ازمکار ھنیپ ءُ بلوچستان- اکیل مراد

نبشتانک: ازمکار ھنیپ ءُ بلوچستان

نبشتہ کار: اکیل مراد

دی بلوچستان پوسٹ

اے زند ءُ ازم ءِ درنگازگ ءَ مردمانی رژنائیں باندات ءِ ھاتر ءَ وتی جند ءُ سرانی ندر کنگ ءَ بلوچستان ءِ لوگ لوگ ءَ ترا ھنچیں سر دزکپ اِیت کہ آیاں بلوچ ءِ گُلزمین ءُ آیاں باندات ءِ ھاتر ءَ وت ءَ ندر ءُ کولیگ کرتگ –

مروچی مجاں گپتگیں زمین ءِ ھونانی گباراں زمین ءِ ھمک گدان تلان کرتگ ءُ روان اِنت ھمک گس ءُ گِداناں اے تھلیں تام چاشینان اِنت –

ڈیھے ءِ تہ ءَ زورامند ءُ بالا دستی ءِ واھند مدام زیردست ءُ لگتمالیں راجانی مڈی ءُ زمین ءِ برگ ءِ ھوار ھواری ءَ آئی ءِ ھمک کارست ءِ پروشگ ءُ پُلگ ءَ وتی کساساں کساس وتی زور ءِ زورامندی ءَ جَن اَنت تانکہ آئی ءِ دیم ءِ مھکمیں دیوال بہ پُروش ایت ءُ بہ کپ ایت –

دنیا ءَ ھزاراں زیردست ءُ زیردستیں راج راجدپترانی تہ ءَ دزکپ اَنت کہ آ راجانی کارست ءُ ازمکار ھم بلوچانی وڑ ءَ ڈلگ ءُ کُشگ بیتگ اَنت –

یک زورامندے تئی ھلاس کنگ ءُ گار کنگ ءِ دُمب ءَ بہ بیت گڑا آئی ءِ لوٹ بنداتی ءَ ھمے بیت کہ آئی ءِ شر شریں سراں ھلاس کنان کنت ءُ پشکپتگین نابود ءُ بے سنچ وت ھمائی ءِ پادانی چیر ءَ کپ اَنت ءُ آئی ءِ ھرچ لوٹ ءِ پد ءَ آئی ءِ دست ءُ پاداں چُک اَنت –

بلے گپ کیت پاکستان ءِ رس ایت گڑا پاکستان ءَ وتی زوراکی ءِ شان برز کرتگ ءُ ھمک چاگرد ھونین کرتگ اَنت ھمک چاگرد ءِ تہ ءَ بہ چار آئی ءِ ازمکاراں کُشگ ءَ اَنت سَوَب باز بنت کہ ڈیھی زورامند ازمکار ءِ ازم ءَ اوپار کرت نہ کنت یا ازمکار ءِ چاگرد ءَ گھینگ ءُ ھونی کنگ ءِ ھاتر ءَ آئی ءِ ازم ءَ کُشگ ءُ نیزور کنگ لوٹ اِیت –

پاکستانی سرکار ءُ زوراکانی گپ مردماں اجکہ کن اَنت کہ کُشوک کیت ھما مردم ءَ پجار کنت ءُ ٹِک ءُ نشان چِنت ءُ آئی ءَ گوڈلیں تیرانی سر ءَ دْروش اِیت ءُ پد ءَ مردم گْوش اَنت “ نامعلوم افراد نے فائرنگ کرکے دو یا تین فنکاروں کو قتل کردیا گیا یا نیوز صحافی اپنی مہنگی ترین واسکٹ کو ہلاتے ہوئے کہنے پر مجبور ہوجاتے ہوئے فلاں جگہ کو نامعلوم افراد نے فائرنگ کرکے ایک شخص کو ہلاک کردیا ”
ھَنچش ما دیست کہ سال دوھزار ءُ یازدہ ءَ ھیبرپکتونواہ ءَ ازمکار درویش ھان تیرانی آماچ کنگ ءُ کُشگ بیتگ اَت ھمیشی ءَ یک روچے پیسر ھمے ھال ءُ ھون دراج کش بیت لاھور ءَ تلو ءِ سر ءَ کار کنوکیں کسمت بیگ ءَ ھم ناشناسیں مردمانی تیرانی آماچ کنگ ءُ کُشگ بوت –

وھد وتی ھونی ئیں چاگرد ءَ ھچبر دل ءَ نہ کنت ھروھد ءَ آئی ءَ سرشان کنت ھمے رنگ ءَ ما پد ءَ دیست سال دوھزار ءُ دوازدہ ءَ ھَنچُش ھمے رنگ ءَ ھیبرپکتونواہ ءَ ازمکار ءُ گشندہ غزالہ جاوید ناشناسیں مردمانی تیرانی آماچ کنگ ءُ کُشگ بوت –

بلے پُشتی ءَ سرکار کھول ءِ مردماں سُرین اِیت کہ مرد ءَ کُشتگ ءُ مرد ءِ نام ءَ ارزی ءُ گرزی بہ کن اِت سرکار وَ ھمیشی ءَ لوٹ ایت کہ دو ٹک برباد ءُ تباہ بہ بیت ءُ مردم منی دُز ءُ ڈنگیں اَدالت ءُ کارگسانی دپ ءَ لونجان بہ بنت –

ما پد ءَ سال دوھزار ءُ چاردہ ءَ دیست پشاور ءِ ھند فقر کلے ءَ پد ءَ ھمے ناشناس ءُ ناپجاریں پرپٹ ءَ سواریں پوجی ءِ چوکی ءِ دیم ءَ گوزوکیں توپک ءَ پشتو زبان ءِ گشندہ وزیر ھان آفریدی ءِ ڈڈریں دلبند تیراں سُمب سُمب کُت ءُ کُشت –

ھمک چاگرد ءِ ھونی ئیں تاک گندگ ءَ کاینت ما دیست سال دوھزار ءُ یازدہ ءَ فلسطین ءِ اُستان مغربی کنار ءِ شھر جنین ءَ تلو ءِ سر ءَ کار کنوکیں نامی ئیں ازمکار جولیانو خمیس ءِ دلبند ھم تیراں سُمبان کت ءُ ازمکار ءِ چراگ ءَ تیلانکے دات –

پد ءَ ھمے جاہ ءَ اجکہ کنت تیرگواری ھما وھد ءَ پیش اتکگ خمیس میاربندانی بنجل ءَ “الحریہ تھیٹر ” ڈن ءَ روگ ءَ بیتگ ناشناساں تیرباران کرتگ ءُ کُشتگ –

پد ءَ العربیہ ءَ ٹی وی ءَ رپورٹے شنگ اَت کہ پولیس ءَ دمگ سرجم ءَ انگیر ءَ کرتگ ءُ خمیس ءِ کوشکارانی دزگیری ءَ پَٹ ءُ پول کنگ ءَ اِنت “اے گپ پد ءَ من ءَ اجکہ کنت کہ کُشوک ءَ توپک بڈ ءَ اِنت ءُ پیداک اِنت تیرانی توار ءَ پد سرجمیں مھلوک گُڑ اِیت ءُ نِی سما کن اَنت کہ پلانی تیرانی آماچ کنگ بیت –

اے ھمے زوتاں شال سریاب دگ ءَ چکی شاھوانی ءَ یک ھنچیں ازمکارے کُشگ بیتگ اَت کہ آئی ءِ نام گلام مھمد پنام ءِ تبسم اَت یکیں لوگ ءِ تہ ءَ وتی چار جنک ءُ بچکانی ھمراھی ءَ نندوک بیتگ آئی ءَ ڈیھ ءَ ھوار دوازدہ زباناں وتی ازم ءِ ساچست پیش کرتگ بازیں آروسی، دیوان ءُ ھمک جاہ ءَ آئی ءَ وتی ازم ءِ پدراھی کرتگ –

پد ءَ گلام مھمد ءِ کوش اجکہ کنت لوگ ءَ اتکگیں مھماناں تہ ءَ یک کسان اُمرے ورنایے ءَ کارچ جتگ ءُ کُشتگ –

پد ءَ ھمے زوت ءَ ما دیست کہ تربت ءَ بلوچ ازمکار ءُ اھوالکار، شائر ءُ تاکار شاھینہ شاھین چار گوھارانی تہ ءَ پنچمی گوھار اَت وتی لوگ ءِ تہ ءَ پہ وتی آدگہ گوھاراں پتے ءِ رنگ ءَ کارست اَت –

ما دیست کہ شاھینہ شاھین ءِ جون ماں سیول ھسپتال ءَ آرگ بیت ڈاکٹرانی دست ءَ دیگ بیت ءُ شاھینہ شاھین ءِ گوھاراں پریات کنان ءَ وتی گوھار ءِ کوش مرد ءِ نام ءَ ارزی ءِ نبشتگ کنائینت “پد ءَ ھمے گپ اے جاہ ءَ اجکہ کنت کہ کُشوک کجا شت؟ کُشوک ءَ چون کُشت، کشوک ءَ کُشگ ءَ رند کئی گور ءَ میار بندی زرت ” اے گپ ءَ ھرکس زانت ءُ سرپد بیت کہ کُشوک ءَ مھریں جاھے پہ وت ءَ پیسر ءَ دز گپتگ اَت –

نِی بیا سر ھنیپ ءِ نیمگ ءَ کمے دلگوش ءَ ترین اِیں باریں سر ھنیپ چونکا جنگ بیت، کازی ریھان وتی پیس بک وال ءَ پوسٹ کنت ءُ گوش ایت ھنیپ چمکروک زری جاوراں سکیں نیزوریں مردمے بیتگ بلے آئی ءِ آ ازم ءَ سکیں سیریں ءُ نامناکیں مردمے بیتگ –

پد ءَ کازی وتی گپ ءَ دیم ءَ بران کنت کہ ھنیپ چمروک کارستانی تہ ءَ یکے آئی ءِ جنک تیبا اِنت آئی ءَ ھمک زیردستیں مردمانی ءُ ڈیھ ءَ انسانی اُگبالانی لگتمالی ءِ سر ءَ توار چِست کنگ ءَ اِنت –

کازی ریھان: دیم ءَ وتی گپ ءَ بران کنت کہ ھنیپ چمکروک وتی نوک باھندیں نودربرانی ھیلکاری ءَ دزبندیں مردمے بیتگ ءُ آئی ءَ وتی ازم ءِ ساھگ پراہ ءُ شاھیگان کرتگ –

ھنیپ کے اِنت؟ ھنیپ کجا نشتگ؟ ھنیپ ءَ چی بیتگ؟ اے گپ مرچی آئی ءِ ازم ءَ ڈن ءَ کت کہ آ یک ھونی ئیں چاگردے ءِ تہ ءَ نندوک بیتگ ءُ آ وتی ازم ءَ شاھگان کنگ ءَ بیتگ “ بلے اے گپ پد ءَ اجکہ کنت تربت ءِ شھر ءِ تہ ءَ سنگانی سر ءَ ڈاکٹر مالک ءِ میتگ ءَ لھتے ھونواریں پرپٹ ءَ سوار ءُ توپک اش بڈ ءَ اِنت ءُ پیداک اَنت ءُ ھنیپ وتی لوگ ءِ کش ءَ سنگتانی ھمراھی ءَ نندوک بیتگ ءُ پرپٹ سواریں مردماں سبکی ءَ ابید ءِ تیرٹک چنگ ءَ ابید آ تیرانی آماچ کُتگ ءُ چار گوھارانی پِت چہ آیاں پُل اِتگ ” نِی پد ءَ ھمے جاہ ءَ مردم جیڑ اِیت کہ اے کُوشکار پولیس ءُ آرمی ءُ ایپ سی ءِ چوکیاں لگت دیان اَنت ءُ پیداک اَنت شھر ءِ تہ ءَ مردماں نشانگ کنگ ءُ پد ءَ واتر روگ –

نِی مارا اد ءَ گندگ ءَ ھمے تھنا کیت کہ بلوچ ءِ ازم ءَ بہ گر داں ھمک تک ءَ زوراک اوپار کنگ ءَ نہ اِنت بلکیں زوراک ءِ واھگ ھمیش اِنت کہ بلوچستان ءِ ھمک رژنائیں چراگ ءُ بیگواہ بہ بیت آئی ءِ کرد ھچ رنگ ءَ دیم ءَ اتک مہ کنت –

بلوچ ازمگری ءُ بلوچستان ءِ نندگ چَٹ گناھے جوڑ بیتگ ھرکس وتی شپ ءَ پہ ترس ءُ لرز گوازینگ ءَ اِنت –

چُوشیں گپ ءُ گال نیست کہ سر ھنیپ ءِ رنگیں مردمانی واستا ندر بہ کن آں بلے تھنا ھمے گوش آں سر ھنیپ کدی من ءَ باجہ سِکارین ئے؟ –

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔