هانی تئی ودار ءَ نشتگ
نمدی یے پہ بیگواھیں نسیم جان ءِ نام ءَ
نبشہ کار: زھیر بلوچ
دراه ءُ سلامت بات ئے نسیم جان ،زوت چہ اهد ءِ یزیدانی دست ءَ آجو بات ئے ءُ پہ سلامتی واتر بات ئے.
بہ گند ئے تو همیں جیڑگ ءَ ئے کہ اے کے انت ترا نمدی یے نبشتہ کتگ ئِے. من اوں ترا پیسر ءَ ندیستگ بس هما روچ ءَ چہ ترا زاناں کہ تو آوار جنگ ءُ بیگواه کنگ بوتگ ئے.
بلے تو بس انچو بزان کہ تئی یک بیوسیں براتے کہ ترا یات کنگ ءَ انت تئی یک انچیں براتے کہ همک روچ آئی ءِ تنگوهیں برات چو تئی وڑ ءَ بیگواه کنگ بوگ ءَ انت، همک روچ آئی ءِ براتانی ٹپ ءُ ٹوریگیں لاش دست کپگ ءَ انت…. همک روچ آئی ءِ مات ءُ گهارانی ازت لگتمال کنگ بوگ ءَ انت ءُ مات ءُ گهار زندانیگ کنگ بوگ ءَ انت. بلے آ پہ بیوسی نہ دست رسی نشتگ لگوریں چماں ارس گوار ایت.
نسیم جان ….. تئی بیگواھی ءَ سالے پِرگوستگ من بس ترا همنچو گُشگ لوٹاں تئی هانی تئی ودار ءَ نشتگ. هانی تئی شوهاز ءَ شهر ءِ ریٹائیں دمک ءُ کشکاں چو دیوانگ ءَ گردیت. هانی ءَ تئی اکس ماں امبازاں زرتگ اے بے ریائیں جنگل ءَ هون واریں رسترانی درا ٹک ایت.
هانی برے شال ءُ برے کراچی ءَ پریس کلبانی دیم ءَ نشتگ تئی شوهاز ءِ هاتر ءَ زهرشانی کنگ ءَ انت. بلے اے گُنگدامیں جنگل ءِ اے هون واریں رسترانی بنُجل انت اے هچ نہ گند اَنت اے هچ نہ مار اَنت اے چم نہ دید ءُ گُنگ زبانیں اکس انت. اے هانی ءِ ریتکگیں ارساں نہ گند انت بلے هانی انگت چو باتیل ءَ مک انت تئی شوهاز ءَ زوراکانی دیم ءَ.
ما بلوچ راجدپتر ءَ هانی ءُ شے مرید ءِ کسہ اشکتگ بلے مرچی بیست ءُ یکمی کرن ءَ هانی ءُ شَے مرید ءِ کسہ منی چمانی دیم ءَ گندگ بوگ ءَ انت.
انچو کہ زوراکیں چاکر ءَ پہ لُچی ءُ لگوزی شے مرید ءِ هانی پل اِتگ ….
همیں وڑ ءَ اے اهد ءِ زوراکاں هانی ءَ چہ آئی ءِ نسیم پل اِتگ
انچو کہ شے مرید وتی هانی ءِ ودار ءَ جنگل پہ جنگل ، کوه ءُ گیابان چو گنوک ءَ تر اِتگ.
همیں وڑ ءَ تئی هانی تئی ودار ءَ شهر ءُ بازاراں میتگ ءُ کشکاں دمک ءُ دراں چو دیوانگ ءَ تئی شوهاز ءَ گرد اِیت.
نسیم جان …. .. اِد ءَ جاور انچوش انت کہ همک روچ چو تئی وڑ ءَ بلوچ نودربر ءُ ورنا آوار جنگ ءُ بیگواه کنگ بوگ ءَ انت. مردم گوں همروچیگیں جاوراں دلگوش ءُ ترس ءِ آماچ انت بہ گندئے ترا باز یات مکن انت بلے……. تئی هانی همک روچ ترا یات کنت پہ تو ارس شل ایت تئی ودار ءِ درچک ءَ وتی ارواه ءِ پیژگاه ءَ آپ دنت ءُ آئی ءَ گیمرگ ءَ نیل اِیت.
همیں زوراکاں کہ ترا بیگواه کتگ همک روچ تئی هانی ءَ پادتراپ دے انت بیھار دے اَنت کہ هچ مہ گْوش گُنگ بہ بو اگاں نہ ترا پد ءَ بیگواه کن اِیں ترا کُش اِیں …..
بلے تئی هانی پد نہ کنزاتگ تئی هانی نزور نہ بوتگ تئی هانی نہ پرشتگ تئی هانی ….. انگت چو باتیل ءِ کوه ءَ مهکم انت گوں وتی توکل ءَ اهد ءِ زوراکانی دیم ءَ چو شیرزال ءَ اوشتاتگ تئی شوهاز ءِ هاتر ءَ ۔
نسیم جان گپ و باز انت نزاناں تو انوں کجام جاورانی دیمپان ئے بدواه ءِ زندان ءَ بلے بس همنچو ترا گُشگ لوٹاں کہ ………. هانی تئی ودار ءَ نشتگ.
تو زوت واتر بات ئے آجو بات ئے سلامتی پہ وتی هانی ءَ.
سلامت بات ئے.
تئی دوزواھیں برات زھیر بلوچ
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔