ارساں تَریں گُشان
ٹی بی پی شونگال
اگاں پہ یک دمانے ءَ گمان کنگ بہ بیت کہ بلوچستان ءَ جنزوکیں زرمبشت ھپتاد سال کوھن نہ اِنت ءُ زوریں بیگواھی چہ گوستگیں نیم کَرن ءَ چہ جُنزگ ءَ نہ اِنت، ءُ اے درستانی بندات تھنا ھمے کرن ءِ بندات ءَ چہ بیتگ، گُڑا گوستگیں دو دھکاں چہ بلوچستان ءَ چی کَٹ اِتگ ؟
اے کرن ءِ بندات ءَ چہ بلوچستان ءَ یک ھم چُشیں سالے نہ گوستگ، کہ آئی ءِ تہ ءَ بلوچ زوریں بیگواھی ءِ آماچی ءَ چہ نہ گوستگ اَنت۔اھوال ءُ شمارانی رد ءَ علی اصغر بنگلزئی ھما اولی بلوچ اِنت کہ آ 2001 ءَ گمانی اِنت کہ پاکستانی پوج ءَ چہ شال ءَ زور بیگواہ کنگ ءَ پد گار کُتگ، ءُ اے ھما اولی رند بیتگ کہ یک بیگواھیں بلوچے ءِ درگیجگ ءَ آئی ءِ کھول ءِ مردمانی گمیگ ءِ دیم پریس کلب ءُ دگانی سر ءَ گندگ بیتگ اَنت ۔
علی اصغر بنگلزئی ءِ بیگواھی ءَ مروچی 19 سال گوستگ، ءُ آ علی اضغر ءِ برات زتک نصر اللہ بلوچ بیتگ، کہ آئی ءَ بیگواھیں بلوچانی ھاتر ءَ زھرشانی کنوکیں گل وائس فار بلوچ مسنگ پرسنز ءِ بن ھشت ماما قدیر ءُ دگہ کھولانی ھمراھی ءَ ایر کُتگ ءُ آ اے گل ءِ کارمستر (چیرمین) اِنت ھم۔ اے گل ءَ یازدہ سال بیت کہ اڈ بیتگ، ءُ گوستگیں یازدہ سالاں چہ یکشل ءَ ھمروچی یے ھساب ءَ زھرشانی کنگ ءَ اِنت، بلے اے گل ءِ باسک گل ءِ اڈ بیگ ءَ پیسر ھم سال 2001 ءَ چہ زھرشانی کنان اَنت۔
کجام ھم سیاسی جھدکار ءِ زوریں بیگواھی ءَ آئی ءِ کھول ءِ مردم ھمے اوست ءَ گوں شال (کوئٹہ) ءَ سر بنت کہ بلوچستان ءِ درستاں مستریں پریس کلب ءِ دیما زھرشانی کنگ ءَ پد آیانی توار کُجا نہ کُجا سر بیت ءُ آیانی بیگواھیں مردم دیم ءَ آرگ بنت۔ پریس کلب ءِ دیم ءَ ارسیگیں بلوچ زالبول ءُ زھگ گندگ بنت ۔ ماہ رنگ بلوچ وتی کماش غفار لانگو ءِ ھاتر ءَ ارس، کہ بازیں ماھانی بیگوائی ءَ پد زانگولیں جون ءِ دروشم ءَ گڈانی ءَ دور دیگ بیتگ اَت، سیما بلوچ وتی برات ءُ بی ایس او آزاد ءِ بنجاھی جارکش شبیر بلوچ ءِ ھاتر ءَ ارسیگ اَت، کہ داں انگت بیگواہ اِنت۔ ذاکر مجید ءِ مات ءَ نوں یک دھکے ءَ چہ گیشتر وھد گوستگ کہ گریوگ ءَ اِنت، آئی ءِ زھگ 2009ءَ بیگواہ کنگ بیتگ اَت۔ انسہ بلوچ ءِ آ مرواردیں ارس، کہ آیاں آئی ءِ برات واتر آورت ءُ ارس شلگ ءِ اے کسہ انگت برجاہ اِنت۔ اے پریس کلب ءِ دیم ءَ بازیں بلوچ زالبول ءُ زھگ ارس شلگ ءَ پد بے اوست بیتگ اَنت ءُ پد ءَ شُتگ اَنت، ءُ ھمروچ دگہ لھتیں گوں نوکیں اوست ءَ کاینت۔
8 جون ءَ دگہ یک بلوچ گْوھارے حسیبہ قمبرانی ءِ دل ءَ دور کنوکیں دزبندی ءُ شلوکیں ارس چاگردی رسانکدر ءَ وائرل بیتگیں یک تامر بند یے ءِ تہ ءَ درستاں دِستگ اَنت۔ آئی ءِ کسہ انگت ماہ رنگ ءِ بلوچ ٹائم لائن ءَ پنچ لک ءُ اولا مندوخیل ءِ ٹائم لائن ءَ دو لک بر ءَ چارگ بیتگ ۔ اے کساس ءُ شمار چاگردی رسانکدر ءِ تھنا دو اکاؤنٹسانی اَنت، چہ ایشی ءَ زانگ بیت کنت کہ آئی پریات داں چنچو دیر سربیتگ۔
حسیبہ ءِ ارس شال ءِ پریس کلب ءِ دیم ءَ گوستگیں دو دھک ءَ چہ شلوکیں ارسانی کَور ءِ تہ ءَ بس لھتیں گیشیں ترمپ اَنت۔ اے دومی رند اِنت کہ حسیبہ ھمے جاہ ءَ پہ مُز دانک ءَ گریوگ ءَ اِنت ۔ چہ ایشی ءَ پیسر 2015 ءَ وتی برات سلمان قمبرانی ءُ ناکوزتک گزین قمبرانی ءِ ھاتر ءَ گریوْان ءَ مُز دانک ءِ لوٹ کنگ ءَ بیتگ،وھدے کہ آ گمانی دروشم ءَ پاکستان ءِ چیریں گلاں بیگواہ کُتگ اِت اَنت۔ گزین ءُ سلمان یک سالے ءِ کچ ءَ بیگوائی ءَ پد اگست 2016 ءَ آیانی زانگولیں جون دور دیگ بیتگ اَنت۔
حسیبہ چار سال ءَ پد پد ءَ گوں ارساں ءُ پرشتگیں توار ءِ گون ءَ ھمے پریس کلب ءِ دیم ءَ گندگ ءَ کپت وھدے آئی ءِ پشت کپتگیں برات حسان قمبرانی ءُ دگہ یک ناکوزتکے حزب اللہ بلوچ ءَ ھوار فروری 2020 ءَ چیریں گلاں بیگواہ کنگ ءَ پد گار کُتگ اَنت۔
نی آئی ءَ اے تُرس پِر اِنت کہ اشانی آسر ھم گزین ءُ سلمان ءِ وڑ مہ بیت۔ بلے سر بیتگیں ھالانی رد ءَ سر وزیر ءِ کارگس ءَ نی گوں حسیبہ ءَ اے جیڑہ ءِ درگت ءَ اھوال کُتگ، بلے اے گپانی دلجمیں منانک انگت سر نہ بیتگ اَنت کہ رھوت کنوک کَے بیتگ ءُ آیاں چونیں باوری داتگ۔
بلوچستان ءَ گوستگیں دو دھکانی کسہ ءَ سَے گالانی تہ ءَ چُش درشان کنگ بیت کنت، زوریں بیگواھی، زانگولیں جون ءُ ارساں تَریں گُشان۔