نبشتانک: مئے چاگِرد ءُ جنک
نبشتہ کار : ھمیدہ بلوچ
دی بلوچستان پوسٹ
یک زاھگے ءُ آئی ءِ پِس ءُ ماس ءِ میان ءَ چے وڑیں مِھر ءُ دوستی بیت ؟ انچوش گْوش اَنت اِمرُوز ءِ توک ءَ پِس ءُ ماس ءِ مِھر پہ زھگ ءَ بے کچ ءُ کساس اِنت ۔ اِمرُوز ءِ تھ ءَ مستریں مِھر پہ زھگ ءَ اِنت پِس ءُ ماس ءَ را ھر چیز ءَ چَہ گیش زھگ دوست بیت پہ زھگ ءَ ماس ءُ پِس ءِ مِھر ھچ وڑیں گَٹّاں گَٹ نہ بیت وھدے کہ زھگ ودی بیت گُڑا سرجمیں کھول ءِ مردُم گَل ءُ شات ءُ شاتمان بنت ۔ ماس ءُ پِس ھمے اُمیت ءَ دار اَنت زھگ پم ءَ رُدیت راستیں کوپگے بیت بزاں ھر وڑیں سکیاں مارا ھمراہ بیت ۔
مئے چاگِرد ءَ جنکیں زھگ بیت ماس ھمے اُمیت ءَ دار اِیت زھگ مزن بیت منی گِس ءِ کاراں کنت ءُ منی بار ءَ ارزان کنت ۔
ھر چاگِرد ءِ وتی یک وڑ ءُ پیمے من اد ءَ وتی چاگِرد ءِ گپ ءَ کنگ ءَ آں ۔۔۔
مئے چاگِرد ءَ جنک ءَ را ھچ وڑیں ارزِشت نیست ءُ نہ دے اَنت ئِے ۔ بچک ءِ بلائیں بستارے بچک ءِ ودی بوگ ءَ ھم بلائیں وشی یے ودی بیت لوگ ءِ توک ءَ میتگے توک ءَ گوں ۔
جنک بزگ مُدام وتی دل ءَ جیڑ اِیت من شوم بوت آں جنکے بوت آں من بچکے بوتین آں من ءَ بلائیں بستارے بوتگ اَت ۔
دومی گپ ۔۔۔۔ ما جنک ءَ را سانگ ءُ آروس ءِ وھد ءَ ھچ بر جُست نہ کن اِیں انچو وتی دوستی ءَ گوں سانگ ءُ سور دے اَنت ئِے اے یک زنڈیں رَدی یے گُناھے کہ مئے چاگِرد کنگ ءَ اِنت جنک ءَ را باید اِنت ھک دیگ بہ بیت جنک ءَ را ھک ھست جنک ءَ را دل ھم ھست جنک ءَ را مِھر ھم لوٹ اِیت جنک ھم وتی دوستی ءَ لوٹ اِیت ۔۔۔
ما بچک ءَ را پہ سانگ ءُ سور ءَ جُست کن اِیں اگاں بچک رازی نہ بوت گُڑا سانگ ءُ سور نہ بیت گُڑا جنک ءَ گوں پرچا چُش بیت ؟ مئے چاگِرد بچک ءَ را ھر وڑیں آجوئی ءَ دَنت جنک ءَ را پرچا نہ دَنت؟ جنک زاناں مردُمے نہ اِنت جنک ءَرا پہ زور سور دے اَنت پد ءَ جنک گْوش اِیت من اے مرد ءَ نہ لوٹ آں من ءَ دوست نہ بیت پد ءَ چاگِرد جنک ءَ میاری کنت پلانی وتی مرد ءَ نہ زور اِیت مرد ئِے دوست نہ بیت تو کہ زان ئے دوست نہ بیت گُڑا پرچا ھما وھد ءَ بے جُست ءَ سانگ سور دے ئے ۔ پد جنک ءَ را مرد لٹ ءُ کُٹ کنت سزا دَنت ءُ پِس ءُ ماس ھم یا براس لٹ ءُ کُٹ کن اَنت ءُ سزا ئِے دے اَنت تو مئے نام میتگ ءِ تہ ءَ بدنام کتگ، اگاں شمارا وتی نام چو دوست اِنت گُڑا پرچا زوراکی کن اِت؟ پرچا دوست نہ بووکیں مرد ءَ جنک ءَ را دے اِت؟ پرچا جنک ءَ را جنک ءِ جند ءِ دوستی ءَ سانگ ءُ سور نہ دے اِت؟
اے مئے ءُ شُمئے دْرستانی سر ءَ پرز اِنت کہ اے وڑیں زوراکیانی سر ءَ گپ بہ کن ایں ءُ اے وڑیں زُوراکیاناں گوں تُرندی ءَ ایر بہ جَن اِیں ءُ وتی چاگِرد ءِ توک ءَ بدلی بیار اِیں وتی چاگِرد ءَ را چَہ کورچاتے ءَ دَر بہ کن اِیں شَریں مادنین راھے ءَ بہ بَر اِیں راہ ء راست ءَ پیش بدار اِیں ۔
ما اگاں ھمے جیڑھاں کسانیں جیڑہ سرپد بہ بیں ءُ ایشاں ڈالچار بہ کن اِیں گُڑا مئے چاگِرد روچ پہ روچ پدکنزان بیت ءُ دیم ءَ شُت نہ کنت ۔ اے جیڑہ سک بلائیں جیڑہ اَنت جیڑھانی بُن ءُ رُوتگ ھمیش اَنت چاگِرد تَنا وھدے دیمروی نہ کنت ما وتی ھمے نزوریاں چَہ روتگاں مہ سِند اِیں ۔
دگہ یک بلائیں مئے نزوری یے ایش اِنت ما زھگ ءَ ھر وھد ڈالچار کن اِیں مُدام ھمے گْوش اِیں تو زھگے ھچ ءَ سرپد نہ بَہ ئے ھمے رنگ ءَ زھگ ءِ مجگ نزور بیان بیت ءُ وت ءَ انچو سرپد بیت کہ من وَ ھچ نہ زان آں ۔ بلے زھگ چَہ کماشان گیش زات ءُ سرپد بیت گوں ھُورتی ءَ جیڑھاں زانگ ءِ جُھد ءَ کنت ۔
ھمے رنگ ءَ زالبول ءَ را ما انچوش گْوش اِیں تو ھچ ءَ سرپد نہ بَہ ئے۔
مئے چاگِرد ءَ ھزارانی اساب انچیں جیڑہ بوتگ اَنت جنکاں وتی دشتار یا وتی مرد دوست نہ بوتگ اَنت گڑا جنک کُشگ بیت اَنت لَٹّ ءُ کُٹ کنگ بوتگ اَنت وڑ وڑیں سزا دیگ بوتگ اَنت ۔ دوستی ءُ نا دوستی گوں دل ءَ اِنت کسے ءَ کہ کسے دوست نہ بیت نوں زورے پہ دوست بوت نہ کنت، دوستی چُشیں چیزے نہ اِنت کہ مردُم پہ زور دومی ءَ را بدنت ئِے ۔
منی جند ءِ میتگ ءَ انچیں جیڑھے بوتگ کہ پِسے ءَ وتی جنک پہ تَپر جَتگ ءُ کُشتگ، پہ مئے گپ ءَ کہ میتگ ءِ مردُمے ءَ دروگے بستگ کہ تئی جنک ءَ گْوشتگ من ءَ منی دشتار دوست نہ بیت ءُ من ئِے نہ زور آں، گڑا پِس گِس ءَ کیت ءَ بے جُست ءُ پُرس ءَ جنک ءَ جَنت ءُ کُش اِیت، پد ءَ سما ئِے بیت اے گپ دروگے ۔۔
اگاں اے گپ راستے بوتیں جنک ءَ بُہ گوشتیں من ءَ دشتار دوست نہ بیت من نہ زور آن ئِے اے ھک جنک ءَ را ھست اَت گڑا جنک ءَ را پہ زور چی ءَ دشتاری کُتگ؟
مئے چاگِرد ءَ بازیں پِس ءُ ماس ءُ براساں وت ءَ انچیں آس ءَ سُتکگ ءُ پُر کُتگ ، باید اِنت ما وتی جنکانی ھک ءَ بزان ایں ءُ آواناں انسان بہ لیک ایں پرچاکہ جنک ھم انسان اَنت ءُ جنکاناں ھم ھک ھست.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت