نبشتانک: ماھو تئی ابیتکیں کاکا
نبشتہ کار: سلمان ھمل
دی بلوچستان پوسٹ
ماھو تو باز یات پیداک ئے مروچی کہ من نشتگ آں اے سھت ءَ سے شمبے ءِ روچ اِنت وھد سے چِلّ ءُ یک منٹ اِنت، کوٹی ءَ چہ ڈَنّ مُرگانی توار اِنت ءُ روڈ ءِ سر ءَ زاناں یک ءُ دو رکشہ گردگ ءَ اِنت پمیشکہ آیانی توار ھم گُوشاں درد دیگ ءَ اِنت، بازیں مُدتّے ءَ پد کہ رکشھانی توار گُوشاں کپگ ءَ اِنت پمیشکا گوش اے توار ءَ برداشت کُت نہ کنگ ءَ اَنت۔
شھر ءَ لاک ڈاؤن اِنت ءُ ھر کس وتی گِساں نشتگ کار ءُ روزگاراں بندش لگّ اِتگ نہ زاناں اود ءَ جاور چون اَنت ءُ چے ھال اِنت، شُمے ھال ھم گِرگ نہ بُوتگ نُوں پانزدہ بیست روچ بیت ، من زاناں منی گھار ءَ تئی ماس ، تئی ابا ، تئی ناکو ءَ را میسج کُتگ بلے منی نمبر بند اِنت ءُ میسج ھم سر بوگ ءَ نہ اَنت منی گھار پریشان اِنت کہ باریں من کُجا شُتگ آں ءُ ھال ھم کسّ نہ داتگ، بلے ھیر ماھو پد ءَ شُما سرپد بئے کہ من کجا شُتگ آں پرچا شُتگ آں چی ءَ شُتگ آں ھبر اے نہ اِنت کہ من باور نہ کُتگ ھبر اِش اِنت کہ جاور انچو بوتگ اَنت من اے کلنڈیں “فونانی” سر ءَ اُوست نہ کُتگ ءُ شمارا ھال نہ داتگ۔
ماھو بلے اے ساھت ءَ تو من ءَ بے کساس گیر پیداک ئے من ءَ سکّ زھیر کنگ ءَ اِنت پہ تو ، منی گیرانی تہ ءَ تو ھمیش اِنت چہ گِس ءِ دیوال ءَ دَر کپتگ ئے ءُ بیٹھک ءَ پیداک ئے چہ ھمود ءَ کوکار کنگ ءَ ئے کاکا توتک کاکا توتک، من ھم چہ بیٹھک ءَ دَر کپتگ آں تئی نیمگ ءَ پیداکاں نُوں ترا دست ءَ گِپتگ ءُ بیٹھک ءِ ساھگ ءَ نندگ ءَ ایں تو گُشگ ءَ ئے دُکان ءَ بہ رو اِیں من ترا گُشگ آں ماھو سائیکل کیت رواں دُکان ءَ۔
تو سکّ یات پیداک ئے من ھچ گُشت نہ کناں نہ زاناں چے بہ لِکّاں چوناھا تو باز یات اتکگ ئے بلے اے ساھت ءَ گیشتر یات پیداک ئے کہ ھرکس ءَ زھگے دست ءَ گِپتگ گوازی دارگ ءَ اِنت زھگ ءَ من ءَ تو یات پیداک ئے، منی اے کاگد ءَ انّوں تو ونت نہ کن ئے بلے مزن بوت ئے اے کاگد ءَ بُوان الم بوان ئے، شرّ وشیں “فی الحال” من ترا اجازت کناں پد ءَ چاراں کاگدے لِکّاں اگاں وھد رَس اِت پد ءَ دگہ کاگدے لِکّاں بلکیں ترا پہ وانگ ءَ سَر بہ بنت ۔
تئی کاکا نوتک
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔