بلوچستان ءَ ھوار کراچی ءَ ڈنک ویل ءِ ھلاپ ءَ زھرشانی

بلوچستان ءَ ھوار کراچی ءَ ڈنک ویل ءِ ھلاپ ءَ زھرشانی

دی بلوچستان پوسٹ

سر بیتگیں ھالانی رد ءَ گوستگیں روچ ءَ کراچی ءَ ڈنک ویل ءِ ھلاپ ءَ زھرشانی کنگ بیتگ –

زھرشانی کنوکاں کراچی پریس کلب ءِ دیم ءَ اوگام جتگ ءُ سرکار ءَ چَہ لوٹ کرتگ ءُ گْوشتگ کہ ڈنک ویل ءَ ھوار سرجمیں بلوچستان ءَ لوکل ڈیتھ اسکواڈ ءَ ھلاس بہ کنت –

اوگام جنوکاں گْوشت کہ سرکار ءِ چیر دستی ءَ داشتگیں ڈیتھ اسکواڈ ءَ سرجمیں بلوچستان وتی لپیٹ ءَ زرتگ ءُ اود ءَ جھمنندیں مردمانی زندگی رژنائیں روچے ءَ مٹ کرتگ ءُ تھاریں شپے کرتگ –

آیاں گْوشت کہ بیست ءُ پنچ مئی ءُ بیست شش مئی ءِ میانی شپ ءَ بلوچستان ءِ مزنیں شھراں چَہ ھواریں تربت ءِ ھند ڈنک ءَ ڈیتھ اسکواڈ ءِ کارمنداں یک لوگے ءَ دور کرتگ ءُ اود ءَ ملکناز نامیں زالبولے شھید کرتگ ءُ آئی ءِ چار سالی ئیں زھگ برمش زدگ کرتگ کہ آئی ءِ درمانی کراچی ءَ بیگ ءَ اِنت –

مردمانی ترندیں اوگام ءُ جاکانی پُشدر ءَ سرکار ءَ ڈنک ویل ءَ دزمانجیں مجرم گپتگ اَنت بلے تنی وھدی زھرشانیانی لڑ ایرموش نہ بوتگ اَنت –

بلوچستان ءِ کُنڈ کنڈ ءَ زھرشانی یکشل ءَ بیگ ءَ اَنت زھرشانی کنوکانی یکیں اوگام ءُ گپ اِنت کہ بلوچستان ءَ ھواریں ڈیتھ اسکواڈ کہ وزیر ءُ گزیرانی ھم شوری ءَ سرکار ءَ داشتگ اَنت ءُ لس مھلوک ءِ سر ءَ زوراکیانی ھواری ءَ مردمانی ننگ ءُ ناموس ءَ پُلگ ءَ اَنت –

ھمے وڑ ءَ گوستگیں روچ ءَ بلوچستان ءِ دمگ ماشکیل ءَ ھم ڈنک ءِ ویل ءِ ھلاپ ءَ زھرشانی بیتگ ءُ پریس کلب ءِ دیم ءَ مردمانی لوٹ کرتگ ءُ گْوشتگ کہ ڈنک ءِ ویل ءَ دزمانجنیں مردم دزگیر کنگ بہ بنت –

بلوچستان ءَ جتائیں جاھاں سر بیتگیں ھالانی رد ءَ گوستگیں روچ ءَ آواران ءَ ھم ڈنک ءِ ویل ءِ ھلاپ ءَ زھرشانی کنگ بیتگ –

ھمے وڑ ءَ مروچی مند ءَ ڈنک ویل ءِ ھلاپ ءَ چاگردی باسک ابداللہ میر ءُ کپٹن ادھم ءِ سروکی ءَ یک زھرشانی ءِ بندات بیتگ ءُ زھرشانی روانک ءِ دروشم ءَ بازار ءِ دگانی سر ءَ گوزان بیتگ ءُ گڈ سر ءَ روانک ءَ ھواریں مردماں گْوشت کہ ڈنک ءَ زدگ بیتگیں برمش ءُ آئی ءِ مات ملکناز ءِ کشندہ دزگیر کنگ ءُ پاھو دیگ بہ بنت ءُ بلوچستان ءَ برجاھیں ڈیتھ اسکواڈانی توپک پچگرگ ءُ زندانی کنگ بہ بنت –

ھمے وڑ ءَ دالبندین ءَ ھم ڈنک ویل ءِ ھلاپ ءَ زھرشانی کنگ بیتگ ءُ زھرشانی روانک ھدارھیم میتگ ءَ چَہ بندات بیتگ ءُ دیم پہ پریس کلب ءِ نیمگ ءَ روان بیتگ بلے پولیس ءَ راھے نیم گور ءَ روانک داشتگ ءُ جھانی نادراھی ءِ ترس ءِ اُزر پیش کرتگ ءُ روانک ءَ ھواریں مردم نیشتگ ءُ پریس کلب ءَ داں روانک سر نہ بیتگ –

ڈنک ویل ءَ پد بلوچستان ءِ سیاسی ءُ لس مردمانی نیمگ ءَ مھلوک ءِ برانز گپتگیں آس تنی وھدی برجاہ اِنت جتائیں ھالانی تہ ءَ گوشگ بیگ ءَ اِنت کہ زھرشانی کنوکاں چیریں ادارہ بیھار ھم دیگ ءَ اَنت –

ھمے وڑ ءَ مروچی بلوچستان ءِ کاروباری شھر ھب ءَ ھم ڈنک ویل ءِ ھلاپ ءَ زھرشانی کنگ بیتگ زھرشانی کنوکاں اوگام جتگ –

نسیر آباد ءَ ھم ڈنک ویل ءِ ھلاپ ءَ مھلوک مُچ بیتگ ءُ زھرشانی اِش کرتگ –

زھرشانیانی درچ یکشل ءَ برجاہ اَنت لس مردمانی نیمگ ءَ گیشیں زھرشانیانی جار پرینگ بیتگ اَنت باند ءَ تمپ ءُ تونسہ شریپ ءَ ھم لس مردمانی نیمگ ءَ ڈنک ویل ءِ ھلاپ ءَ زھرشانی کنگے جار پرینگ بیتگ اَنت –