کُمبیل ءَ پوج ءَ بیڑ برتگ ءُ زوراکی کنگ ءَ ھوار دو مردم ھم گوں وت برتگ۔
دی بلوچستان پوسٹ
دمگی اھوالکارانی رِد ءَ گوستگیں روچ ءَ بلوچستان ءِ دمگ کیچ ءِ ھنکین دشت ءِ میتگ کُمبیل ءَ پاکستانی لشکر ءَ بیڑ برتگ ءُ گِس گِس ءَ پٹ ءُ پول بندات کتگ۔
اھوالانی رِدءَ پوجی کارمنداں زوراکی ءَ پد دو مردم نزیر ء یارمھمد ءُ نسیم ء ابداللہ جھمنند کُمبیل دشت بیگواہ کُتگ ءُ گوں وت برتگ اَنت۔
زانگ بہ بیت کہ پاکستانی پوج ءِ ھمک روچیگیں زوراکیانی سوبءَ دشت ءِ گیشتریں مردماں لڈ ءُ بار کتگ ھمے وڑءَ نزیر ء یارمھمد ھم سئے سال ءَ پیش لڈ اِتگ ءُ تربت ءَ شتگ ءُ دو ماہ بیت کہ پدا لڈاِتگ ءُ واتر کُمبیل ءَ اَتکگ کہ پاکستانی پوج ءَ دزگیر کُتگ ءُ بیگواہ کتگ۔
یات بہ بیت بلوچستان ءِ جتاھیں ھند ءُ دمگاں چہ بیگواہ بیتگیں مردمانی کھولانی نیمگءَ چہ اڈ داتگیں گل وائس فار بلوچ مسنگ پرسنزءِ ردءَ بلوچستان ءِ گیشتریں دمگانی ھمک روچی ھساب ءَ مردم گار ءُ بیگواہ کنگ بئیگ ءَ اَنت ءُ داں انگت چِل ھزار ءَ گیش مردین، جنین زھگ ءُ پیریں مردم بیگواھی ءِ آماچ بیتگ اَنت۔