نبشتانک: مُھیم جان زَالمیں وھد ءَ مُوہ نہ دات ـ
نبشتہ کار: نیوٹن بلوچ
دی بلوچستان پوسٹ
زندگی ءِ تہ ءَ لھتیں انچیں مُھکمیں سنگت گندگ بیت چہ آوانی جدائی ءَ مردم سک تپرکہ ءُ تکانسری بیت، پرچا کہ آئی ءَ انچیں مِھرے مردم ءَ را داتگ اَت ،کہ آ مِھر ھچبر پراموش کنگ نہ بنت ءُ ھمائی ءِ مِھر کہ بَچکندگ،گپ دائم دیوانانی دلانی تہ ءَ ھست اَنت ءُ گیر کاینت ،دگہ گپّے ھم ھست ما وتی بد کَسمتی بُگشین ایں وَ رَد نہ اِنت ، ما مردماناں زند ءَ ھچ کدر نہ دے ایں ، من نہ زاناں اے مئے نا بزانتی اِنت یا بے مھری اِنت ، وھدیکہ سنگت شھید بنت گڑا ما رند ءَ نند ایں ءُ دلپدردی درشاں کن ایں بلے تا ھست ءُ زندگ انت اِناں ۔۔!!
شھید مُھیم جان اُرپ ءِ سَابر ء سوالی لوگ ءَ ودّی بیت، بنکی گریشگ ءِ جاہ منند اَت، آئی ءَ تاں پنچ تبک ءَ وانتگ اَت، تنگدستی ءُ گیریبی ءَ آ نیشت کہ گیش بہ وان ایت ءُ یکے اگاں وانگ بہ لوٹ ایت ءُ بے زّر بہ بیت آ ونت ھم نہ کنت۔۔!!
بیت کنت دومی استان ءَ جاور ھال انچو نگیگ کرتگ اَنت کہ بلوچ زھگ ءَ را پہ وانگ ءُ زانگ شوک پیداک مہ بیت ، چُنت نودربر پاکستان ءِ لشکر ءُ چیریں ادھارانی کارمنداں چست کتگ ءُ بیگواہ اَنت دگہ چینکس نودربر شھید کرتگ ءُ لھتیں کُنٹ بے وارس ءُ پجار نہ بوگ ءِ سوب ءَ کل ءُ کسارت کتگ اَنت بازیں کُنٹ ماں کوہ ءُ گیاباناں چگل داتگ اَنت۔۔۔!!ـ
مُھیم جان اُرپ سَابر وھدیکہ نگیگیں جاورانی سوب ءَ وانگ ءَ یل کنت گڑا زند ءِ ایندگہ روچانی تیلانک دیگ ءَ لاپ ءِ آس ءِ توسگ ءَ در پہ در بیت ءُ بنکی میتگ ءَ یلو کنت۔۔۔!
بلے!!
پاکستان ءِ لجوزیں لشکر ءَ مَھلوک انچو بے میار ءُ بے گناہ آوار جنت ءُ لَٹ ءُ کٹ کنت ءُ زدگ اِش کنت لھتیں ویل دنت ءُ لھتینانی جوناں ماں چنگل ءُ ویرانوں دور دنت ،ءُ شھید سابر جان ءَ مار اِت کہ ما چہ اے بے گِھاریں لشکر ءَ نہ ڈب اِتگیں ءُ مئے مات ءُ گُھار چہ اے لشکر ءَ ھم نہ رک انت ءُ بازینی ءِ آوار جنی چمان ئِے وت دیستگ اَت ءُ آئی ءَ وتی مات ءُ گھارانی اے ھال دیست راجی گلامی ءِ سما ئِے بوت ، ھمے جیڑ اِیت ئِے کہ سرڈگار مئے وتی اِنت ، دری راجاں ءُ پنجابیاں ءَ مئے سر ءَ پہ زور کبزہ کتگ ءُ می سر ءَ ھاکمی کنگ ءَ اَنت ،ھر روچ لَشکر کیت ءُ مئے مات ءُ گُھارانی سر ءِ گُشاناں دَور دنت مئے براتاں چست کنت ءُ گار ءُ بیگواہ کنت، من پہ وت ءَ راھے گچین کنگ ءِ شور کت ءُ گڑا من یک راجی لشکرے ءَ ھوار بیگ لوٹ اِیت۔۔۔ـ
گڑا آ بی ایل ایپ ءِ اوتاگ ءَ نوزدہ سارتان دو ھزار ھژدہ کیت ءُ سر بیت ، وھدیکہ من مھیم جان اُرپ سابر ءَ دیست سک ھبّکہ بوت آں، اے کسان سالیں ورناھےاَت ءُ وتی ماتیں گلزمین ءِ مھران انچو زُرتگ پہ گلزمین ءِ واستا وتی سر ءِ کُربان کنگ ءَ ساڑی اَت۔۔ـ
ھمے ساھتاں من مزّاک کُت ءُ گُوشت ورنا تو اے اُمر ءَ اھتگ ءِ جنگ کن ئے…..؟
تو وتی بالاد ءُ کد ءَ بچار ..؟
گُڑان مھیم جان بچکند اِت ءُ منی پسو ترئینت ءُ گوشت ئِے جنگ ءَ را گوں بالاد ءَ کار نیست ، من چار ایت تاں زھنی ھساب ءَ تیار اِنت اتکگ ،گُڑا بالاد ئِے چارگ نہ لوٹ ایت ، من ھمے سرپد بوت آں اے پہ شوک ءُ ناسرپدی نیتکگ پہ زانت اتکگ۔۔۔!! ـ
بلوچ راج وتی گلزمین ءِ رکینگ ءِ جنگ ءَ کنگ ءَ اَنت ءُ انچیں جنگے کنگ ءَ اَنت ھمے جنگ گوں بلوچ زندمان ءَ بندوک اِنت ،
شھید مھیم جان ءَ گوشت من ھمے راجی جنگ ءَ بھر بہ آں پرچا کہ مئے واستا دگہ راہ پشت نہ کپتگ ، مئے راہ ھمیش اِنت۔۔۔!!!
پرچا…… !!!
وتی وھد ءَ گوں دگہ کاراں بہ گوزین اَنت ،
مھیم جان اوتاگ ءَ اَت باز مھروانیں سنگتے اَت ھمینچو توسیپ ءَ بہ کن آں منی ھیال ءَ انگت کم اِنت ، من لھتیں انچیں سنگت ساری ءَ دیستگ اَت آوانی مِھر ھچبر پراموش کنگ نہ بنت۔۔۔!!!ـ
ما وھدے سَپرے ءَ دَرکپت ایں ، گڑا من “مھیم جان گوشت کہ” پُل جان ھوار ایں ۔۔۔!!
پد ءَ گندگ بئیں ،
پَسو ئِے دات ءُ گوشت ئِے اگاں وھد ءَ موہ دات،
من ھُدا ھاپز کُت سپر ءَ دَرکپت آں من نہ زانت کہ زندگی چو بے وپائی کنت ما دوبر یکے دومی ءَ پد ءَ نہ گند ایں، وھدیکہ آئی ءِ شھید بوگ ءِ ھال من اشکت ، من ءَ مھیم جان ءِ ھما گَپ یات ءَ اَتک کہ ، من گوشت ھوار اِیں گندگ بئیں گوشت ئِے انچو مارا وھد موہ بہ دنت ۔۔۔۔،
مھیم جان ءَ راست گوشت۔۔!!
زوراکیں وھد ءَ موہ نہ دات ءُ سابر جان ابدمان بوت۔۔۔!!ـ
مھیم جان تئی ھمت را ءَ ھزار سلام اِنت، گوں ڈیھ ءِ شھیداں ھور سھریں سلام ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت