راجدوستیں ناکو ابراھیم ءِ پنت – ھدایت بلوچ

نبشتانک: راجدوستیں ناکو ابراھیم ءِ پنت

نبشتہ کار: ھدایت بلوچ

دی بلوچستان پوسٹ

راج دوست بزاں (قوم پرست) اے دو گال ءَ گوں بندوک اَنت۔
راج ، دوست ۔دگنیائِے سر ءَ زندگیں مردمانی یک گَلے کہ آھاں ءَ زمینے ءُ زبانے بہ بیت دود ءُ ربیدگ ءُ پجارے بہ بیت۔۔۔ گڑا آ یک راجے گُشگ بیت۔
ءُ ھمے راج ءِ تھا ھرچ ھما مردم کہ آئی ءَ وتی زمین ءِ وتی زبان ءِ وتی پجار ءِ وتی دود ءُ ربیدگ ءِ ھُب ءُ واھگ بہ بیت ءُ وتی زبان ءِ وتی زمین ءُ وتی پجار ءِ زندگ دارگ ءِ ھاتر ءَ ھر وڑیں اڑ ءُ جنجالانی دیما اوشتگ ءِ ھاٹیگ مان بہ بیت ۔ گڑا آ مردم یک راج دوستے گُشگ بیت۔
من ءَ شَر یات اِنت ھما روچ ، وھدے من چہ وتی بُنکی میتگ بزاں (دز پروم ءَ ) آدینگ ءِ روچ ءَ پیشیم ءِ نماز ونت آھت آں لوگ ءَ دپارے نان وارت دل ءَ گُشت برو کوچگ ءَ تر ءُ تابے ءَ ۔
پاد آھت آں سینکل ءَ کِکے جت سوار بوت آں لوگانی پُشت ءَ مانترِ اِت آں دیم دات پہ لِگُرک ءِ کوچگ ءَ ۔
وھدے من وتی میتگ ءِ نادراھجاہ ءِ نزدیک ءَ سر بوت آں داں یک کماشیں مردے دیم پہ ھمانگو رَوگ ءَ اِنت !
من شُت آں کماش ءِ نزدیک ءَ سینکل بریک کُت کماش
ءَ را سلامے دات ۔ سلام الیک ناکو ابراھیم تو وش ءُ جوڑ ئے ؟
ناکو ءَ دیم گردینت ۔ “والیک سلام منی چُک من وش آں ۔”
من جُست کت ۔ ناکو تو کجا بوتگ ئے ءُ کُجانگو روگ ءَ ئے ؟ گُشت ئے ۔ ” مرچی آھتگ آں سیاد ءُ وارسانی چارگ ءَ نوں وتی لوگ ءَ روگ آں لِگُرک ءَ۔”
من گُشت من اوں ھمانگو روگ ءَ آں ! سوار بو ترا بَران گوں ۔
ناکو ابراھیم سوار بوت ۔
من ءُ ناکو ابراھیم گپ جناں رواں اَت اِیں دیم پہ لِگُرگ ءَ ۔
گڑا من ءَ کماش ءَ جست کُت ۔
” منی چک تو وانگ ءَ ئے ؟”
من گُشت ۔ جی ھاں ناکو من اسکول ءَ نُھمی کلاس ءَ وانگ ءَ آں ۔
گشت ئِے ۔ ” شر کن ئے بوان کہ وانگ مردُم ءِ چماں پچ کنت ۔” بے وانگ ءَ انسان بزان ھیوانیں ، پَسے ۔ ھچّی نزانت دگنیا چی ءِ ۔”
اَنچو من ءَ سر ءُ سوج کنان اَت ۔۔
داں ما چہ کلات ءِ بازار ءَ رَد بوت اِیں ۔
من ءَ گشت ئِے ۔ “منی چک من ترا یک ھبرے گُشاں وتی زند ءَ اے گپ ءَ ھچ پراموش مہ بو ۔”
من سینکل ءِ ریس کمتر کُرت ءُ گُشت ۔ جی ناکو بُہ گش ۔
گشت ئِے ۔” اے دُگنیا ءِ تہ ءَ سے 3 کِسم ئے انسان ھست ۔ یکے ءَ گُش اَنت زَر پرِست ، دومی ءَ گُش اَنت شخصیت پرِست ، سیمی ءَ گُش اَنت کُوم پرست ۔بزان راج دوست ۔
زر پرستی سکّیں بَدیں ءُ بلاھیں بیماری یے ھرچ انسانے کہ زر پرست بوت گڑا آ مردم نا کہ وتئی براتانی کار ءَ کیت نا کہ وت ءَ را پّجاہ کار اِیت ۔ آ گُش اِیت بس زر بہ بیت ءُ بس ۔ آئی ءِ سوچ ھمے بیت ھرچی کنت زر ، کسے ءَ کہ زر نیست بزاں آئی ءَ ھچ نیست ۔
دومی شخصیت پرست ۔ اے اوں یک سِلیں بیماری یے شخصیت پرستی چہ بُت پرستی ءَ اوں گنتر اِنت ، بزان ھرچی واجہ گُش اِیت ھما وڑ اِنت اگاں واجہ رد اِنت بزان رد نہ اِنت کہ واجہ اِنت ۔ ھرچی کنت واجہ ، ھرچی گُش اِیت واجہ ،
اے وڑیں مردم مردمانی سجدہ کنوک گُشگ بنت ۔
سیمی کوم پرست ۔ راج دوست ۔
راج دوست وتی دُرستیں راج ءِ واستا جیڑ اِیت وتی زبان ءَ زندگ دار اِیت ءُ وتی دود ءُ ربیدگ ءَ گار بوگ ءَ نیل اِیت ۔ آئی ءِ پگر اَنچو مَزن بیت آ مردم ھچ کس ءَ واجہ واجہ نہ کنت ، نا کہ زر ءِ دُمب ءَ کپ اِیت ۔۔
منی چک کوشست بہ کن یک جوانیں راج دوستے جوڑ بو ۔
گڑا مردمانی دل ءَ تئی واستا اِزت بیت .”
ھمے گپانی تہ ءَ ما لِگُرگ سر بوت اِیں ۔
من ناکو ءِ لوگ ءِ کش ءَ اوشات آں ناکو ایر اَتک گُشت ئِے ۔ ” بیا رویں لوگ ءَ نندیں آپ ءُ چاھے وریں۔”
من گشت مھربانی ناکو جان تئی لوگ منی لوگ اِنت من انوں دیم پہ کوچگ ءَ روگ ءَ آں دگہ برے تئی چاہ ءَ وراں ۔
من ناکو رُکست کُت شتاں پہ کوچگ ءَ۔۔ناکو ءِ ھمے گُشتن منی دل ءِ سر ءَ نکش بوت اَنت !
مدام من ءَ جیڑگ اِش پرمات ۔
پدا لھتیں وھد ءَ رند کماش ءَ دگنیا یلہ دات ، بلے من ءَ تنے وھدی کماشءِ گپ یات اَنت۔۔۔۔اللہ تئی ارواہ ءَ آسودگ بہ کنات ۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت