نبشتانک:ڈاکٹر دین مھمد بلوچ ءِ واھِشت
نبشتہ کار : سرباز وپا
دی بلوچستان پوسٹ
ڈاکٹر دین مھمد بلوچ 1970 ءَ مشکے نلی ءَ واجہ کادر بکش ءِ گِس ءَ ودی بوتگ ۔ وتی بنداتی وانگ ءَ چہ مشکے نلی ءَ بندات کنت ، پد ءَ داں دہ تبک ءَ مشکے گجر ءِ وانگجاہ ءَ وان اِیت ، گیشیں وانگ ءِ ھاتِر ءَ 1993 ءَ کیچ ءَ روت ءُ اتا شاد ڈگری کالج ءَ وتی وانگ ءَ سرجم کنت ءُ یک ڈاکٹرے بیت ۔ ڈاکٹر دین مھمد بلوچ ھما مزنیں نام اِنت کہ بلوچ ءِ ھر زھگ آئی ءَ را گوں مزن نامیں کِرد ءَ زانت ءُ پجّا کار اِیت ۔
بی این ایم 2004 ءَ شھید چیئرمین واجہ گلام مھمد بلوچ ءِ سروکی ءَ چہ بلوچستان نیشنل مومنٹ ءَ بلوچ نیشنل مومنٹ جوڑ بیت ۔ ھمے سیشن ءِ تہ ءَ ڈاکٹر دین مھمد بلوچ گون بیت ۔ ڈاکٹر دین مھمد بلوچ ، بلوچ نیشنل مومنٹ ءِ بنجائی کمیٹّی ءِ باسکے بیت ۔ ڈاکٹر دین مھمد بلوچ وتی زمہ داریاں شرّیں وڑے ءَ پیلو کنت ۔ ڈاکٹر دین مھمد بلوچ یک سکیں بھادریں رھشون ءُ گُشادیں جُھدکارے بیت ، اِلم ءُ زانت ءَ یک دریایے بیت ۔
انچوش کہ من سمّی جان ءِ نبشتانک ءَ گوشدارگ ءَ اِت آں سمّی جان گْوش اِیت من وتی ابّا جان ءِ کیسگ ءِ بٹوا ءِ تہ ءَ لیلا ھالد ءِ اکس دیستگ یک روتاکے ءِ سر ءَ بوتگ ، گُڑا من لیلا ھالد چہ وتی ابا جان ءِ دپ ءَ اِشکُتگ۔ سمّی جان دیمتر ءَ گْوش اِیت منی ابّا جان ءَ من ءَ کلوہ داتگ کہ اے جنگ زانگ نہ بیت ، ھر روچ مئے سنگت دُژمن ءِ دست ءَ چِست کنگ بُوَگ ءَ اَنت ۔ بوت کنت باندا من ھم چست کنگ بِہ بَہ آں ، بلے منی پُشپد ءُ گس ءِ زمہ داری ترا گون اَنت ۔ پمن ترا ءُ منسور جان ءَ ھچ پَرک نیست ۔
ڈاکٹر دین مھمد بلوچ ءِ یک واھِشتے ھمے بوتگ بلوچ جھد ءِ تہ ءَ منی جنک لیلا ھالد ءِ کردار ءَ پورا بِہ کن اَنت ، بلوچ راجی جنز ءِ تہ ءَ بلوچ زالبولانی شرّیں کردارے بہ بیت ۔ لیلا ھالد ءِ پجّار ، 1944 ءَ پلستین ءَ لیلا ھالد ودی بوتگ ۔ پلستین ءِ تہ ءَ اسرائیل ءِ ھِلاپ ءَ جھُد بندات بیت ۔ چہ کسانی ءَ لیلا ھالد پلستین ءِ جھد آجوئی ءِ یک جھدکارے بیت ۔ لیلا ھالد پلستین لبریشن پرنٹ ءِ سرمچارے بیت ، 1969 ءَ داں 1971 ءَ چار اسرائیلی جھاز آوار جنت ۔ اولی جھاز ءَ 29 اگست 1969 ءَ آوار جنت جھاز چہ اٹلی ءِ پاد کیت دیم پہ اسرائیل ءَ روگ ءَ بیت ۔ لیلا ھالد ءُ مول ءُ مراد ھمیش بیت من وتی جھد ءِ درگت ءَ دُگنیا ءَ را سرپد بِہ کن آں ۔ چہ لیلا ھالد ءِ جُھد ءَ سرجمیں دُگنیا سرپد بیت ۔ مرچی دگنیا ءِ جُنز ءِ تہ ءَ لیلا ھالد ءِ نام پہ بھادری ءُ شیرزالی گِرگ بیت ۔
واجہ ڈاکٹر دین مھمد بلوچ ءِ واھِشت بلوچ راجی آجوئی اَت کہ آئی ءَ وتی جھد بندات کُتگ اَت ۔ بلے اے ھم گپ ءَ سرپد اَت کہ من روچے نہ روچے الم دُژمن ءِ دست ءَ چِست کنگ ءُ گار ءُ بیگواہ ، شھید کنگ بَہ آں ، بلے وتی زھگاں ھم پہ جُھد ءِ ھاتر ءَ تیار کنت ۔ ڈاکٹر دین مھمد بلوچ ءِ واھِشت ھمیش بیت منی جنک لیلا ھالد ءِ وڑیں کردارے پیلو بِہ کن اَنت ۔ بلوچ ءِ توار ءَ دُگنیا ءِ ھر دمک ءَ سر بِہ کن اَنت ۔ 28 جون 2009 ءَ چہ ھُزدار ءِ دمگ اُورناچ ءَ ڈاکٹر دین مھمد بلوچ چِست کنگ بیت ۔ سمّی جان ءَ وتی پِت ءِ ھما گپ یات کیت ءُ وتی گْوھار مھلب جان ءَ زور اِیت وتی جُھد ءَ بندات کنت
2013 ءَ بلوچ مسنگ پرسن لانگ مارچ ءِ جار ءَ جنت ۔ ماما کدیر گوں بانک پرزانہ مجید ءَ ھوار کسانیں سالیں الی ھیدر بلوچ ءُ آئی گْوھار سمینہ بلوچ ، بی بی گل بلوچ ، سبا بلوچ ، ھمے وڑ ءَ سمّی جان گوں وتی گْوھار مھلب جان ءَ ھمے لانگ مارچ ءَ ھمراہ بیت ۔ سرجمیں دُگینا ءَ ھمے کلوہ ءَ دے اَنت کہ بلوچ راج ءَ گوں زُوراکی بُوَگ ءَ اِنت ۔ اے ھمے گْوھار بی بی گل بلوچ ، پرزانہ مجید ، سمّی دین جان ، مھلب دین جان ، ھمے بانکیں گْوھارانی ءُ کماش ماما کدیر بلوچ ، نسراللہ بلوچ ، الی ھیدر ، ءِ جھد ءِ برکت اِنت کہ بلوچ مسنگ پرسن گل یک شریں کردارے پیلو کنگ ءَ اِنت ۔
سمّی جان ءُ مھلب جان ڈاکٹر دین مھمدبلوچ ءِ واھِشت ءِ پد ءَ وتی جھد برجم داشتگ ۔ ھمے جھد ءِ برورد اِنت ۔ بلوچ مسنگ پرسن ءَ ھوران بلوچ ، گْوھار سیما بلوچ ، زرینہ بلوچ ، انسہ بلوچ ، مھرنگ ءُ زبیدہ بلوچ ءُ بازیں ماس ءُ گْوھار کیت بلوچ مسنگ پرسن جُھد ءَ ھوار بیت ۔ چہ بلوچ مسنگ پرسن ءِ اے جھد ءَ لھتیں گار ءُ بیگواھیں بلوچ پُسّگ چہ بندیگجاھاں آجو بیت۔ ڈاکٹر دین جان ءِ واھِشت سمّی جان ءُ مھلب جان ءَ انگت داشتگ ءُ دیم ءَ جنزاں اَنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔