نبشتانک: راستی ءِ چیدگ میر ھدابکش رکشانی
نبشتہ کار: میر زگرین بلوچ
دی بلوچستان پوسٹ
4 مئی 1973 ءَ ماسٹر ھدابکش میر رزائی ءِ لوگ ءَ ودی بوتگ ماسٹر ھدابکش ءَ وتی بنداتی وانگ ءُ زانگ گیشکور پرائمری اسکول ءَ بندات کُتگ پہ گیشیں وانگ ءَ آواران ھائی اسکول ءَ شتگ ءُ میٹرک آوران ھائی اسکول ءَ دربُرت ءُ دیمتر ءَ وانگ ءِ ھاتر ءَ کیچ اتاشاد ڈگری کالج ءَ شُت ءُ وتی وانگ ئِے سرجم کت۔۔۔۔۔۔۔
چیزے وھد ءَ رند آئی ءَ چکاسے دات ھمے چکاس ءِ دیگ ءَ سوبمند بوت ،مڈل اسکول رزائی بازار وانگجاہ ءَ ماسٹری ءِ پوسٹ ءِ چکاس ءَ سوبمند بوت ءُ شھید ماسٹر ھدا بکش وتی واجھیں کماش رزائی ءِ بیرانی ءَ پد وت میتگ ءِ کماشی ءِ ھم زمہ واری ئِے زُرت اَنت، ملوک ءِ کجام وڑیں جیڑھے بوت ءَ ماسٹر کدی چک ءُ پد نہ بوت ءَ ھر وھد ءَ پہ گریب ءُ درتگ پُچیں مردم ءَ ساڑی بیتگ ھمے کار آئی ءَ وتی زمہ واری سرپد بیتگ راج ءِ کجام وڑیں جیڑہ ءُ مسلھے بیتگ ساڑی بیتگ آئی ءَ نہ روچ چار اتگ ءُ ناں کہ شپ بس آئی ءِ دل ءَ ھمے درد بیتگ راج ءِ مھلوک پہ وش ءُ وشھالی آرام بہ بیت۔۔۔۔۔۔۔۔
ماسٹر گیشکور ءِ سیاسی ءُ سماجی چست ءُ ایراں ھم سرکیلیں مردمانی سرپ ءَ ھوار بوت ءَ ماسٹرھدابکش رکشانی آشال گل ءِ کارگُشاد (جنرل سیکٹری) بوگ ءَ ھوار گیشکور ءِ تہ ءَ وانگ ءُ زانگ ءِ پڑ بہ بیت یا کہ لبزانک ءُ شائری یا کہ سماجی جیڑہ دراھیں چست ءُ ایراں ھوار شھید ھدابکش رکشانی ءَ آشال گل ءِ زمہ واری ھم کوپگ ءَ بوتگ اَنت آشال گل ءَ لائبریری یےِ بوتگ کہ مدام پہ ھرکس ءَ اِے گل ءِ پتر مھروان بوتگ گیشکور گیشتر ورنایاں وتی اِلمی سپر ھمے رھبرانی رھشونی ءُ آشال گل ءِ چیردستی ءَ بندات کُرتگ
2007 ءَ کولواہ ءَ بلاھیں سیلابے کیت بازیں ھند ءُ دمگاں کورانی آپ بر اَنت ءُ مردم تاوان بار بنت کولواہ ءِ تھ ءَ تھنائیں گل آشال بوتگ کہ وتی وس ءُ واک ءَ مردمانی کُمک ئِے کُرتگ ءُ گوں مردماں ھمکوپگ بوتگ ھمے داب ءَ کولواہ یکبرے پَد ءَ 24 ستمبر 2013 ءَ زمین چنڈ کیت ءُ کولواہ ءِ بازیں ھند ءُ دمگ ئِے اثرمند کنت زمین چنڈ ءَ شھید ھدابکش ءِ راستیں کوپگ آشال آرگنائزیشن ءِ کماش ماسٹر ایوب آدل وتی لوگ ءَ چیرتر ایت ءُ شھید بیت بلے شھید ھدابکش وتی گل ءِ سنگتانی ھمراھی ءَ وتی کاراں نہ دار اِیت ءُ مردمانی کُمک ءَ در کپ اِیت چہ ایدگہ (ٹرسٹ ءُ ادراھاں )چی کمک زور ایت ءُ مردمانی ھمراداری ءَ شپ ءُ روچ تچ اُیت میتگ پہ میتگ سامان بھر کنت کولواہ ءِ کجام میتگ ءَ برو ھما سنگ ءُ ھاک آئی کوم دوستی ءُ مھروانی ءِ گواھی ءَ دے اَنت ءُ آئی ءِ شھادت ءَ پُرسیگ اَنت۔۔۔۔۔۔۔۔۔
پاکستانی پوج زمین چنڈ ءَ کیت ءُ گیشکور ءَ وتی بُنجل کنت مردم پوج ءِ سامانانی زورگ ءَ نہ رو اَنت بائیکاٹ کن اَنت گُڑا پوج شھید ھدابکش ءِ گوم ءَ اٹیک بیت ءُ بیھار ءُ پاترپ ئِے دنت کہ اے مردماں تو نیلگ ئے منی سامانانی زورگ ءَ من شُمے تنزیم ءَ کار ءَ نیلاں بند ئِے کناں بلے شھید ھدابکش بامردیں جبزگاں گوں وتی کاراں نہ دار اِیت دشمن سک آئی ءِ سر ءَ زھر وارت کہ ما ایشی ءَ کُجا نہ کُجا بہ جن اِیں وتی راہ ءِ دیم ءَ ھلاس بہ کن اِیں۔۔۔۔۔۔۔۔۔۔۔
دسمبر 2014 ءَ پوج آشال آرگنائزیشن ءِ دپتر ءَ چھاپہ جنت ءُ دپتر ءِ کتاب ءُ لیپ ٹاپ سجھیں ساز ءُ ساماناں بارت دپتر ءَ بند کنت گُش ایت آشال دھشتگرد تنزیمے بازیں بھتام جنت۔۔۔۔۔۔۔۔۔۔۔۔۔
شھید ھدابکش وتی تنزیم ءِ سنگتانی ھمراھی ءَ پوج ءِ کیمپ ءَ روت کہ مئے کسور چی اِنت تو اے بازار ءِ مردماں نیل ئے کہ بہ وان اَنت چہ نشہ بدکاری ءَ پھریز بہ بنت، اے کتاب مئے گل ءِ سامانی برگ ھمش اِنت کہ نوجوان بہ رو اَنت شہ بہ کن اَنت، یکے دومیگ ءَ اڑ ءُ کڑ بہ بنت مھربانی بہ کن مئے کتاب ءُ ساماناں بہ دے، پوج ھمے پسو دنت شمارا َ انڈیا کمک کنگ اِنت شُمئے تنزیم ءِ کتاب ءُ ساماناں نہ دیاں برو اِت ،اے کتاب ءُ گل پاکستان ءُ پاکستان ءِ پوج ءِ ھلاپ اِنت۔۔۔۔۔۔۔۔۔۔۔۔۔
شھید وتی ھمراھاں زور اِیت ءُ واتر بیت شھید یک روچے وتی کارے ءَ آواران ءَ روت گُڑا آئی ایس آئی ءِ کارندہ اسمان آئی ءَ گاڑی ءَ چی ایر کنت ءُ بارت کیمپ ء،َ شھید ءَ کسانیں کوٹی ءِ تھ ءَ بند کنت 3 گنٹہ ءَ پد کیت ءُ جُست ءُ پُرس ئِے کنت کہ تو آجوئی لوٹوکیں مردمانی کُمکارے ئے ،لھتیں سنگت ءِ نام ءَ گپیت کہ اے تئی مردم اَنت ایشاں بیار اگاں ناں ما ترا یل نہ دے اِیں شھید ءَ را بیھار دے اَنت کہ وتی کاراں بِہ دار دیم ءِ ما شر نہ کن اِیں شھید ھدابکش ءَ گُشتگ من الاکہ ءِ میر ءُ دومی من سیاسی مردمے آں منی زمہ داری اِنت کہ من کوم ءِ ھزمت ءَ بہ کناں اگاں اے واست ءَ من ءَ کُش ئے ھمیش اِنت، من شُمے دست ءَ آں گُڑا آئی ایس آئی والا چار انت، اِے مئے بیھار ءُ پاترپاں نہ تُرس ایت بیزار بنت ءُ یلہ ئِے کن اَنت ۔۔۔۔۔۔۔۔۔۔۔
12 فروری 2015 ءَ یکبرے پد ءَ پوج شھید ڈاکٹر سنااللہ ءِ زھگے آوار جنت وتی زندان ءَ دار ایت شھید ڈاکٹر سنااللہ شھید ماسٹر ھدابکش رو اَنت آرمی کیمپ ءَ گُش اَنت، اِے گونڈو تو چے ءَ داشتگ ایشی ءَ را یلہ بہ کن، پوج چوناھا شھید ھدابکش ءِ سر ءَ پیسر ءَ چہ زھر بیت، شھید ھدابکش ءَ دار اِیت سنا اللہ ءَ گُش اِیت تو برو ماسٹر ءَ من یلہ نہ کناں مارا گوں آئی ءَ چیزے گپ ءُ تران ھست۔۔۔۔۔۔۔۔۔۔۔۔
ڈاکٹر سنااللہ واتر وتی لوگ ءَ روت 16فروری ءَ پوج کُلوہ کنت بیا ھدابکش ءُ وتی چُک ءَ بر شھید سنا اللہ روت پوج سنااللہ ءَ ھم دار ایت ھمے روچ ءِ بیگاہ ءَ پوج کیت ءُ شھید ھدابکش ءِ لوگ ءَ چھاپہ جنت ءُ ھدابکش ءِ مستریں زھگ اکتر رکشانی ءَ آوار جنت ءُ لھتیں روچ ءِ لٹ ءُ کُٹ ءَ پَد یلہ ئِے کنت۔۔۔۔۔۔۔۔۔۔۔۔
18 فروری 2015 ءَ ڈاکٹر سنااللہ ءَ شھید کنت آئی لاش ءَ لیویز ءِ ھوالہ دنت ءُ گُش اِیت من جنگ ءَ جتگ ایشی ءِ ھمراہ جستگ اَنت۔ ایشی ءَ را من جتگ ۔۔۔۔۔۔۔۔۔۔۔۔۔ اے وڑ چالبازی ءُ مکاری دشمن باز جاگہ ءَ ھنداں کُرتگ لس مھلوک شھید ئِے کُرتگ ءُ ھمے نام ئِے داتگ کہ من دیم پہ دیم ءِ مڑاھی ءَ جتگ اَنت ایشانی آوار جنگ ءَ پَد گیشکور ءِ دراھیں ھند ءُ دمگانی مردم تُرس ءِ آماچ بیت اَنت ءُ وتی میتگ ءُ جاھاں یلہ کن اَنت ءُ رو اَنت۔۔۔،۔۔۔۔۔۔۔۔۔
پاکستانی پوج ھدابکش ءِ میتگ ءَ روت آئی ءُ آئی ءِ کھول ءِ مردمانی لوگاں ماندار اِیت ءُ پوراھیں الاکہ تُرس ءِ آماچ بنت ءُ وتی لوگ ءُ ھنداں یلہ کن اَنت ءُ دگہ ھند ءُ دمگاں رو انت ءُ جھمنند بنت، رستریں پوج شھید ماسٹر ھدابکش ءِ ٹپ ءُ ٹوریں جون ءَ 3 مارچ 2015 ءَ ھزدار ءَ دور دنت۔ شھید ماسٹر ھدابکش رکشانی راجدپتر ءَ داں ابد نمیران بُوت پاکستان ءُ آئی ءِ داشتگیں مردم کدی نہ لوٹ اَنت کہ چشیں مردمے وتی کوم ءِ بزگی درتگ پُچی ءَ بیمار ایت پرچا کہ کبزہ گیریں ریاست ءِ زور ھمش اِنت کہ آ راج ءِ زانت کار ءُ سرپدیں مردماں بہ جناں ءُ آ راج ءَ گیش ءَ چے گیش گلام بہ داراں شھید ماسٹر ھدابکش ھما گلامیں راج ءِ یک کواس ءُ زانتکاریں رھشونے اَت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت