بلوچستان ءِ شھر تُربت ءَ گوستگیں روچاں شال ءَ زھرشانی کنوکیں نودربرانی سرا بیتگیں لٹ شاپی ءُ دزگیری ءِ ھلاپ ءَ روانک کش اِتگ ءُ زھرشانی کُتگ ۔
بلوچ اسٹوڈنٹس الائنس کیچ ءِ چیردستی ءَ عطا شاد کالج ءَ چہ داں شھید فدا چارراہ ءَ روانک کش اِتگ۔ کہ آودہ روانک ءَ ننداک ءِ دروشم زرتگ۔
شھید فدا چارراہ ءَ زھرشانی ءَ چہ نودربر رھشوناں تران کنان ءَ گوشتگ کہ شال ءَ بے میاریں بچک ءُ جنکیں نودربرانی سرا پولیس ءِ زوراکی یک پالیسی ءِ بھر اِنت کہ آ پدر کنت بلوچاں زندمان ءِ دگہ ھق نہ بیگ ءَ ھوار ھوار وانگ ءِ ھم ھق نیست۔
آیاں گوشتگ کہ وتی رھبندی ھقانی ھاترءَ پر ایمنیں زھرشانی کنوکیں نودربر پولیس ءِ دست ءَ لٹ شاپی کنگ ءُ دگانی سرا کم شرپ کنگ ءُ زندانی کنگ انسانی ھقانی مستریں لگتمالی ءُ ملکی رھبند ءِ تھءَ داتگیں ھقانی لگتمالی اِنت ۔
زھرشانی کنوکانی گوشگ اَت کہ ھاکماں وت ءَ ھچ تاگت نیست ءُ بس پہ نام ءِ ھاکم اَنت آیاں ھرچی گوشگ بیت آ بس ھما کار ءَ کن اَنت۔ نامینتگیں ھاکم نوکرانی ھم وڑ ءَ اَنت پمیشکہ آیانی کرا ھچ لوٹگ ءَ ھچ پرق نہ کپ اِیت۔
آیاں گوشت کہ آنلائن کلاسز داں ھما وھد ءَ منگ نہ بنت دانکہ مارا انٹرنیٹ ءِ آسراتی دیگ نہ بیت ءُ مئے زھرشانی ھم برجاہ مان اَنت ۔
زانگ بہ بیت شال ءَ زھرشانی کنوکیں نودربرانی دزگیری ءُ لٹ شاپی ءِ ھلاپ ءَ یک شلیں زھرشانی بندات بیتگ اَنت۔ گوستگیں روچ ءَ ڈیرہ غازی خان ءَ ھم ھمے درگت ءَ زھرشانی کنگ بیتگ۔ چہ ایشی ءَ پیسر نوشکی، دالبندین، کراچی ءُ اسلاآباد ءَ ھم زھرشانی کنگ بیتگ وھدے کہ خضدار ءُ بلوچستان ءِ دگہ دمگاں زھرشانی ءِ جار جنگ بیتگ۔
زھرشانی کنوکانی نیمگ ءَ چہ بلوچستان سرکار ءَ آنلائن کلاسانی بگیری ءَ زھرشانی کنوکیں نودربرانی دزگیری ءِ سرا ترندیں ایراد گری ءِ دیمپانی کنگ کپتگ۔
دومی نیمگ ہیومن رائٹس کمیش آف پاکستان تُربت ءِ جارکش ءَ آنلائن کلاسانی بگیری ءَ زھرشانی کنوکیں نودربرانی لٹ شاپی کنگ ءُ دزگیر کنگ ءِ وھیل ترندی ءَ گوں ایر جتگ ءُ گوشتگ کہ دانکہ بلوچستان انٹرنیٹ ءِ آسراتی دیگ مہ بنت آنلائن کلاسانی پیسلہ زیرگ مہ بیت پرچہ کہ انٹرنیٹ ءَ ابید آنلائن کلاسانی زیرگ ھچ وڑ ءَ بیت نہ کنت۔