کیچ ءَ ڈاکٹرانی نادلگوشی ءَ یک نادراھے بیران

سر بیتگیں ھالانی رد ءَ کیچ ءَ ڈاکٹرانی نادلگوشی ءَ یک نادراھے بیران بیتگ –

بیران بیتگیں نادراہ ءِ پجار ادھم جھمنند مونڈی گوادر ءِ نام ءَ زانگ بیتگ-

دمگی مردمانی رد ءَ ادھم ءَ پُپانی نادراھی بیتگ ءُ آ کیچ ھسپتال ءَ شتگ اود ءَ ڈاکٹراں گوشتگ کہ تئی پُپاں آپ زُرتگ –

آیاں گوشت کہ ڈاکٹراں ادھم نادراہ جاہ ءَ تھتیگ کرتگ ءُ آئی ءِ جاندراھی ءِ واستا سدکی کرتگ –

دمگی مردمانی رد ءَ ڈاکٹرانی نادلگوشی ءُ بے سریں سُچینانی جنگ ءَ ادھم ءَ گوستگیں روچ ءَ نادراہ جاہ ءَ وتی ساہ داتگ ءُ بیران بیتگ-

دمگی مردماں ڈاکٹراں بھتام جتگ ءُ گوشتگ کہ ادھم ءِ بیرانی ڈاکٹرانی نادلگوشی ءَ چَہ بیتگ کہ آیاں بے سریں سُچَن جتگ ءُ کُشتگ –

زانگ بہ بیت گوست ءَ ھم شال ءَ پنجگور ءِ جھمنندیں نادراھے ھنچش ڈاکٹرانی نادلگوشی ءَ چَہ بیران بیتگ اَت –

شال ءَ بیران بیتگیں نادراہ ءِ کھول ءَ ڈاکٹراں بھتام جتگ ءُ گوشتگ اَت مئے نادراہ ءِ گُٹک کَشگ بیتگ اَنت چریشی ءَ چَہ مئے نادراہ بیران بیتگ –