بلوچ راج ءِ رَدی
نبشتہ کار: مھرین بلوچ
دی بلوچستان پوسٹ
دُنیا ءِ گْوستانک ءَ وان ئے گُڑا سرپد بَہ ئے کہ تھنا بلوچ راجی آشوب ءُ آجوئی ءِ جنگ اِنت کہ آئی ءِ تہ ءَ زُبان دوستی ءِ ھاٹیگ نیست۔ ما منّ ایں کہ ماں اسکول، کالج ءُ کارجاھاں ھِندی ءُ پارسی ءِ وانگ، نبیسّگ ءُ کارمرز کنگ مئے راج ءِ یک بے وسی ءُ مجبوری یے بلے وتی دزھُورکی وھد ءُ ماں شوشل میڈیا ءَ وتی کلوہ ءُ پوسٹاں ماں ھِندی ءَ نبیسّگ مئے مجبوری یے وَ نہ اِنت بلکیں ماں پیسبوک، وٹس ایپ ءُ دِگہ شوشل میڈیا ءِ پتر ءَ دری زُباناں نبیسّگ ءُ پوسٹ کنگ مئے مجگی گُلامی ءِ یک ٹوھیں نشانی یے۔ گِند ئے مرچاں ٹیکنولوجی ءِ زمانگ اِنت، موبائل ءُ انٹرنٹ ءِ وڑیں آسراتیانی سبب ءَ دُنیا باز تیز اِنت ءُ تیزی ءَ دیمروی ھم کنگ ءَ اِنت۔ دُنیا ءِ ھر کُنڈ ءَ پیسوک، وٹس ایپ، یوٹیوب ءُ انسٹاگرام ءِ وڑیں پتراں ھر راج ءِ وانِندہ وتی جِند ءِ زُبان ءَ پوسٹ ءُ کلوھاں نبشتہ کن اَنت بلے مئے بلوچ راج ءِ رَدکپتگیں وانِندہ وتی دزھُورکی ءُ بے سرکاری ئیں وھد ءَ ھم پارسی ءُ ھِندی ءَ نبشتہ کن اَنت۔
گِند ئے یک راجدوست ءُ زُبان دوستیں بلوچے وتی دزھُورکی ءِ وھد ءَ شوشل میڈیائی پوسٹاں ماں وتی جِند ءِ زُبان ءَ نبشتہ بہ کنت۔ بلے ما گِندگ ءَ ایں کہ ماں شوشل میڈیا ءَ مئے بازیں بلوچ بانُکاریں ٹِک ٹاک اسٹار، وتگڑیں راجی ازمکار ءُ جاھلیں وانِندہ پیسبوک، وٹس ایپ ءُ انسٹاگرام ءَ وتی پوسٹاں اردو ءُ پارسی ءَ نبشتہ کن اَنت۔ انی اے وڑیں مردماں کَے سرپد بہ کنت کہ اے انٹرنٹ ءُ موبائل ءِ آسراتی تھنا پہ بلوچ ءَ نہ اِنت، اے پیسبوک ءُ دِگہ شوشل میڈیا ءِ ایپزاں دُنیا ءِ دِگہ راج ءِ وانِندہ ھم کارمرز کنگ ءَ اَنت۔ ھمے روسی، چینی، اربی، ھندی ءُ بنگالی ءِ وڑیں دنیا ءِ دگہ بازیں راجے ھست کہ شوشل میڈیا ءَ وتی جِند ءِ زُبان ءَ کارمرز کن اَنت۔ گُڑا باید اِنت بلوچ راج ھم وتی شوشل میڈیا ءَ وتی جِند ءِ زبان ءَ بوان ایت ءُ نبشتہ بکنت۔ ما یک گپے تچک ءَ گْوش ایں کہ انگریزی ءَ بوان اِت پرچا کہ مرچیگیں ڈیجیٹل زمانگ ءَ تھنا ھما راج دیمروی کن اَنت وھدیکہ آ راج انگریزی ءَ گیشتر دلگوش بہ کن اَنت ءُ زبر بنت۔ مرچاں میڈیکل سائینس، انجینئرنگ ءُ ٹیکنولوجی دْراہ گوں انگریزی ءَ ھمگرنچ اَنت، کارجاہ ءُ کارگِسی زُبان ھم انگریزی اِنت، انگریزی یک میان اُستمانی زُبانے پمیشکا تھنا ھما راج دیمروی کن اَنت وھدیکہ آ راج اول وتی جِند ءِ راجی زُبان ءُ دومی انگریزی ءَ بوان اَنت۔ اگاں انگریزی، پارسی ءُ ھِندی ءِ وانگ ءُ نبیسّگ ءَ زبر ئے بلے وتی جِند ءِ راجی زُبان ءَ ونت ءُ نبشتہ کُت نہ کن ئے گُڑا بزان کہ تو ناوانندھے ئے، تو بےسوتیں جاھلے ئے۔
گِند ئے تو وت یک ساھت ءُ دمانے ءَ ھم نہ جیڑ ات کہ من پرچا وتی جند ءِ راجی زُبان ءَ ڈالچار کنان ءَ ھِندی یا پارسی ءَ پوسٹ کنگ ءَ آں۔ تو ھِندی ءِ دْراجیں پوسٹاں نبشتہ کن ئے چہ ایشی ءَ زانگ بیت کہ تو ھِندی ءَ وَ زبر ئے، تو وانِندھیں بلوچے ئے، اگاں ترا وتی راج ءُ راجی زُبان بلوچی دوست بوتیں گُڑا تو مُدام بلوچی ءَ نبشتہ کُتگ اَت۔ چہ تئی بلوچی پوسٹاں تئی رِندگیراں ھم بلوچی وانگ ءُ دربرگ ءِ دلبڈی داتگ اَت کہ بلوچی بوان اِت ءُ نبشتہ بہ کن اِت۔ مرچی دُنیا ءِ ھر ایردستیں راج انٹرنٹ ءِ پیسبوک، وٹس ایپ ءُ یوٹیوب ءِ وڑیں آسراتیاں پہ وتی زُبان ءِ دیمروی ءُ زِندگ دارگ ءِ ھاتر ءَ کارمرز کنگ ءَ اَنت۔ گُڑا باید اِنت شمئے وڑیں راجدوست ءُ زُبان دوست کہ بلوچی ءُ بلوچیت نام ءِ سر ءَ کمائی کنگ ءَ اَنت وتی پوسٹاں بلوچی ءَ بہ دے اَنت۔
گِند ئے ما اِے وَ نہ گْوشگ ءَ ایں کہ شما بلوچ زالبول یا بْرات ٹِک ٹوک ءُ پیسبوک ءَ کارمرز مہ کن اِت، بلوچ راج یک آزات ھیال ءُ راجمستری ءِ منّوکیں راجے کہ آئی ءِ تہ ءَ مردین ءُ زالبول ءِ ھک برابر اِنت بلے مارا وتی راجی زمہ واری بے ھیال نہ کنگی اَنت۔ باید اِنت ما بلوچ ھم دُنیا ءِ دگہ راجانی وڑ ءَ موبائل ءُ انٹرنیٹ ءِ آسراتی ءَ پہ وتی راجی زُبان ءُ راجدوستی ءِ ھاتر ءَ کارمرز بہ کن ایں، پیسبوک ءُ شوشل میڈیا ءَ مُدام بلوچی ءَ پوسٹ بہ کن ایں کہ مئے رَندگیریں بلوچ چہ مئے بلوچی پوسٹاں سان(اسر) بہ زور اَنت ءُ ھرکَس چہ پیسبوک، یوٹیوب ءُ وٹس ایپی وانگجاھاں بلوچی وانگ ءُ دربرگ ءِ جُھد بہ کنت، باید اِنت شُما مُدام یا کدی کدی وتی ٹِک ٹوکی تامُرانی تہ ءَ راج ءَ بلوچی وانگ ءُ دربرگ ءِ پیگام، سکین ءُ دلبڈی ھم بدے اِت کہ راج ءِ تہ ءَ بلوچی وانگ ءُ دربرگ ءِ ھمت ءُ بیسہ ودی بہ بیت۔
گُڑا باید اِنت ما وت ءَ دلپروش ءُ دلگران مہ کن ایں، پْروش مہ ور ایں کہ من وانگجاھاں بلوچی نہ ونتگ پمیشکا انی من ھچ نہ زان آں یا من بلوچی نبیسّگ ءَ سُست آں بلکیں ما وت ءَ راجی زُبان ءِ جُھدکار، ھزمتکار ءُ سرمچار جوڑ بکن ایں گیش ءَ چہ گیش بلوچی وانان بکن ایں۔ گِند ئے راستی وَ ایش اِنت کہ بلوچی کَس ءَ ماں وانگجاھاں نہ ونتگ، ما دْراہ چہ ھمے موبائلاں بلوچی وانگ ءُ دربرگ ءَ ایں۔ اگاں ما دہ یا دوازدہ سال پہ ھِندی ءُ پارسی ءِ دربرگ ءَ دے ایں گُڑا بل اِت کہ یک ماھے پہ بلوچی ءِ دَرونت ءُ زُبان دوستی نبشتانکانی وانگ ءَ ھم ھیل بہ کن ایں۔ گِند ئے شمارا کس نہ گْوش ایت شُما اولی ھپتگ ءَ بلوچی نبشتہ بہ کن اِت۔ اگاں تو بلوچی ءِ کسانیں گالرِداں ونت کن ئے گُڑا اِے ھم گنج اِنت۔
مارا وتی موبائل پہ بلوچی زُبان ءِ دیمروی ءَ کارمرز کنگی اَنت پمیشکا باید اِنت شما ھندی ءُ پارسی نبشتہ کنوک، ٹِک ٹوک ءُ راجی گْوشکندہ اول بلوچی دَرونتاں بوان اِت پرچاکہ راست نبیسّگ ءِ ھیل ءُ سرپدی چہ درَونتانی وانگ ءَ رس ایت۔ مارا اول بلوچی درونت ءُ زبان دوستی نبشتانک وانگی اَنت کہ مئے تہ ءَ پہ بلوچی زُبان ءَ مھر ودی بہ بیت۔ مارا مُدام بلوچی نبشتہ کنگ ءُ وتی ردیانی راست کنگ ءِ جزبہ بہ بیت گُڑا ما دیمروی کن ایں۔
شالا راجی زُبان ءِ جھدکار ءُ ھزمتکار بات اِت، بلوچستان ءُ بلوچی شالا دیمروی بکنات۔ شالا انچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔