ھون واریں رستر
نبشتہ کار:گنی ھیات
انچیں وھد ءَ انسان ءَ وتی سَر ءَ وت بَد کیت کہ من پرچا زندگ آں، اے زندمان انچوش نز اتکگ کہ باتن ءَ نہ وشّی بیت ءُ شزاری ءَ دگنیا تھار دیم اَنت۔۔
چہ رستریں انسانانی زُلم ءُ زوراکیاں اوپار ءِ گرنچ بستگیں دراھیں گُک پرّیچ بیان کن اَنت۔
زَھر ھونانی دْروشم ءَ سرگ ءِ مازگانی تہ ءَ ایریچان کن اَنت اے وھد ءَ زندگی ءِ تہ ءَ انچیں سَھتے کیت کہ انسان اے جاگہ ءَ سک بے وس بیت ھچ کت ھم نہ کنت۔
بِلے ھمے پگرانی تہ ءَ ساڑی ئیں سُھر ءُ سیاھیں ھونانی لکیرانی میان ءَ ھمے پرک ءَ گندئے کہ ھیالانی ابیتکیں چیدگاں چار ایت تاں گندگ ءَ کیت کہ زندے گیشگ ءُ ماگیشگ ءَ ھرچ دورے چندیں رستریں انسانانی مجگ ءِ تہ ءَ ھون واری ھست اِنت۔
چار پادیں۔ رستر انچوک ھون وار نہ اَنت مروچاں۔
چار پادیں ۔ستر یک شکار ءِ کنت وتی شد و گُژن ءِ ھاتر ءَ۔
بلے اے مزھبی ھون واریں رسترانی آس گواریں چم ھون واریں دپ شُدیکیں ارواہ جون واریں نیش مدام شوھازیک انت کہ بنی آدمانی ھونانی تِنگگ ءُ گُلاٹگ ءَ ھرچ کُج ءَ مُچی بیت مزھبی ھون وارانی چمّانی ڈیک ءَ کیت اے رستر گون وتی وتکُشّیں تراک ءُ شورھان وت ءَ ھما جاگہ ءَ ساڑی کن اَنت کہ آیاں مدام شوھازیگ انت کجا نہ کجا بہ گند انت
کسانیں زھگے ،جنین آدمی اے تیوکیں آیانی شدیگیں ارواہ ءَ آس مان شانتگ چار کونڈاں۔
جون ءِ سر ءَ جون کن اَنت اے وھد ءَ ھر کس بے سما ھر کس بے گمان بیت اے آس کہ جمبور انت کہ ھمک نیمگ ءَ آیانی نیش سک انت ڈلگ ءُ ریچگ انت کہ کسی ھاتر ءَ اوں گٹ نہ بنت
اے میان ءَ ھرچی کُت کنت بہ کنت۔
بِلے آیانی بستار ڈالچار اِنت۔
ھمے ھاتر ءَ کہ آ شَرّیں انسانانی تہ ءَ جتا اَنت
مُرت گڑا اے دگنیا ءَ چہ آئی ءِ کِسّہ ھلاس بیت ۔
آئی ءِ جسم ءِ ھمراھی ءَ آئی ءِ راستی ءِ وجود ھم ھلاس بیت ـ
بلے انچیں وھد ءَ ھمے ھیال کہ مجگ ءَ کیت گڑا سک نہ تاھیر باں لھتے واجہ ھمے پگر ءُ ھیال کنت کہ شما مئے ایمانداریں ءُ دینی بْراتاں چمّا سِندگ ءُ جتا کنگ لوٹ اِت۔
اے مئے ایمان دار ءُ مزھبی بْرات اَنت،اے ھما واجھانی گپ اَنت کہ چہ ایدگراں وت ءَ پکاتِریں ایماندار کن اَنت۔
اے ھون واریں شُدیکیں رستر ھم ایماندار اَنت؟
گڑا شما پرچا چُش شُدیگیں رستر اِت؟
بنی آدمانی سر ءَ تْرند ءُ دْرشک اِت؟
وت ءَ پکاتِریں ایماندار کن اَنت؟
گڑا شما پرچا مان شانتگ چار کونڈاں بنی آدمانی جونانی سر ءَ جون کن اِت؟
جون واریں ستر ۔۔۔۔۔۔۔۔۔۔۔۔۔۔۔۔۔۔۔۔۔
برو ھما برات ءِ ھال ءَ ھم بگر کہ آئی ءِ یکیں گھارُک اولی زھگ ءِ چیلگّی ءِ وھد ءَ تئی ھمے رستراں وتکُشّیں تراکانی ھوری ءَ تئی رستراں کُشتگ۔
ھون واریں رستر۔۔۔۔۔۔۔۔۔۔۔۔۔۔۔۔۔۔۔۔۔۔۔
ایشی ءِ پسو ءَ برو ترا ھما مات دنت کہ آئی ءِ کسانوکیں زھگ تئی مسلمانیں بْراتاں گوں وتکُشّیں تراکانی ھوری ءَ کُشتگ۔
مزھبی شُدیکیں رستر۔۔۔۔۔۔۔۔۔۔۔۔۔۔۔
چم ءِ دیم ءَ ھما جنوزام ءِ بلُّک ءِ ھیال ھم بگر کہ آئی ءِ کسانوکیں نماسگ چہ آئی مات ءَ جتا کُتگ
تئی رستریں ھون واران بنی آدمانی زند ویران کُتگ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔