نبشتانک: پیروز تو سک یات پیداک ئے
نبشتہ کار: شھزاد شاہ
دی بلوچستان پوسٹ
چو اناگت ءَ ترا زوراکاں آوار جت۔بے تو ھِچ وش بیگءَ نہ اِنت۔ترا نی یک سالے سرجم بیتگ۔نی بیا واتر کن کہ بے تو دراھیں شال ءُ دیدگیں پنجگور ابیتک اِنت ۔بیا کہ بے تو دراھیں میتگ پُرسیگ بیتگ۔باریں تو چون ئے جگر۔اُپ پیروز جان یک کندگے بس نبشتہ بکن روان دے۔کمو آرام باں۔
من کدی زندان نہ دستگ۔ باریں زندان ءَ تو چون زندگ ئے ۔تئی ساہ سلامت بات۔میتگ ءِ مردُم ھرروچ تئی جُست ءَ کن اَنت کہ پیروز ءِ ھال نیست؟ بلے من آواناں چوں سرپد بکن آں کہ پیروز انچیں جاھے شُتگ کہ باریں چہ ھود ءَ واتر کنگ بیگ بیت یا نہ بیت۔
تو بیا کہ مات سک بزگ اِنت ۔نہ نان وارت نہ کہ آپ۔دراھیں روچ نشتگ ءُ گریت۔مات انچو پریشان اِنت۔آئی ءِ جان ءِ آپ ھلاس بیتگ۔گوں مردُماں نند ءُ نیاد نہ کنت۔لھتیں روچ اِنت وَ ایوک ءَ نشتگ تھنا جیڑ ایت۔
تئی دراھیں یات پیداکنت ۔من دراھیں اکساں روچے دہ رند ءَ سر ءَ تاں آھر ءَ چاراں۔
من نزانان باریں ترا ھال بدیاں۔یانکہ نا۔بلے ھال دیاں ۔چی ءَ کہ تو چد ءُ گیشتر ازاب دیستگ۔
زی مات ءَ تئی دراھیں کتاب سُتکگ اَنت۔ھما کتاب کہ تو وتی بگل ءَ داشتگ اَنت ۔زی ھما کتاب سوچگ بیتگ اَنت ھما کتاباں کہ ترا سر ءُ سوج کُتگ ، رھشونی کُتگ، زند ءِ مول ءُ مراد سرپد کنائینتگ۔زی ھما کتاب سُتکگ اَنت ۔ھما مات ءَ کہ ترا ھر روچ پہ وانگ جاہ ءَ روگ ءِ ھاتر ءَ لَٹ ءُچوپ کُتگ ، کتابانی بستہ تئی کوپگ ءَ داتگ ءُ دست بڈّ ءَ جتگ کہ برو منی کوپگ برو بوان کہ بید ء چہ وانگ ءَ دگہ ھِچ نیست۔زی ھمے ماتءَ تئی کتاب سُتکگ اَنت۔
من زان آں کہ آئی ءَ کجام دل ءَ گوں تئی کتاب ستکگ اَنت ۔بس مات ءِ دل کہ پاھار کنت آئی ءِ میم نزور بیت۔بس چے کن ئے مات ءِ انچیں مھرے۔
پیش ءَ ھر روچ شُتگ سھب ءَ بگر تانکہ بیگاہ ءَ تئی کتابانی دیم ءَ نشتگ ءُ زھیروک جتگ ئِے ۔بلے زی من چاراں دراھیں کتاب ئِے ڈنّ در کُت اَنت ءُ آس داتگ اَنت ۔من وس کُت کہ تسلی بدیان ئِے ۔بلے آ سک گریوگ ءَ اَت ءُ گُشگ ءَ اَت کہ ھمے کتابانی سُنت ءَ پیروز جان برگ بیتگ۔
تو وت بچار پہ کتابانی وانگ ءَ مردُم زندان ءَ بہ روت۔زلم ءُ زوراکی وتی آسری سیمسراں رس اتگ۔۔
من مات ءَ سھڑین آں ۔بلے تو زوت بیا کہ چد ءُ پد مات بلکیں دگنیا ءَ یل بدنت۔زوت بیا جگرو ۔زوت بیا۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔