نبشتانک: مُلّا جلدی واتر کن
نبشتہ کار: مجیب ولی
دی بلوچستان پوسٹ
مُلّا! من ترا گْوشتگ اَت کہ اے ملکءَ بلوچ بیگ مستریں گناہ اِنت۔ تو اول ءَ ایش اِنت کہ بلوچے ئے ءُ پد ءَ انسان۔تو ھر انسان ءِ درد مار اِت۔اے تو اِت ئے کہ گریب ءُ نیزگارانی کمک بندات کُت۔ ملّا ! اے تئی جھدانی برکت اِنت کہ مرچی لھتیں پہ نام ھم زندگ اِنت۔ ھمے مردم کہ کس ءَ پجّاہ نیاؤرتگ اَنت بلے مرچی تئی برکت ءَ چار مردم آیاں پجّاہ کار اِیت۔
مُلّا مرچی تھنا تو گار نہ ئے تئی ھواری ءَ ھما سجّھیں گریب ءُ نیزگار گار اَنت کہ آیانی چم ترا سک بوتگ اَنت۔تو پہ اے نیزگاراں سرجمیں دروازگ ٹُکّ اِت اَنت۔ ھر جاہ ءَ پہ آیانی کمک ءَ وت ءَ سر کُتگ اَت۔ تئی جھد ھچبر ادارھانی بندوک نہ اَت تئی جند ءَ وت یک ادارھے ءِ دْروشم زرتگ اَت۔ مرچی بلوچستان ءِ تہ ءَ ھرچ ادارھے کہ ھست آ تئی جھدانی مُزّ اِنت۔ تو پہ وتیگاں بلّے ھچ کُت نہ کُت بلے تو پہ لس مھلوک ءَ چہ ھدا ءَ کمتر ھم نہ ئے۔ تو چو اے دگراں ادارھانی نام ءِ سر ءَ سیاست نہ زانت ترا بس یک دردے گون اَت کہ گریب ءُ نیزگار الاج کنگ بہ بنت۔ پہ گریب ءُ نیزگارانی الاج ءَ تو ناں پُشت چار اِت ناں دیم۔ روچے یک نادْراھجاھے ءَ، روچے یک دگّے ءَ، روچے یک جاھے ءَ ویل اِت ئے۔پیزبوک ءَ تو سرجمیں راجے ٹوھینتگ اَت۔ ھما کہ چہ وتی نیزگاریں راج ءَ بے سما اِت اَنت آیانی چم تو پچ کُت اَنت۔ تو بلّے اوست یلہ داتگ اَت کہ تئی پاد ئِے بُوٹّے نہ اَت بلے مردمانی سرجمیں اوست گوں ترا بندوک اَت۔کراچی ءَ کہ ھر کس پہ الاج ءَ سر گیپت اولی جُست ئِے تئیگ اِنت۔ اولی ٹلپون ءَ تئی سر ءَ جنت کہ مُلّا تو کج ءَ ئے۔بیا مئے مردمے نادْراہ اِنت۔
مُلّا!
بازیں مردمے ترا وتگڑیں انسان دوست ستّار ایدی ءِ درور ءَ دنت بلے منی نزّ ءَ تئی بستار چہ ھزاراں کساس گیشتر اِنت۔ستّار ایدی ءِ مال ءُ مٹ مردمانی گُٹّگ بھا کنگ ءُ ادارہ ءِ چلائینگ بوتگ۔ تو مردمانی گُٹّگانی دْراہ کنگ ءَ زمین ءُ زمان یک کُتگ اَنت۔ مُلّا من ءَ یات اِنت کہ من ترا ھال کُتگ اَت کہ گوبرد ءِ نیزگاریں مردمے کراچی ءَ پلاں نادْراھجاہ ءَ اِنت کُمک لوٹ اِیت تو دمان ءَ آئی ءِ ڈسّ ءُ نشںان لوٹ اِت اَنت ءُ آئی ءِ ڈُبّہ وتی کوپگاں زُرت۔ مُلّا من ءَ اے ھم یات اِنت کہ تو گوبرد ءِ دگہ دو نیزگاریں مردم ابید زانگ ءُ پجّارگ ءَ الاج کُت اَنت۔ کمبھت من نہ زان آں چونیں دلے ترا گون اَت کہ تو پہ ھر بلوچ ءَ تلوسگ ءَ اِت ئے۔ سید ھاشمی ءَ زبان ءِ کچکول بڈّ ءَ اَت ءُ لوگ پہ لوگ اَت گال ئِے پٹّ اِت ءُ بلوچی ئِے ابدمان کُت۔ ترا مدام بلوچیں نیزگارانی الاج ءِ کچکول بڈّ ءَ اَت ناں پیزبوک اِشت ءُ ناں کہ وٹساپ ھرکسے چمّاں پچان اِت ئے ءُ لس مھلوک ءَ چہ نادْراھیاں رکّینگ ءَ اِت ئے۔ تئی ءُ سید ھاشمی ءِ تہ ءَ دگہ پرک نیست اَت۔ پرک تھنا ایش اَت کہ آئی ءَ زبان رکّینت ءُ تو نیزگاریں مھلوک۔ زبان ءِ رکّینگ ءَ آ ھم وتیگاں اوپار نہ بوت مھلوک ءِ رکّینگ ءَ ترا ھم وتیگاں اوپار نہ کُت۔ بلے شُمارا دوئیناں کسے ءِ زلورت نہ اَت پرچا کہ کار کنوکاں ادارھانی زلورت نہ بیت کار ءِ زلورت بیت آ وتی کار ءَ وڑے ناں وڑے دیم ءَ بر اَت۔
مُلّا! تئی گناہ تھنا ھمیش اَت کہ تو بلوچیں انسانے اِت ئے۔ پہ گریب ءُ نیزگاراں مُدام شپجاہ ءُ روچ جاہ اِت ئے۔ مرچی ھما دمک ابیتک اَنت کہ مدام شپ ءِ تریپ ءَ چہ نادْراھجاھاں واتر کُتگ ءُ آتکگ ئے وھدے کہ آ دمکاں ترا ژندی ءَ دیستگ الّم دل ءَ جیڑ اِتگ کہ ایشی ءَ چونیں دردے پِر کہ اے بے ایمنیں شھر ءَ اے مردم شپ ءِ تْریپ ءَ پرچا جھلاد اِنت۔ تئی دست گپتگیں نادْراہ مرچی الّم جیڑگ ءَ آں کہ مُلّا ءِ میار چے اَت کہ شپ ءِ تْریپ ءَ چہ لوگ ءَ بیگْواہ کنگ بوت؟
اے ملک ءَ پہ بلوچ ءَ درواریں مردم نہ اِشتگ۔ ھر کس کہ اے راج ءِ دردوار بیتگ آ انچوش گار ءُ بیگواہ کنگ بوتگ۔ ھر کسے ءِ بھت کہ شر بوتگ واتر بوتگ بے بھتانی جاگہ گورستان بوتگ۔ نہ زان آں تئی بھت چے کنت۔ بلے مُلّا گپّے زان ئے؟ نادْراھاں بے تو نہ بیت۔ ایشاں دگہ دردوار نیست۔ اے لاپ پرست ،جند پرست ءُ نام پرستانی جنگل ءَ اے نیزگاراں یل مہ کن کہ گار بنت۔ ایشاں دگہ دردوار نیست۔پہ ایشاں کس لوگ ءُ جاگہ نہ پَٹّ اِیت۔ پہ ایشاں کس ٹکٹ نہ کنت ءُ وتی لوگ ءَ سے سے ماہ ءَ جاگہ نہ دنت۔ مُلّا جان پہ ھمیشانیگی جلدی واتر کن۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت