بلوچ چاگرد ءَ وتگڑیں جیڑهانی دیم ءَ آرگ
نبشتہ کار: زبرین بلوچ
دی بلوچستان پوسٹ
ایردستیں همک راج چہ وتی بُنُکّی آسراتیاں دور دارگ بیت ءُ کسان کسانیں جیڑھانی دیمپان کنگ بیت. اے واستا نَاں کہ آ نہ کرز ایت بلکیں اے واستا کہ چہ همے چیزاں بُرزتر جیڑ اِت مہ کنت. اے رد ءَ ما گندیں بلوچاں سر سری جیڑهانی تہ ءَ مانگیشینگ ءِ واستا وڑ وڑیں توجیل سازگ بوگ ءَ اِنت- بلوچستان چوش کہ همے پیما ایردستی ءِ مُھکمیں سانکلاں گوں بندوک اِنت، اد ءَ همک روچ نوکیں وئیل ءُ جیڑہ سرا چست کن اَنت آ گار ءُ بیگواھیں مردمانی گیشی بہ بیت یا وتگڑیں کانودی رهبند بہ بنت، بلوچ ءَ همے پندلانی تہ ءَ اڈ ءُ چیل کنگ بوگ ءَ انت-
بد بهتی ایش انت، هدا بزانت پہ زانت یا نزانتکاری، بلوچ وت وتی لَٹّ شاپی ءُ لُٹُ ءُ پُل ءَ وت زورآور ءِ زوراکی ءَ هوار انت آ تری ایڈمنسٹریشن ءِ توکا بلوچ ءِ مزنیں کچے ءَ روَگ بہ بیت (روگ هراب نہ انت بلے روگ ءَ پد بلوچ نہ بوگ جیڑهے) یا ھونواریں سی ٹی ڈی ءِ تہ ءَ مزنیں دروشمے ءَ هواری بہ بیت-
جیڑه ایش انت، ما چیزاں اُرتی ءَ گوں نہ چار ایں اشی یے درور ایش انت، کہ سی ٹی ڈی ءِ لیکہ چون کُجا چہ زورگ بوگ ءَ انت انگریزانی هکمرانی ءِ وهد ءَ انگریزانی کچ هندوستان ءِ آبادی ءِ کساس ءَ کم بیت همے سوب ءَ انگریزانی تنک ٹینک (Think Tank) ءِ باسک رابرٹ گرووز سنڈیمن (1892-1835) وتی شْوربندی ءَ دیم ءَ کار ایت کہ مھلوک ءِ وت ما وت اڑینگ ءِ هاتر ءَ همے زمین ءِ جاھمنندیں مردماں وتی رھبند ءِ بهر جوڑ کنگ اَلمی انت همے درگت ءَ آ لیویز ءِ نام ءَ اداره (Institution) ءِ جوڑ کنت ءُ لس مهلوک ءَ ایشی ءِ تہ ءَ هوار کنت پد ءَ هندوستانی جنگجوانی یا لس مهلوک ءِ سر ءَ زوراکی ءِ وهد ءَ همے مردماں دیم ءَ دار ایت-
همے وڑا ، مئے گْور ءَ، بزاں بلوچستان ءَ، 2015 ءَ کاؤنٹر ٹیرورزم ڈیپارٹمنٹ (CTD) ءِ نام ءَ یک ادارهے دیم ءَ آرگ بیت کہ آ لس مهلوک ءِ گار ءُ بیگواھی، ءُ دروگیں انکاؤنٹرانی (Fake Encounter) تہ ءَ گار ءُ بیگواھیں بلوچاں جنت ءُ آیانی سْیادی ءَ آجوئی لوٹوکیں گلّاں گوں زاھر کنت ۔ پیسر ءَ سی ٹی ڈی ءَ دری راجانی مردم هوار بوتگ انت بلے همے زوتاں ما گندگ ءَ ایں کہ بلوچ مهلوک گیش ءَ گیش سکین دیگ بوئگ ءَ انت کہ آ اے ادارهے بهر جوڑ بہ بنت ءُ وتی برات ءُ گھارانی گار ءُ بیگواھی ءُ کُشگ ءَ هوار بہ بنت-
سر زائر ءَ ایشی ءِ دو بلائیں تاوان انت: یکے وَ ایش انت کہ بلوچ وت ما وت گور جیگ بنت ءُ بوھگ ءَ انت ءُ دومی ایش کہ استان وتی Narrative ءِ منّارینگ ءَ سوبمند بوھگ ءَ انت. یک زورآوریں استانے ءِ هما وهد ءَ وشهال بیت وهدے هما راج، کہ آئی ءِ سر ءَ آ زورآور انت، آ وتی هکّی ئیں جیڑه ءَ چہ دست کش بہ بیت ءُ استان ءِ پالیسیانی دیم ءخ برگ ءَ وتی کرد ءَ پیلو بہ کنت. اے چیز ءَ بلوچ وت کہ کنگ ءَ انت، گڑا آ وتی دست ءَ زاھری ءَ چہ کش ایت ءُ بلوچ ءَ وت ما وت ءَ دست ءُ جیگ کنت-
اگاں انگت ایشی ءَ اُرت بکنیں ءُ بچاریں، گڑا انوگیں وهد کنونشنل جنگ (بزاں کہ دیم پہ دیمی فوجی جنگ) ءِ دور نہ انت (میان استمانی رِد ءَ گُشگ ءَ آں). دنیا ءِ استان انوگیں وهد ءَ زھنانی جنگ ءَ کنگ ءَ انت. ارزانیں زبان ءَ، اے جنگ ءَ را Narratives آنی جنگ (War Of Narratives) هم گُشنت. یا چد ءُ ارزان تر اشی ءَ میڈیا وار (Media War) گُشنت. اے جنگ ءِ تہ ءَ توپگ ءَ چہ گیش گپّ ءُ هیال کارمرز کنگ بنت. هر استان، یا راج، وتی گپّ ءُ هیال ءِ منّارینگ ءَ سوبمند بیت، آ جنگ ءِ تہ ءَ دیمتر ءَ بیت اِنت. اے جنگ ءِ تہ ءَ کس باج نہ بارت بلے پُشت ءُ دیم بیت بزاں کہ اگاں مرچی امریکہ وتارا منّارینیت، بوت کنت زوت ایندگا استانے وتارا بہ منّارینیت. پمیشکا امریکہ کہ دیمتر ءَ بیت گڑا آ همے جهد ءَ کنت کہ دگہ یکے من ءَ چہ مہ گُوازینیت متلب اے Continuous War ءِ هساب ءَ انت هر کس دم بارت، پُشت ءَ رؤت-
نوں اے جنگ ءِ پُشدر ءَ، هما زورآوریں استان وتی ایردستیں راجانی سر ءَ وتی رنگ ءَ ڈائریکٹ وائلنس ءَ هوار اے پیمیں زھنی نادراهی هم کار انت گوں داں کے آ راج وتی سر ءَ بَیوکیں زوراکیاں چہ یک کرّ بہ بیت بلے گوستانک مدام راجانی ھست ءِ سر ءَ سانمند بوت کنت ءُ گیشاں گیش مهلوکی دیوان ءُ اے بنگپانی سر ءَ باوست ءُ ایشانی ایر جنگ هم سرپدی آؤرت کنت بلوچاں لوٹ ایت آ چیزاں چہ پُشدر ءَ بچار اَنت ءُ وتی ھست ءَ گچینی پیسلہ بہ زورنت چوش مہ بیت باندا روچ آ تَھو ءُ توکے ءَ مان بِہ گیش ایت ءُ پہ در کپگ ءَ هِچ در پہ وت ءَ مہ گند ایت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔