نبشتانک: برمش مات ءَ لوٹگ ءَ اِنت
نبشتہ کار: سیپ بلوچ
دی بلوچستان پوسٹ
برمشُل گوں اکسے ءَ نشتگ مات ءَ لوٹگ ءَ اِنت بلے انگت نزانت کہ اکس ءِ سر ءَ چے نبشتہ ءَ اِنت،،،، اَنگت سَرپد نہ اِنت کہ مَنی مات کے ءَ شهید کُتگ بَس گوں همے نادانی ءَ نشتگ وتی مات ءَ لوٹگ ءَ اِنت کہ منی مات ءَ پہ من ءَ اِنساپ لوٹ ایت !، من همے کہ برمش ءَ گوں همے اکس ءَ گنداں چمانی ارس درکاینت کہ برمشُل اے انگت سرپد نہ اِنت کہ اے چے یے نبشتہ اِنت من ءَ گوں اِنت آکر کار منی مات کُج ءَ شُت ؟
منی مات ءِ گناه چے اَت کہ شهید اِش کُرت بس داں گمان پہ برمش ءَ روت همے کہ چم بند بنت همے گمان بیت کہ برمش گوں اکس ءَ نشتگ انگت واب نہ شتگ دل گوش ایت کہ کسهے بیاراں پہ برمشُل ءَ داں واب بہ کپ ایت،،
برمش ! من کسهے کاراں گْوشدار ئِے داں تو واب بہ کپ ئے بے ماتی اے دنیا ءَ سک گران اِنت ترا مدام مات ءَ وتی بگل ءَ کتگ واپینتگ برے شپانی پاسان پاد اتکگ ئے مات پاد آتکگ ترا شیر میچینتگ ئِے مرچی تئی مات ءَ هم اے کوڈهیں دنیا یل کرتگ زوراک ءِ اَرجان بوت، بیا کسہ ءَ کاراں گوشدار ئِے،
برمش منیچُک کسہ چو اے وڑ ءَ اِنت کہ یک بلاهیں جنگل ءُ دشت ءُ دیارے اَت انچیں دشت ءُ دیارے کہ اُود ءَ هرچ جاندار آزاد کم گُلام گیْش اِنت جنگل ءَ کاه ءُ کهچر ورگ وردن هرچیز هست جنگل هنچو مال دلْوت ءُ مڈی ءُ گران بهائیں چیز ءَ پُر ات بلے رسترانی دست ءَ اَت اود ءَ انسان هست اَت بلے دْرست گُنگ اِت اَنت چیزے کَّر اَت چیزے کُور ات چیز ءِ لنگ اَت بلئے اے جنگل ءُ دشت ءَ رستر سک باز اَت بلے مردم گْوش اَنت اے دشت ءُ دیار چہ بن ءَ چو نہ بوتگ اِد ءَ ساری ءَ انسان گْیش ءُ رستر کم بوتگ بلے نوں اِنسان کم ءُ رستر گیش اَنت پمیشکا انسان رسترانی ترس ءَ دْرست بے زبان بوتگ اَنت،
برمش منیچُک زان ئے اے دشت ءُ جنگل همے کور ءُ کّْریں مردمانی بوتگ انگت همایانی اِنت بلے اشانی زبان شتگ ءُ چیزے گُنگ ءُ کر بوتگ پمیشکا اے دشت ءُ دیار ءَ رستر اتکگ اَنت چوناها مردم گش اَنت اے جنگل ءُ دشت ءَ بُن ءَ چہ رستر نہ بوتگ همے کہ اِد ءِ مردماں وتی زبان گُنگ کتگ ءُ گُوش کَّر کتگ اَنت گڑا دری رستر اتکگ اَنے جنگل ءُ دشت درست وتی دست ءَ کتگ اِش اے گُنگ ءُ کَّر هچ گپ کت هم نہ کن اَنت هر روچ رستر همیشانی چُکاں کُش اَنت بندیگ کن اَنت گار ءُ بیگواه کن اَنت اے وَ گپ نہ کن اَنت
من همے کہ چم وهدے پچ کت اَنت برمش گوں اکس ءَ انگت نشتگ اَت مات ءَ لوٹگ اِنت …
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔