سندھ ءَ چہ بیگواہ بیتگیں راج دوستیں جھدکارانی یل کنگ ءِ ھاترءَ زھرشانی کنوکیں گل وائس فار مسنگ پرسنز آف سندھ ءِ رھشون سسی لوہار گوں دگہ زالبولیں جھدکار ءُ رھشوناں ھوار چہ کراچی ءَ دزگیر کنگ بیتگ
زانگ بہ بیت گوستگیں بازیں روچاں چہ سندھ ءِ جتاھیں دمگاں چہ فورسز ءِ دستءَ بیگوائیانی تھءَ یک رندیں پدا گیشی اتکگ، فورسزانی دست ءَ بیگواہ بیوکیں سندھی راج دوستیں جھدکار ءُ آیانی کھولءِ مردمانی زوریں بیگوائی ءِ سرجمیں سندھ ءَ راج دوستیں گل ءُ بیگوائیں مردمانی ھانواد ءِ مردمانی نیمگ ءَ چہ زھرشانی کنگ بئیگ ءَ اِنت۔
فورسز انی دستءَ زوریں بیگوائیانی ھلاپ ءَ مروچی کراچی پریس کلب ءِ دیما بیوکیں زھرشانی ءِ سرا سندھ پولیس ءَ اُرش کُتگ ءُ وائس فار مسنگ پرسنز آف سندھ ءِ رھشون سسی لوہار ءُ دگہ زالبول دزگیر کُتگ اَنت۔
دزگیری ءِ وھد ءَ سسی لوھار وتی فیسبوک اکاونٹ چہ لائیو بیتگ کہ آئی تھءَ سندھ پولیس ءِ نیمگ ءَ چہ دزگیری ءِ وھدءَ سسی لوھار ءِ سرا کُتگیں لَٹ شاپی گندگ بنت۔
پولیس ءَ دزگیری ءَ پد درستیں زھرشانی کنوک تھانہ ءَ بُرتگ اَنت۔
یات بہ بیت کہ گوستگیں روچاں چہ کراچی ءَ ھوار سندھ ءِ بازیں دمگانی تھءَ پاکستانی فورسز ءُ چیریں گلاں بیڑ بُرتگ ءُ ھمے بیڑانی نیام ءَ مزنیں کچے ءَ سیاسی جھدکار ءُ آیانی کھول ءِ مردم دزگیر کُتگ ءُ بیگواہ کُتگ اَنت، بیگواھیں سندھی مردمانی کھول ءِ اڈ داتگیں گل ءِ ردءَ اے بیڑانی تھءَ داں شست ءَ بُرز راج دوستیں جھدکار فورسزاں دستءَ دزگیری ءَ بیگواہ کنگ بیتگ اَنت ۔
سسی لوھار ءُ ایندگہ دزگیریں زالبولانی دزگیری ءِ بگیری ءَ ورلڈ سندھی کانگریس ءَ وتی یک درشان ءِ تھءَ اے وھیل ایر جتگ ءُ گوشتگ کہ بائد اِنت استانی ناشرکاری زیت ءَ چہ زیر دارگ بہ بنت ۔
ھمے رنگ ءَ بلوچ جھدکار پیردان بلوچ ءَ وتی یک ٹوئیٹ ءِ تھءَ وائس فار مسنگ پرسنز آف سندھ ءِ رھشون سسی لوھار ءُ دگہ زالبولیں جھدکارانی دزگیری ترندی ءَ گوں ایر جتگ۔
آئی ءَ دیمترا گوشتگ کہ اے اُستان چہ زیردست ءُ پدمنتگیں راجانی جھد ءَ چہ گندگ بیت کہ تُرس ءُ بیم ءِ آماچ اِنت۔