نبشتانک: زاکر مجید ءِ بیگوائی ءِ یازدہ سال
نبشتہ کار: سمّو نور
دی بلوچستان پوسٹ
زاکر مجید گوش اِیت کہ “اِستان منی چماں کش اِت کنت بلئے ھما چماں کہ پہ منی راجءِ ھاترا واب دیستگ آھاں آ ھچبر کش اِت نہ کنت۔”
زاکر جان کہ مرچی آئیءَ یازدہ سال سرجم اِنت کہ پاکستانءِ زندانانی تہءَ ، آئیءِ ٹارچرسلانی مکابلہءَ کنگءَ انت۔ مرچی آھانءَ اے باور کنائینتگ ے کہ منی پکری لیکہءِ توان چہ شمئے ازیت آں گیش مھکم تر اِنت۔
زاکر یک بلندیں توارے اَت ، ایردستیں بلوچ راج ءُ مھلوکءِ توار ، زاکر نودربرانی رھشونیءَ کنگءَ ات، نودربراں ھوار آ بلوچ ئِے راجی آجوئیءِ جنزءِ رھشونانی لڑ ءَ ھوار اَت ءُ مرچی اے ھما جُنز اِنت کہ برجاہ انت ، ھما جنز کہ آئیءِ رھشون زاکر اِنت۔
بس مروچی اے سپر ءِ تہءَ اگاں کمی یے ھست انت گڑا زاکرءِ لیڈر شپ ئیگ انت کہ مرچی یازدہ سال انت کہ بلوچءِ ورنا اِیں سروک زندانی انت۔ بلے ایش منی ایمان انت زاکر جانءَ پاکستانءِ زندانءَ آئیءَ را اے باور کنائینتگ کہ تو منءَ زندانءَ بندیگ کت کن ئے ، تو منءَ کُشت کن ئے ، بلئے منی لیکہءَ ھلاس کت نہ کن ئے ، بلوچ جنزءِ دیمءِ داشت کت نہ کن ئے۔
زاکر جان کہ پاکستانءِ زندانءَ ھم آئیءِ پکر گُٹگیر کت نہ کنت انچوشکہ سال 2006 ءَ پاکستانءِ زندانءِ در آھگءَ پد ھم آ بلوچ راجی آجوئیءِ جنز ءِ بیرک دار جوڑ بوت۔ پاکستانی اِستان ترسءِ آماچ بوت کہ زاکر ءِ پیم اِیں ورنا کہ آھانی پکری رھشونیءَ کتاب کنگءَ انت، آھانی علمی بالاد بلوچ ورنا آنی زھن سازیءَ کنگءَ اِنت ،بلوچ ورنا آنءَ خیربخشءِ پکرءِ سنگتاں گوں ھمکوپگ بوگءِ شونءَ دیگءَ اِنت۔
سال2006 ءَ وھدے کہ بی ایس اوءِ کلیں بھرانی یک یکجھتی یے ٹہ اِت تاں زاکر جان اے وھدءَ بی ایس اوءِ سیکٹری جنرل گچین کنگ بوت۔ 2006 ءَ پد بی ایس او ءَ بلوچ راجی آجوئیءِ جنزءِ توار بلوچءِ گس گس ءُ میتگ میتگاں سر کت۔ زاکر جانءِ توار بلوچ راجی آجوئی جنزءِ زورمندیں توارے اَت، چئیرمین بشیر ، زاکر جان، شہید سنگت سناء ، شہید آغا عابد شاہ ءُ ایدگہ سنگتاں بلوچ نودربرانءَ یک نوکیں راھے شون دات۔ بلوچ ورنا آنی پکری راہ گیش اِینت ءُ آھانءَ راجی آجوئیءِ جنزءَ ھوار کت۔
زاکر جان 2008ءَ بی ایس اوءِ کمک کماش (وائس چئیرمین) گچین کنگ بوت ءُ بلوچ نودربرانی رھشونیءِ بیرک ئِے مھمکیءَ گوں برجاہ داشت۔
چہ ایش ءُ پد پدا کیت انت ھما بد بکتیں سال کہ آ بلوچ راجی آجوئی جنزءَ یک مزنیں تاوانے دنت ، بلوچءِ رھشون چئیرمین غلام محمد گوں وتی سنگتاں ھمے سالءِ اپریلءِ ماہءَ شہید کنگ بیت۔ جونءِ ماہءِ ھشت تاریخءَ زاکر جان آوار جنگ ءُ زندانی کنگ بیت۔ ءُ زاکرجانءَ پد ھمے ماہءِ 28 جونءَ بلوچ نیشنل مومنٹءِ رھشون ڈاکٹر دین جان ھم آوار جنگ ءُ زور گریں استانءِ بندی جاھاں بندیگ کنگ بیت ۔ ستمبرءِ ماہءَ شہید رسول بکش مینگلءِ زانگولیں جون دست کپ ایت ءُ چہ خضدارءَ ورنا ایں مشتاق ، کبیر ءُ عطاء اللہ آوار جنگ بنت ۔ ھمے سالءَ بے کساسیں بلوچ ورنا ےءِ آوار جنگ بندات کنگ بیت ایشاں چہ پد کیت انت ھمے سالءِ گڑی ماہ کہ 7دسمبرءَ زاکرجانءِ پکری سنگت ،شہید سنگت ثنا ھم آوار جنگ بیت کہ سئے سالاں پد آئیءِ تیر آماچیں جون چہ کیچءَ دست کپ ایت۔
زاکر جانءِ بیگواھیءَ پد یکشلءَ بلوچ ورنا آنی بیگواہ کنگ بندات کنگ بیت ءُ پدا ھمے بیگواھیں ورنا ءُ پیر ءُ کماشانی زانگولیں جون کور ،کوہ ءُ گیاباناں دست کپگ بندات بیت ءُ پدا شھر بے توار بنت ءُ کوہ آباد بوان بنت۔
ھمے بیگواھیءِ ردءَ زاکر جانءِ پکری سنگت شھید کمبر چاکر دو رندئے زندانیءَ پد آئیءِ تیر سُمبیں جون ماں پنچ جنوری 2011 ءَ زمینءِ باھوٹ کنگ بیت ءُ زاکر جانءِ ھمکوپگیں سنگت کماش زاھد بلوچ شش سال انت کہ چو زاکر جانءِ پیمءَ پاکستانءِ زندان آنی باھوٹ انت۔
زاکر جان ھما دمک ءُ دراں کہ سیاسی جنزءِ رھشونی کتگ مرچی ھما دمک ءُ در زاکر جانءِ پیمءَ بندیگ انت۔ نیوکاہان کہ بلوچ راجی آجوئی جنزءِ چیدگ انت کہ اودءَ شہدائے بلوچستانءِ مانشگاھے آباد انت۔ بلوچءِ پکرءِ بنشون واجہ خیربخشءِ مانش ھم اودءَ لشکرءَ وتی انگیرءَ کتگ ۔زاکر جانءِ وانگجاہ بلوچستان یونیورسٹی ھم وانگجاہءَ چہ مٹ بوتگ ءُ یک لشکری بُنجلے جوڑ بوتگ۔
زاکر کہ مرچی یازدہ سال سرجم انت کہ آ زندانی انت ءُ بلوچءِ سیاستءَ ابیدءِ زاکرءَ مرچی یازدہ سال سرجم کت۔ ایش یازدھیں سالانی تہءَ زاکر جانءِ بازیں سنگت زندانی کنگ بوتگ۔ باز شھید کنگ ءُ بازینے چہ زمینءَ درانڈیھ کنگ بوتگ۔ پشت کپتگیں زاکرجانءِ پکری سنگت اَنت کہ آئیءِ لیکہءِ بنیاتءَ، وتی زمینءَ نشتگ انت ءُ دیمءَ جنزان انت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔