ھرنائی: راہ بستگی ءَ جاڑیگیں لشکریانی سر ءَ سلاہ بنداں اُرش کرتگ

سلاہ بندیں مردماں راہ بستگی ءَ اوشتوکیں کارندہ نشانگ کرتگ اَنت –

ٹی بی پی ءَ رس اِتگیں ھالانی رد ءَ ھرنائی ءِ کوھی دمگ شاھرگ ءِ ھند کھوسٹ ءَ گوستگیں شپ ءَ ناشناسیں سلاہ بندیں مردماں پاکستانی لشکر ءِ کارندہ نشانگ کرتگ اَنت –

دمگی مردمانی رد ءَ لشکر ءِ کارندہ ھما وھد ءَ نشانگ کنگ بیتگ اَنت کہ آیاں مردمانی پَٹ ءُ پولی ءِ نیمون ءَ دمگ ءِ راہ ءخ دربستگ اَنت-

اُرش ءَ پد اُرشکار تکگ اَنت ءُ وھدیکہ لشکر ءِ کارندھانی بیرانیانی گمان اِنت بلے تنی وھدی سرکار ءِ نیمگ ءَ ھچ گوشگ نہ بیتگ –

ایشی ءَ چَہ پیسر گوستگیں روچ ءَ پاکستانی لشکر ءِ نیمگ ءَ ھرنائی ءِ دمگ شاھرگ ءِ ھند مشدری ءَ پاکستانی لشکر ءِ نیمگ ءَ لشکر کُشی بیتگ –

لشکر کشی ءَ بمبگواریں بالگرداں ھم بھر زُرتگ ءُ مشدری ءِ بازیں جاھاں تیرگواری کرتگ –

دمگی مردمانی رد ءَ مالدارانی گدان ھم سوتکگ اَنت ءُ گوشگ بیگ ءَ اِنت کہ اے مالدار پیسر ءَ ھم دگہ دمگے ءَ لڈ ءُ بارے کرتگ –

لشکر کشی ءِ وھد ءَ دگہ دزگیری نہ بیتگ ءُ لشکریانی نیمگ ءَ ھم لشکر کشی ءِ بارو ءَ دگہ گوشگ نہ بیتگ –

زانگ بہ بیت شاھرگ ءُ ھرنائی ءِ دگہ دمگاں بلوچ سلاہ بندیں گلانی نیمگ ءَ پاکستانی لشکر ءُ لشکر ءِ پلامرزی کنوک نشانگ کنگ بیگ ءَ اَنت اے اُرشاں لشکر ءَ بازیں کچے ءَ جانی ءُ مالی تاوانانی دیمپانی بیتگ –

شاھرگ ءِ دمگ مشدری ستمبر دوھزار ءُ ھژدہ ءَ پاکستانی لشکر ءِ یک بنجلے ءِ سر ءَ سلاہ بندیں مردمانی اُرش کنگ ءَ پد آیاں گپتگ اَت کہ آئی ءِ زمہ واری بلوچ لبریشن آرمی ءِ جارکش جیئند بلوچ ءَ منّ اِتگ اَت اُرش ءَ چار کارندہ مرتگ اَت –

بی ایل اے ءِ تندجاہ “ھکل ” ءَ شش اکتوبر دوھزار ءُ ھژدہ ءَ ھمے اُرش ءِ تامر شنگ کرتگ اَت کہ چاگردی رسانک جاھاں گندگ بیتگ اَت