نبشتانک: سلمان همل پِدائی ءَ ابید ھاپزالکرانے هم بوتگ
نبشتہ کار: بالاچ بلوچ
دی بلوچستان پوسٹ
سلمان همل منی نزیکیں سنگتے بوتگ مئے لوگ سلمان جان ءِ لوگ دیم پہ دیم بوتگ اَنت سلمان من ءَ چہ کستر بوتگ بلے آئی ءِ زھِن چہ منا باز مستر بوتگ من ءَ یات اِنت ما مسیت ءِ مُلا ءِ گوَر ءَ زُهر ءَ بگر داں اسُر ءَ ونتگ مئے بازار ءِ جنک بچک ما هواری ءَ وانگ ءَ بوتگیں بلے من ءَ چہ سلمان باز پیسر بوتگ من کران شریپ ءَ کہ سر بوتگ آں آئی ءَ کران شریپ هلاس کتگ من کہ کران شریپ هلاس کتگ بوتگ گڑا سلمان ءَ هاپزی هلاس کتگ من هر وڑ کت بلے سلمان گوں من ءَ گِرگ نہ بوت من کہ هاپزی ءَ اتکاں سلمان ءَ دو رند ءَ کران شریپ هِپز کتگ اَت.
همے وڑ ءَ وهد گوزان اَت داں سلمان هاپزالکران بوت من چیزی جُز هپز کت پد ءَ یلہ دات من چار اِت کہ گوں من نہ بوگ ءَ اِنت سلمان ءَ باج برت بلے سلمان ءَ چہ کسانی ءَ وتی گلامی ءِ اهساس بوتگ برے برے من سلمان ءِ کماش ءِ دکان ءَ شتگاں همود ءَ نِندوک بوتگ گڑا همے سیاسی باوست ءُ گپ بوتگ، من ءَ یاد اِنت هرچ وهد ءَ کہ مند ءَ جلسھے کنگی بوتگ گُڑا سلمان دیم ءَ بوتگ اسپیکر ءُ سینکلے گون ئِے بوتگ سرجمیں مند ءِ دمکاں جار جنان بوتگ پلاں روچ ءَ وت ءَ جلسہ ءَ سر کن اِت.
همے وڑ ءَ روچ گوزان اِت اَنت داں مند ءِ جاور نگیگ بوان بوت اَنت گڑا سلمان چہ مند ءَ در کپت تربت ءَ شت پہ وانگ ءَ، بازیں وهدے ءَ تربت ءَ بوتگ بازیں وهدےءَ شال ءَ بوتگ پہ وانگ ءَ- گڑا من پد ءَ دُچار نہ کپت آں بازیں وهدے ءَ ،بلے من اشکتگ کہ سلمان کوه ءَ شتگ پہ وتی زمین ءِ پهازگ ءَ گڑا من پد ءَ سلمان نہ دیست همے وڑ ءَ ما هم چہ ملک ءَ در کپتیں مئے سر کپت یورُپ ءَ ،یک روچے یک نمبرے ءَ هال کت وَٹس اپ ءَ سلام دورت بوتیں هال کن پجاہ کار ئے من گشت انا من ترا زانگ ءَ نیاں ٹَھکے دات ئِے هو واجہ تو نی یورپ ءَ سر ئے کُجا مارا پجاہ کار ئے؟
ناں پل اے گپ نہ اِنت پد ءَ ٹھک دات ئِے من سلمان همل آں- هاں پلو چون ئے سنگت چون اَنت تئی آواز پھک بدل بوتگ نگبهت چون زانگ بہ ئے؟ گڑا ما باز گپ ءُ رپ کت مزاک ءُ مسکرا پد پون بند ئِے کت، پد ءَ مئے هال اهوال وَٹس اپ ءَ بوتگ.
من چہ سلمان ءَ سک باز چیز دربرتگ پد ءَ مُدام منی دیم ءَ گشتگ ئِے من هنچیں چیزے کنگ لوٹاں سرجمیں دنیا هیران بہ بیت چیزے روچ اَت کہ گوں من هال ئِے نہ کت، من دگہ سنگتے هال کت هال کن گوں نوتک ءَ تئی هال ءُ اهوال نہ بوتگ؟ گُشت ئِے ناں- دو روچ نہ گوَست هال اتک کہ کراچی ءَ پاکستان اِسٹاک ایکسچینج ءِ سر ءَ بلوچ یاگیاں پِدائی اُرشے کتگ همیشاں چہ یکے سلمان همل ھوار اَت-
سلمان جان من ترا هال دیگ لوٹ آں کہ تو واکی سرجمیں دنیا هیران کتگ-
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت