بلیدہ ءَ نشہ ءِ باپاری ءِ ھلاپ ءَ زھرشانی

بلیدہ ءَ نشہ ءِ باپاری ءِ ھلاپ ءَ زھرشانی

دی بلوچستان پوسٹ

بلیدہ ءَ نشہ ءِ باپاری ءِ ھلاپ ءَ انسداد منشیات کمیٹی ءِ نیمگ ءَ مروچی بلیدہ ءَ زھرشانی کنگ بیتگ –

دمگی مردمانی رد ءَ روانک بلیدہ بٹ ءَ چہ مروچی ساھت نُھ ءَ بندات بیتگ ءُ روانک میتگ ءِ جتائیں دمک ءُ دراں تران بیتگ ءُ بٹ ءِ چاراہ ءِ سر ءَ روانک ءَ یک مُچے ءِ دروشم ءَ جوڑ بیتگ ءُ مُچ بیتگ –

روانک ءَ لس چاگردی، نودربر، کسانیں زھگ کماش ءُ دگہ تکاں بندوکیں مھلوک ءَ بھر زرتگ –

مُچی ءَ انسداد منشیات کمیٹی ءِ باسکاں تران کنان ءَ گوشت کہ دمگ ءِ تہ ءَ مئے کمیٹی ءِ نیمگ ءَ اے اولی روانک اِنت ءُ ما نشہ باپاری کنوکاں گوشگ لوٹ ایں کہ آ وتی سلکاریاں زوت بند بہ کن اَنت اگاں ناں مئے اڑ داتگیں گل وتی گامگیجاں ترندتر کنت ءُ وتی زھرشانیانی درچاں گیش کنت-

آیاں گوشت کہ دمگ ءِ انتزامیہ نشہ باپاری کنوکانی ھلاپ ءَ ھچ گامگیج زورگ ءَ نہ اَنت چریشی ءَ چہ دمگ ءَ نوک رُستگیں ورناہ نشہ ءِ آماچ بیان اَنت ءُ آ چہ ھرچ چیز ءَ پُشت ءَ روان اَنت –

مُچی ءَ تران کنوکیں مردماں گْوشت کہ اگاں انتزامیہ ءَ چیرکائی بھا کنوکانی ھلاپ ءَ گامگیج نہ زرتگ گڑا ما انتزامیہ ءِ ھلاپ ءَ ھم ترندیں گامگیج زورگ ءَ چَک ءُ پد نہ بہ ایں-

آیاں گْوشت کہ بلیدہ ءِ دمگاں نشہ بھا کنوکیں مردمانی کُمک ءَ مزنیں مردمانی ءُ سرکار ءِ دسگ ھوار اَنت چریشی ءَ چہ نشہ بھا کنوک شیکر اَنت ءُ دمگ ءَ لس دکانانی پیم ءَ نشہ بھا کنگ ءَ اَنت –

مچی ءَ انسداد منشیات کمیٹی ءِ باسکاں تران کنان ءَ گوشت کہ دہ اگست ءَ بلیدہ میناز ءَ نشہ ءِ ھلاپ ءَ یک مُچی ءِ بیگ ءَ اِنت کہ لس مھلوک ءَ گوں دزبندی اِنت کہ مچی ءَ بھر بہ زور اَنت –

زانگ بہ بیت بلیدہ ءِ جتائیں دمگاں لس مھلوک ءِ نیمگ ءَ چِد ءُ پیسر ھم نشہ ءِ ھلاپ ءَ زھرشانی کنگ بیتگ اَنت بلے تنی وھدی دمگی واکدارانی ھچ گامگیج گندگ ءَ بیگ ءَ نہ اَنت –