نبشتانک: شَال ءُ ارسیگیں گْوھار
نبشتہ کار: سیپ بلوچ
دی بلوچستان پوسٹ
اَنچوش گمان بِیت کہ زندگی یک چکاسے مئے سر ءَ اتکگ ءُ آ چکاس ءَ ما دْرست سوبین بوگ ءَ نہ ایں، چُنت وهد اِنت مِئے دیار ءَ یک انچیں وبایے شِنگ اِتگ کہ اے وبا ءِ رَنج ءُ گَم ءُ تکلیپَی ءَ مارا چَہ گِیشتر مئے گهُاراناں رسگ ءَ اِنت ،
وهدے کہ من ھمے چاگردی رسانکدار ءَ کایاں کہ وتی کوم ءِ بِچکندے چمانی دیم پان بیت بلے دْرستاں چہ پیسر شَال گْوں اَرسیگیں چَماں چَمانی نِدارگ بِیت مُدام همے اَکسانی دیم ءِ نشتگیں مات ءُ گهار وهدے نزر ءَ کاینت دل چہ جبین ءَ آسے ءِ وڑ ءَ سوچ ایت، ھمے ساهت ءَ سردیں لوگانی تہ ءَ ایسی ءُ کنڈیشن وهدے چالو بہ بنت نندگ نہ بیت !
بزّگیں مات گهارُک کَسان کسانیں چُک اَنت نشتگ اَنت گُژنگی ءُ تن ءَ چَہ بس هَمے پِریات ءَ کنگ ءَ انت کہ مئے چُکانی میار چِے بوتگ اگاں آیاں ردی یے کُتگ ھامد گس ءَ پِیش بہ کن اِت اش بلے اے توار همے جاه ءَ چہ گُنگ اِنت هِچ دیم ءَ نہ روت کِہ اے بزگی ءُ لاچاری ءِ سبب چِے انت؟ پرچا مئے ماتانی پریاتاں کس اِش نہ کنت پرچا مئے ورنا ءَ گار بیگواه کنگ بوگ ءَ اَنت ؟
بلے اِشکنوک نیست انچش گمان بیت کِہ اَرش العالمین هَم مارا چہ دِلگران اِنت کہ مئے بزّگیں گهار وتی براتانی سالونکی ءِ چونیں نوبتے ءَ گوں ودار ءَ اَنت.
سالانی سال نشتگ گُد دوچ انت وڑ وڑیں شوکیں سامان سِینگارگ ءِ گِر اَنت ایر کن اَنت کہ مئے برات مزن بنت ما سیر ءُ سالونکی ءِ مُرادان اِش بہ گند ایں بلے آیانی برات ماں بندیگ جاهاں بند انت.
مَرچی گُهار هسیبہ ءَ گریوگ ءَ دیست انچو چو کسانیں چکے پیم ءَ پریات کت گریتگ داں دیر ءَ کہ اے گهارک ءِ اَرسانی دیم ءَ منی اے نبشتہ کتگیں لبز یک کترهے ءِ بستارے نَہ دار اَنت پرچا کہ من هچ کُت نہ کناں پہ گهار ءَ اگاں من بلوٹ آں کہ گَپے بہ جن آں بوت کنت منی هم گهار همے نوبتانی آماچ بِیت ،بلے داں کدی اے نوبت کِہ سالونکیں بچ ماتانی گهارانی لاڈ چو بے گناه ءَ گار بیگواه کنگ بنت! اے ما زان ایں بنی ءِ پیم ءَ نہ اَنت یا مارا هم هک نیست کہ وتی چاگرد ءَ گوں وشیں روچے پہ شادئی بیگوازین ایں ؟
بس هَمے ندارگ ءَ گوں شال مدام اَرسیگیں انت گریو ایت ءُ چیهال چنت کہ من سینگارگ لوٹ آں هون ءَ گوں اِناں بلکیں گوں سالونکی هنّیاں.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔