نبشتانک: بے سُدّیں راجانی راجی جُھد
نبشتہ کار: ڈاکٹر زَرناز بلوچ
دی بلوچستان پوسٹ
چَہ دْرستاں پیش من وتی پجّار ءَ کنائین آں کہ من سِند ءِ شھر ھیدرآباد ءِ نشتگیں بلوچے آں ءُ چوناھا ماں سند ءَ بلوچانی بے کَچ ءُ بلاھیں آبادی یے ھست، ما دلگوش بِہ بَہ ایں کہ بلوچ ڈیھ ءِ بازیں بَھرے (دمگ ءُ آتراپ) چہ زُلم ءُ زورانسری ءَ سندی کاسگ چٹّ زلپکار بھٹو ءَ سند ءَ ھوار کنائینتگ انت ءُ ماتیں وتن ونڈ ءُ چُنڈ ئِے کت ءُ گیشتر بَھرے پنجابی ءِ چنگُلاں زیردست ئِے کت۔ چریشی ءِ آسر ءَ مرچی ما بِہ گِند ایں کہ سند ءُ پنجاب ءِ نیمگی بلوچاں راجی جُھد ءُ بلوچانی سر بیتگیں زورانسری ءَ بے سما اَنت بلے ما منّ ایں کہ پنجاب ءِ زیردستیں بلوچاں کمیں راجی مارشت وَ ھست انت انچوشکہ بْرمش ءِ ھک ءَ پنجاب ءِ زیردستیں بلوچاں ڈُنگ ءُ کاسگ چٹّیں کُشندھیں ٹولی ءِ ھلاپ ءَ زھرشانی ءُ روانک کش اِت وتی نیمگی زیردستیں بلوچ راج ءَ راجی مارشتے ودی کنائینت بلے سِند ءِ بلوچاں بْرمش ءُ آئی ءِ مھکیں مات ءِ سر ءَ بوتگیں کَھر ءِ ھچ وڑیں سرپدی یے نیست اَت۔ بزاں اد ءِ بلوچاں ھچ سُدّ ءُ نیست انت کہ بلوچ ءِ سر ءَ مرچاں چونیں زُلم ءُ ناروائیں کھر بوگ ءَ انت بزاں سند ءِ زیردستیں بلوچ پَکّ ءُ پیلوئی ءَ بے سُدّ ءُ بے سما اَنت کہ ما بلوچ گلامیں راج ایں۔ ایشی ءِ بلاھیں سبب ایش انت سِند ءِ زیردست کتکگیں بلوچاں ماں وانگجاہ سندی ءُ ھندی وانینگ بوگ ءَ انت چمیشکا چَہ بلوچ ءَ راجی زبان بلوچی گار بوان انت دومی اد ءَ راجی زرمبشت ءِ ودی کنگ ءَ ھچ وڑیں جُھد ھم نہ بوتگ انچوشکہ کہ راج ءَ وتی راجی آجوئی ءِ جُھدانی سما ءُ آگاھی وَ ھژدری انت۔
انچوشکہ ماں ھیدرآباد ءَ ھم بلوچانی بے کچیں آبادی یے بلے ھیدرآباد بلوچانی شھر وَ نہ اِنت بلے ھیدرآباد شھر ءِ یک کش ءُ کِرّ ءَ بلوچ کالونی نامیں میتگے ھست کہ اود ءَ ما مکُرانی ءُ سلیمانی گالوار ءِ بازیں بلوچ آباد ایں۔ ھمے بلوچ کالونی ءَ لھتیں لوگ سندی ءُ چہ ھندوستان ءَ تتکگیں پناھگِرانی ھم ھست انت کہ وت ءَ نی مُھاجر گْوش انت، بزاں بلوچ کالونی ءِ میتگ ءَ دوئیں راجانی لوگ ءُ گِس ھست اَنت چمیشکا منی بازیں سندی دزگْوھار ھم ھست کہ ما یکجاھی ءَ شھر ءِ سرکاری نادْراھجاہ ءَ کار ءَ ایں، ما ھمُک سُھب ءَ ماں یکیں بس ءَ جماز بہ این ءُ نادْراھجاہ سر بہ ایں۔ برے ما چَہ یک نادْراھجاھے ءَ بدلی بہ این ءُ دگہ نادْراھجاہ ءَ ھم رو ایں پمیشکا تو گُشت کن ئے کہ منی پوریاگِری ءِ پِڑ ءَ سندی ئیں دزگْوھار باز انت۔
چَہ ھمے دزگْوھاراں یکے نام مائی ماروھی ھالیپوٹریو انت ءُ ایشی ءَ ھالیپوتو یا ھُنر ھم گُش اَنت کہ سندی راج ءِ یک ٹکرے۔ مائی ماروھی ھُمک سُھب ءِ ھپت ءُ نیم ءِ ساھت ءَ یک سندھی روتاکے وتی دست ءَ کنت ءُ بس اوشتاجاہ سر بیت پد ءَ ما دوئین دْروت ءُ دْراھبات ءَ رند بس ءِ آیگ ءَ ودار کن ایں کہ مُدام بس ماں سَے تا پنچ ملٹ ءَ کیت ءُ مارا نادْراھجاہ سر کنت کہ ما اود ءَ نادْراھیں بزگیں مھلوک ءَ الاج ءُ درمان کنائین ایں۔ من ءُ ماروھی یکجاھی نگن ءُ چاہ ھم ور ایں پمیشکا منی ءُ مائی ماروھی ءِ سیاسی ءُ دمگی جاورانی بابت ءَ باز نند ءُ نیاد، گپ ءُ تران بیت بلے بزن انت کہ مائی ماروھی یک بلاھیں مجگی گلامے۔ من آئی ءَ بازیں وھد ءَ سند راجدوستی ءُ سندی نیشنل ازم ءِ بارو ءَ گپ کت بلے منی گپاں نہ منّ ایت ءُ ماروھی ءَ ھچ سُدّ نیست انت چُنت سندی ورنائیں برات ءُ کامریڈ ھمےبیکیں سند ءُ بلوچستان ءِ زورانسریں دژمن ءَ گار ءُ بیگواہ کت ءُ چُنت ءِ تیر جتگیں جون ماں ویرانیں دگاں دور ئِے دات انت۔
چوناھا سند ءِ تہ ءَ جئیے سند ءِ وڑیں سندی راجی آجوئی لوٹوکیں سیاسی گل وَ ھست انت بلے تیوگیں سند ءِ لس مھلوک زالمیں زمیندار ءُ وڈیرانی چنگُل ءِ تہ ءَ انت ءُ ھمے سرجمیں وڈیرہ سرکار ءِ کاسگ چٹّ ءُ سِلیں مُلکار انت پمیشکا جئیے سند ءِ سیاسی گل وتی سندھی لس مھلوک ءَ راجی گلامی ءِ مارشتے ودی کنگ ءَ سوبین نہ بوتگ انچوشکہ بلوچ نودربر گل بی ایس او ءُ دگہ بلوچ راھشون بلوچستان ءِ بلوچ چاگِردی ءِ تہ ءَ بلوچ راجی آجوئی ءِ آگاھی ءُ سرپدی یے ودی کتگ ءُ مرچی چہ ھمے نمیرانیں بلوچ جُھدکارانی بے کساس جُھد ءِ برورد انت بلوچ راجی جُھد ھمُک روچ بے کساس دیمروی کنان انت۔
گُڈسری من وتی گپ ءِ سر ءَ کایان ءُ وتی راج ءَ راستیں سرگوستے درشان کن آں کہ مرچی سھب ءَ مائی ماروھی بس اوشتجاہ چہ من ءَ ساری ءَ نشتگ ءُ منی راہ ءَ انچو چارگ ءَ اَت گْوش ئے ماروھی مرچی بس ءِ ودار نہ انت بلکیں منی ودار ءَ انت کہ من کدین بیا ءَ آن ءُ آئی ءِ برانز گپتگیں ھبراں دلگوش بہ کن آں۔ من وھدے بس اوشتجاہ سر بوت آں گُڑا دْروت ءُ دْراھبات رند گْوشت ئِے “اے ایس آر اے چے یے ءُ ایشی ءَ مرچی کراچی ءُ گھوٹکی ءَ بم تْرکائی کت ءُ اے ماں یک ھپتگے ءَ سیمی ترکّ انت ءُ سرکار ءِ پٹپول ءُ تپاس ءِ آسر ءَ ایشی ءَ بلوچ راجی سرمچار کُمک کنگ ءَ انت۔ اے سَک ھرابیں آسے کہ ماں سِند ءَ روک بوگ انت”.
گُڑا من دمانے ءَ رند سارتیں گینے کش ات ءُ دُرائینت ” منی دزگْوھار آس وَ سرجمیں سِند ءَ ساری ءَ روک انت، سرجمیں سِند سرکاری کاسگ چٹّ ءُ سِلیں مُکارانی پُلگ ءِ آماچ انت پمیشکا سند ءِ لس مھلوک بزگ ءُ گژنگ انت! جئیے سند ءِ سندھی ورنائیں سیاسی باسک چہ لوگاں چِست ءُ گار کنگ بوگ ءَ انت پد ءَ آیانی جون ماں ویران چگل دیگ بوگ ءَ انت تو آیاں نہ گِندگ ءَ ئے، تو بے سُدّ ءُ کوریں مائی یے، بلکیں من چَہ پیس بُک ءَ گِند آں کہ تیوگیں سندی وتی راجی جُھد ءَ بے سُدّ انت بلے من ءَ اُمیت انت نی زیتیں روچاں سِند راج ءِ تہ ءَ راجی زرمبشتے چِست بیت”.
مائی ماروھی انگت ءَ بے سُدّ اَت پمیشکا منی گپانی ھچ پسّو ئِے نہ دات۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔