءَ پانزدہ ءَ گیش پوجی کارندہ کُشتگ اَنت – براس

دی بلوچستان پوسٹ

بلوچ آجوئی لوٹوکیں سلاہ بندین گلانی ھمسنتیں گل بلوچ راجی آجوئی سنگر (براس) ءِ جارکش بلوچ ھان ءَ ناشناسیں جاھے ءَ یک درشانے شنگ کنان ءَ اورماڑہ ءَ بیتگیں اُرش ءِ زمہ واری منّ اِتگ ءُ گوشتگ کہ مروچی براس ءِ سرمچاراں اورماڑہ ءَ بزی ءِ کنڈگ ءَ بلوچستان ءَ تیل ءُ گیس ءِ شوھاز کنوکیں کمپنی اوجی ڈی سی ایل ءِ کاروان ءُ آئی ءِ پھزگی پوجی کارمندانی سر ءَ اُرش کرتگ ءُ سرجم ءَ تباہ کرتگ اَنت – اے اُرش ءِ زمہ واری ءَ بلوچ راجی آجوئی سنگر منّ اِیت –
جارکش ءَ دیمتر ءَ گوشت کہ بلوچ سرمچاراِ ھما وھد ءَ اُرش کرتگ کہ لُٹ ءُ پُلیں کمپنی او جی ڈی سی ایل ءِ کارندھانی کاروان فرنٹیئر ءِ ۱۲۸ ءُ ۱۳۳ ونگ چہ گوادر ءَ کراچی ءَ سرکنگ ءَ بیتگ – اے اُرش ءَ یک پوجی کمانے ءَ ھوار پانزدہ ءَ گیش پوجی کارمند کشتگ ءُ زدگ کرتگ اَنت –

بلوچ ھان ءَ گوشت کہ پاکستانی پوج ءُ فرنٹیئر کور ءِ وڑیں کہ آئی ءِ نیم پوجی باسک ھما جاہ ءَ بلوچستان ءَ تچکی ءَ پوجی کشی کنگ ءُ زورگری ءُ نسل کُشیاں دزمانجن اِنت، ھمود ءَ او جی ڈی سی ایل ءِ وڑیں لُٹ ءُ پل کنوکیں کمپنی بلوچستان ءِ مڈیاں پوج ءِ چیردستی ءَ لُٹگ ءُ برگ ءِ کاراں ساہ زورگ ءُ ھما کاراں سرجم کنگ ءَ اَنت ، کہ چریشی ءِ سوب ءَ بلوچ سرڈگار زورگر کنگ بیتگ –

بلوچ راجی آجوئی سنگر او جی ڈی سی ایل ءَ ھوار زورگر ءِ دراھیں لَٹ ءُ پُل کنوکیں کمپنیاں بیھار دے آں آ دراھیں شوربندی ءَ بند بہ کن اَنت، ما چین ءَ ھوار ھوار دراھیں درملکی زرکاراں کلوہ ءَ دئیں کہ بلوچستان ءَ باور ءَ کرتگیں کول کہ زوگر ءَ گون کنگ بیتگ اَنت اے کول ءُ کراراں بلوچ راج نہ منّ اِیت، آئی ءَ ھچ بستار نیست – ما یک رندے پد ءَ بلوچ راجی زوراں یکجاہ کن ایں ءُ یک راجی لشکرے ءِ بنپد ءِ زانت ءِ ساھگ ءَ سرجم کنگ ءُ راجی آجوئی ءَ داں جنگ ءَ برجاہ دار اِنت –

زانگ بہ بیت گوستگیں سال ءِ اپریل ءَ اورماڑہ ءَ ھم سلاہ بندیں مردماں بس ءَ سواریں پاکستانی نیوی ءُ کوسٹ کارڈ ءِ چاردہ کارندی ایرگپتگ ءُ کُشتگ اِت اَنت – کہ اشانی زمہ واری ھم براس ءَ منّ اِتگ اِت اَنت –

بلوچ راجی آجوئی سنگر (براس) ءِ بنھِشت نومبر دوھزار ءُ ھژدہ ءَ دیم ءَ اتکگ – براس چار سلاہ بندیں بلوچ آجوئی لوٹوکیں گل بلوچ لبریشن آرمی (بی ایل اے) بلوچستان لبریشن فرنٹ (بی ایل ایف) بلوچ ریپبلکن آرمی (بی آر اے) بلوچ ریپبلکن گارڈز (بی آر جی) ھوار اَنت وھدےکہ گوستگیں سال ءِ جولائی ءَ سندھ ءِ آجوئی لوٹوکیں سلاہ بندیں گل سندھودیش روولیوشنری آرمی (ایس آر اے) ءَ ھم براس ءِ گون ءَ ھمسنتی ءِ جار جنگ ءِ ھال شنگ کرتگ اَت –

بلوچ راجی آجوئی سنگر ءِ ھمسنتی جار ءِ جنگ ءَ یک ماھے ءَ پد گل ءِ نیمگ ءَ تربت ءِ دمگ تگران ءَ پاکستانی پوج ءِ کاروان نشانگ کرتگ اَت کہ چریشی ءَ دو کماناں ھوار دَہ کارندہ مرتگ اَت ءُ بازینے زدگ بیتگ اَت –

گوستگیں سال ءِ فروری ءَ بلوچ راجی آجوئی سنگر ءِ نیمگ ءَ یک اُرشے ءَ کیچ ءِ دمگ دشت ءَ پاکستانی پوج ءِ یک بنجلے گپتگ اَت کہ اود ءَ پوجی کارندھانی کُشگ ءَ پد بنجل مانداشتگ اَت –

بلوچ راجی آجوئی سنگر ءِ نیمگ ءَ ھمے سال ءَ آپریشن آسریچ ءِ جار پِرینتگ اَت کہ چریشی ءَ گل ءِ گیشتریں نگاہ پاکستانی پوج ءِ جوڑ کرتگیں ڈیتھ اسکواڈ ءِ نشانگ کنگ ءِ بیمے داتگ اَت –

بلوچ راجی آجوئی سنگر (براس) پاکستان ءَ ناشریں گلے گوشتگ، گوستگءں سال ءَ پاکستان ءِ تھی کارانی وزیر ءِ کارگس ءِ نیمگ ءَ پنتاک جار ءِ دروشم ءَ گل ءِ سر ءَ بندش جتگ –