نبشتانک: درامدے
نبشتہ کار: ھدایت بلوچ
دی بلوچستان پوسٹ
کادوُ سکین زالمے……بلے هیر بی بی تو چی ءَ چوش کن ئے….؟
منی مات سُھبءَ مَهلہ پاد اهت . نماز ئِے ونت ءُ مارا ھم پاد ئِے کُت پادا اِت نماز اِنت.. ما پاد اهتیں نماز ونت پد ءَ وپتیں۔ بلے ماتءَ پس دُشت اَنت چاہ گراست تاں روچ در اهت… من سک واب اتاں …
گُشئے هبر هبر ءِ جاک ءُ کوکارے بوگءَ اَت… من پاد اهتاں چمانی لگاشگءَ لگتاں..اماں اووو اماں اے چونینان اَنت مارا پہ آرامءَ نیل انت… ؟
ماتءَ گشت اے همے هیر بی بی اِنت گوں وتی چالاکیں نشاراں …چے گشیت ءُ کے ءَ را گُشیت…. ؟من چو گنوکانی وڑ ءَ جُست کُت…
ماتءَ زهرءَ زهر گُشت کلام ئِے زانت هیر بی بیءَ ایشی مئے میتگءِ مردم تین ءُ دل کُرتگ اَنت.. دگہ هچ زهمے جت نہ کنت بس کوکارءِ هاٹیگ ئِے مان انت…
من گُشت زاناں چے بوتگ..؟ماتءَ گُشت اسلءَ گپ چُش انت کہ کادوُ داشتگ لھتین وروکیں کُچک کادوُ ءِ کُچکان بازار ءِ مردم ازاب کُرتگ اَنت… بیچارگیں ملک ناز همے کُچکاں وارت .کلثوم همے کُچکاں وارت.. دگہ چِینکس زالبولءِ گُشان همے کُچکاں تل داتگ… نازملک ءِ زهگ همے کُچاں وارت.. شپءَ مهلونکءِ گساں همے کُچک کاینت .. من همے کُچکاں شپاد کُرتگ۔۔ منی چمپل اِش برتگ انت۔۔ ابدالمجید ءِ پاد همے کُچکاں تل داتگ … بیچارگیں ابدالمجید دِگہ گُھے نہ وارتگ وتی زهگ ئِے راه داتگ اَنت بُرو اِت همے کادوُ ءِ کُچکاں لھتیں بجن ات کادوُءَ بگش اِت۔۔ چہ مئے میتگءَ درا برو… نوں هیر بی بی گوں نشاراں مارا کّر کُرتگ ابدالمجید پرچا چوش کنت.. همے گنوکیں هیر بی بی ءِ براس همے کُچکاں وارتگ۔۔ بلے نزاناں هیر بی بی چی ءَ گوما ءُ گوں واجہ ابدالمجید ءُ آئی ءِ مردُماں چو کینگے رودینتگ…..
من گشت ماتی هیر بی بی زاناں گنوک اِنت گوں بلاهیں سَرگءَ.. اشی کڈولگءَ را چے پُگ مان کہ چو کنت….؟
ماتءَ گُشت نزاناں اے هیر بی بی چی ءَ چو گنوک اِنت ..هچ سرپد نہ بیت ..بس پہ ابدالمجید ءِ واستا ایشی ءَ را چونیں کینگے ھست.. وتی دُژمن کادوُ ءِ کُچکانی پشت پناهیءَ کنت ..گشیت کادوُ منی دژمن انت بلے مجیدُک چی ءَ چوش کنت…من گُشتگ هیر بی بی تو زاناں گنوک ئے ابدالمجید ءَ گُش ئے مجیدُک… دیم ئِے گومن کُرتگ گُشت ئِے گُش آن ئِے گُش آن ئِے پرچا کادوُ ءِ کُچکاں جنت… من گُشتگ ھووو بسم الله زاناں هیر بی بی کادوُ تئی دُژمن نہ انت…؟
گش ئِے هاں منی دُژمنی ءَ وَ رد نہ اِنت… بلے مجیدُک چی ءَ چوش کنت… ؟
من گشاں هیر بی بی پھک گنوک اِنت .. نزاناں ایشی ءَ را پہ ابدالمجید پرچا چو زهر کیت… من گُشت زاناں ماتی ابدالمجید کئی کارے هراب کُرتگ … ؟
ماتءَ گُشت بابا جان ابدالمجید شریں هِمّتی مردُمے…پہ چشیں زالم ءُ زوراکیں مردمانی واستا.. من وت نزاناں هیر بی بی چی ءَ چوش گنوک اِنت…
من گُشت ماتی سوچ اے هیرو ءَ چاهے بدے من وران ءُ وانگ ءَ رواں … مات ءَ منی سر ءَ زهر گِپت ءُ گشت” مہ گُش هیر بی بی تئی مات ءِ همسرو بیت… منی پُل جان یک روچے بیت هیر بی بی ابدالمجیدءَ ماریت زانت کہ ابدالمجید شر کنگ ءَ انت…من گُشت من نزاناں اشی اَکل ءُ هوش کدیں کیت…ماتءَ منی گُّل چُک کُت ءُ گشت ئِے یک روچے بیت… دُرسیں مردماں ابدالمجید وشیں روچے پیش دار ایت…..
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت