تربت ءَ شاھینہ شاھین ءِ کوش ءِ بگیری ءَ شدھرتال، ھب ءَ زھرشانی

تربت ءَ شاھینہ شاھین ءِ کوش ءِ بگیری ءَ شدھرتال ءُ ھب ءَ زھرشانی کنگ بیتگ، شُد ھرتال ءُ زھرشانی ءَ بھر زیروکیں مردماں لوٹ کُتگ کہ شاھینہ شاھین ءِ کوشکار ءَ پاھو ءَ درنجگ بہ بیت۔

دی بلوچستان پوسٹ

سر بیتگیں ھالانی رد ءَ تربت ءَ بلوچ اھوالکار، بتکار، شائر شاھینہ شاھین ءِ کوش ءِ بگیری ءَ جسٹس فار شھید شاھینہ شاھین کمیٹی ءِ نیمگ ءَ شدھرتالی بنجل شھید فدا چار راہ ءَ جنگ بیتگ –

شد ھرتال ءَ نندوکیں مردمانی گوشگ اِنت کہ شاھینہ شاھین ءِ کشندہ دزگیر کنگ ءُ پاھو ءَ درنجگ بہ بیت –

شد ھرتال ءَ چاگردی باسک بھار ھاشم، گلزار دوست، امداد عثمان، اقرا ءُ شاھینہ شاھین ءِ گوھار ماسومہ ھوار اَنت –

شاھینہ شاھین ءِ گوھار ماسومہ ءِ گوشگ اِنت کہ پنچ ستمبر ءَ منی گوھار مپت ءِ گناہ ءَ کُشگ ءُ آئی ءِ لاش سیول ھسپتال ءَ سر کنگ بیتگ ءُ چریشی ءَ پد آئی ءِ کشندہ لوگ واجہ ءِ نام ءَ پولیس ءِ گور ءَ ارزی نبشتگ کنائینتگ بلے مروچی بازیں روچانی گوزگ ءَ پد ھم کشندہ دزگیر کنگ نہ بیتگ –

ھمے وڑ ءَ بلوچستان ءِ باپاری شھر ھب ءَ ھم شاھینہ شاھین ءِ کوش ءِ بگیری ءَ زھرشانی کنگ بیتگ –

زھرشانی ءَ لس مھلوک ءَ بھر زرتگ ءُ زھرشانی بھر زوروکیں مردماں شاھینہ ءِ کوش ءِ ھلاپ ءَ دز نبشتگیں اکس ءُ بینر دست ءَ بیتگ اَنت کہ آیانی سر ءَ شاھینہ ءِ کشندہ ءِ دزگیری ءِ درگت ءَ نبشتگ بیتگ –

زھرشانی ءِ مردماں گْوشت کہ شاھینہ شاھین پہ بلوچ چاگرد ءَ جوان ءُ زانتکاریں جنین آدم ءِ بیتگ کہ آئی ءَ وتی ازم ءَ چہ بلوچ دودمان سمبھینتگ ءُ چاگرد ءِ شری ءُ ھرابی پدر کرتگ اَنت –

زانگ بہ بیت کہ شاھینہ شاھین پنچ ستمبر ءَ کیچ ءَ وتی لوگ ءَ تیر جنگ ءُ کُشگ بیتگ ءُ آئی ءِ لاش سیول ھسپتال کیچ ءَ رسینگ بیتگ –

کوش ءَ پد آئی ءِ لوگ واجہ ءِ نام ءَ ارزی نبشتگ کنگ بیتگ کہ آئی ءِ لوگ واجہ ءَ آ کُشتگ ءُ ھسپتال ءَ رسینتگ –