شھید ھمید بلوچ پنّام ء شاہ زیب – سرباز وپاؔ

نبشتانک: شھید ھمید بلوچ پنّام ء شاہ زیب

نبشتہ کار : سرباز وپاؔ

دی بلوچستان پوسٹ

آشوبی جھدکار وت ءَ چہ زند ءِ کُلیں تماھاں کش اِیت ، گس ءُ جاگہ ، چُک ءُ اولاد ، ھند ءُ دمگ ، سیاد ءُ وارس ، زند ءِ ھمُک تماہ ءَ چہ وت ءَ گِستا کنت ، آئی ءِ پگر ءُ لیکہ ایوک ءَ راجی بنت ۔ آ وتی زند ءَ ھمُک وھد ءَ پہ راجی کارانی ھاتر ءَ کُربان کنت ۔ چوناھا بنی آدم ءَ وتی زند بے کساس دوست بیت ءُ وتی تماھانی ھاتر ءَ جھد کنت ، بلے آشوبی جھد کار وتی زند ءِ کلیں تماھاں ببا دنت ۔ آئی ءِ ھر واھگ گوں وتن ءُ راج ءِ دیمروی ءَ بندوک بیت ۔ آئی ءِ لوٹ ، مول ءُ مراد راج ءِ وشھالی ءُ آجوئی بیت ۔ ھمے وڑیں راجی بامرد راجدپترانی بھر بنت ۔ اَبدمان بنت ھما مردُم کہ وتی زند ءِ واھشتاں چہ در کاینت ءُ پہ راجانی وشھالی ءَ وتی تنگوئیں جان ءَ ندْر کن اَنت ۔ گڑا ھما مرد آشوبی جھد کار گْوشگ بنت ۔

چوناھا راجدپتر راستی ءَ نبیس ایت ءُ راستی ءَ پدّر کنت ۔ انچوش کہ پہ دینی نیکراھی ءِ ھاتر ءَ ھزرت ھسین ءِ نام گرگ بیت ، اُود ءَ یزید ءِ نام ھم گرگ بیت ۔ گوں ایران ءَ جنگ ءَ دادشاہ ءِ نام گرگ بیت ، گُڑا میر مھیم ھان ءِ نام گرگ بیت ۔ چہ اے گپ ءَ ھمے پدّر بیت راجدپتر راستی ءَ نبیسان کنت، شّر ءَ شّر گْوش اِیت ءُ شِر ءَ شِر گْوش اَیت جاگھے ڈاکٹر چی گویرا گْوش اِیت ، بہ مِر بلے وتی زمیر ءِ سودا ءَ ھچبر مہ کن ۔ پرچا کہ تئی سودا نہ اِنت اے پد ریچ ءِ سودا گْوشگ بیت ۔ ھر مردمے بہ بیت آئی ءَ وتی زندگی ءُ زند ءِ وشی بے کساس دوست بنت ۔ بلے راجدوست ءُ وتن زادگیں بچ وتی زند ءِ تماھاں پہ راجی آجوئی ءُ پدریچ ءِ وشھالیں باندات ءِ ھاتر ءَ کربان کن اَنت ءُ شرّیں کِردانی واھُند بنت ۔

اگاں ما اے دِگہ راجانی گْوستانک ءَ چاراں مارا شرّیں کِردانی واھُند گندگ ءَ کیت ۔ ڈاکٹر چی گویرا چیئرمین ماؤ ، ھوچی منہ ، کمال اتاترک ، نیلسن منڈیلا ، ءُ بازیں نام گندگ ءَ کیت ۔ بلے مئے بلوچ راجدپتر چہ راجی بامردانی کِسّھاں ھم ھالیگ نہ اِنت ۔ وھدے ما بلوچ ءِ گْوستانک ءَ چماں شانک دے اِیں ءُ چار اِیں شھید ھمید بلوچ ءِ کوھیں کردار مئے دیدگانی دیم ءَ مِک بیت ، وتن دوستی ءِ ھمت ءُ ھاٹیگے بکش اِیت ۔ شھید ھمید بلوچ ،( گورنمنٹ کالج تربت) ءِ کیچ شاھدربرجاہ ءِ نودربر بیت ۔ بی ایس او ءِ سنگتے بیت ۔ وھدے مسکت بلوچ ورناھانی پہ وتی پوج ءَ ( بھرتی ) زُورگ ءَ کیت ۔ بی ایس او ءِ سنگت پہ وتی راجی ورناھانی مسکت ءِ پوج ءِ زُورگ ءَ ھِلاپ ءَ جنگ کن اَنت ۔ پاکستان ءِ سپائی شھید ھمید بلوچ ءَ چہ مسکت ءِ پوجی کمان ءِ تیرگواری ءِ ( وارنٹ ) ارزی نامگ ءَ 9 ( ستمبر ) تومشان 1979 ءَ دستگیر کنت ءُ بندیگ کنت ۔

وھدے کہ شھید ھمید بلوچ ءِ پاھو دیگ ءِ جار جَنَگ بیت گُڑا 11 ( جون ) جلکان 1981 ءَ آ چہ وتی شھیدی ءَ یک ساھتے ءَ ساری ھمے نبشتہ کنت ۔ اے گپ ءَ من کمیں پشومان نیاں ، نہ من ءَ اے گپ ءِ ھیال ھست کہ من ءَ چہ مرگ ءَ گیش زندگ بُوَگی اِنت ۔ ھمے ھاتر ءَ زندگی بے مکسد بہ بیت ءُ گلامی ءِ تہ ءَ بہ گْوز اِیت گڑا آ یک لانتے ۔ شھید ھمید بلوچ پہ شانے پاھو ءِ ساد ءَ چُکّ اِیت ءُ گُٹ ءَ کنت ، پہ راج ءِ وشیں باندات ءَ شھید بیت ۔
انچوش کہ سید زھورشاہ ھاشمی گْوش اِیت “
ھونے کہ پہ ھکّ ءَ رِچ اِیت ھاک ءِ تہ ءَ بیگواہ نہ بیت

سی سال ءَ پد دگہ ھمید بلوچے پہ وتی وتن ءِ رکّینگ ءَ پاکستان ءِ ھلاپ ءَ جنگ کنت ۔ ایشی ءِ نام ھمید بلوچ پنّام ء شاہ زیب اِنت ۔ گریشگ بدْرنگ ءَ نور جان بلوچ ءِ گِس ءَ ودی بیت ۔ وھدے وتی چماں پچ کنت ءُ وتی راجی گلامی ءَ مار اِیت گڑا 2014 ءَ ( بی ایل ایف ) بلوچ راجی سنگر ءِ یک سپائیگے بیت وتی راجی جھد ءَ بنا کنت ۔ وھدے کہ من شھید شاہ زیب جان دیستگ اَت سکیں ھاموش ءُ بے تواریں سنگتے اَت۔ مدام آئی لنٹانی سر ءَ لھمیں بچکندے ھست اَت ءُ مھروانے اَت ۔ گوں وتی کاروان ءَ ایماندار اَت ، ھر کارے پہ ایمانداری کرت ۔ نہ ھشکیں گپ ءُ بٹاک ءِ جت نہ کسے ءَ را ایرجت ئِے ۔ بس اَنچو ھاموش ءُ بے توار اَت ھر کار ءَ پہ شانے پاد اتک ءُ کرت ئِے ۔

شھید شاہ زیب جان گوں نگیگیں جاوراں وتی راجی کارانی تہ ءَ اَت برے سورگَر ، برے مشکے ءُ گریشگ ءَ اَت وتی راجی کاراں کنگ ءَ اَت ۔ آئی اے زانت کہ منی ڈیھ ءِ جاور نگیگ اَنت ۔ بلے آئی مارشت ھمیش اَت شھیدانی کاروان من ءَ دیم ءَ برگی اِنت ۔ آئی ءِ گپ ھمیش اَت اے جاور ما وت آورتگاں مارا گوں اے نگیگیں جاوراں جنگ دیگ لوٹ اِیت ۔ وتی وتن دوستی ءُ راجدوستی ءِ ھک ادا کنگ لوٹ اِیت ۔ مئے پند ءِ کربانی بہ بیت یا مئے ساہ ءُ سرانی کربانی بہ بیت ، ما گوں وتی گلزمین ءُ شھیداں اھدے کرتگ مارا پہ مردی مرگی اِنت ۔ شھیدی مئے وتی لوٹ اِنت آ کدی کیت بئیت ۔

5 ( جولائی ) جَلکشان ءَ 2020 ءَ شاہ زیب جان گوں دگہ دو سنگت سابر بلوچ پنّام ء مھیم ، انور بلوچ پنّام ء جاوید ءَ ھوار شھید کنگ بیت وتی راجی زمہ واریاں پیلو کنت۔ راجی بامردانی رد ءَ ھوار بیت داں جھان ھست اَبدمان ءُ نمیران اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت