نبشتانک: راجدوستی ءُ راجدْراھی
نبشتہ کار: پاتما بلوچ ءُ آئیشہ بلوچ
دی بلوچستان پوسٹ
اولی بھر
وھدے کہ زیردستیں راجاں پہ وتی راجی آجوئی ءُ ڈیھ ءِ وتواجھی ءَ راجی جُنز بندات کتگ انت گُڑا شھنشاہ ءُ زورگیراں پہ ایشانی راجی جُنز ءِ بے سوب ءُ ھلاس کنگ ءِ ھاتر ءَ ماں چاگِرد ءَ مُدام دپچٹ، کاسگ چٹّ دلّار ءُ راجدْروہ ودی کُتگ انت کہ راجدوست مُدام دلپْروش، تکانسر، کُشگ بہ بنت ءُ ایشانی راجی آشوب بے سوب ءُ راج مُجّتی بَکڑ ءِ آماچ بہ بیت۔ پد ءَ زیردستیں راج ءِ پدریچ ءَ ماں وانگجاھاں دْروگیں راجدپتر، زورگیر ءِ دْروگیں وزبت ءُ ستا، زورگیر ءِ وتگڑیں ھستی ءُ کوڑائیں نمیرانانی بابت ءَ دْروگ دانک ماں زورگیر ءِ زُبان وانینگ بیتگ اَنت ءُ انگت ءَ وانینگ بوگ ءَ اَنت۔
زیردستیں راج ءِ جِند ءِ راجی ھستی ءُ نمیرانانی بابت ھچ چیز ءُ دانکے وانینگ نہ بیت اگاں چیزے بیت گُڑا آ ھم دْروگ ءُ وتگڑ بنت کہ راج ئِے گیشتر بَکڑ ءِ آماچ بہ بیت آ راج چہ وتی راجدپتر ءَ بے سما ءُ بے سُدّ بہ بیت۔ چریشی ءَ راج ءِ مھلوک مجگی گُلام بیت ءُ راج وتی راجی دود ءُ پجّاراں(بزاں کہ راجی زُبان ءُ پوشاک ءِ وڑیں دوُداں) بے ھال ءُ شموشان کنت۔
البت مئے بُنگپ راجدْروھانی بابت ءَ انت پمیشکا ما ماں وتی نبشتانک ءِ تہ ءَ دلّار ءُ راجدْرھانی بابت ءَ گپ کن ایں کہ ماں راجی آجوئی جُنزانی تہ ءَ اِے دابیں مردمانی چُنت تبک بنت۔
اولی تبک: دژمن ءِ ھما رَد داتگیں مھلوک ءُ لھتیں ناسرپدیں مردم اَنت کہ آیاں وتی راجی پجّار ءُ راجدپتر ءِ بابت ءَ ھچ سما نیست اِنت اے تبک ءِ مھلوک ءَ راجی آجوئی ءِ سسّا نہ رستگ بلکیں مُدام زورگیر ءِ پوتاری ونتگ ءُ دلگوش کُتگ پمیشکا راج ءِ تہ ءَ اِے تبک مُدام زورگیر ءِ دپچٹّی کنت ءُ مُدام بے مُزّ ءَ پہ دژمن ءِ پلہّ مُرزی ءَ راج ءِ تہ ءَ بے سیتیں پوتاری کنان ءَ راجی جُنزاں تاوان ءُ بے سوب کن اَنت۔ اِے تبک چہ سرکاری روتاک، ھالتاک، گِندگُش ءُ سرکاری وانگجاھ، سرکار ءِ دمگی وارلاڈز (بزاں دمگی میر ءُ نواب کہ آیاں زورگیریں سرکار بھا زُور ایت ءُ آیاں زَر دنت ھمے وڑیں) دُژمن ءِ آسراتیانی آسر ءَ ودی بنت۔ بِہ گِند ئے اے تبک پہ راجی جُنزاں بلاھیں نادْراھی یے ءُ پہ اِے تبک ءِ راست کنگ ءَ آشوبی جُھدکار بلاھیں جُھدے کنگ لوٹ ایت کہ باید اِنت راج ءِ تہ ءَ گلامی ءِ مارشت ودی بہ بنت ءُ راج ءِ تہ ءَ ھمے سرپدی بہ بیت کہ تو وت یک سرجمیں راجے ئے، تئی وتی جُتائیں راجی دوُد ءُ شاھگانیں راجی زُبان، دود ءُ ربیدگ اَنت، ترا وت یک سرڈگارے ھست، نی تو گلامیں راج پہ وتی راجی آجوئی ءُ وتواجھی ءَ پاد بیا۔
دومی تبک: اِے ھما تبک ءِ مردم اَنت کہ پہ راجی جُنز ءِ ھلاپ ءَ سرکار ایشاں زَر دنت، چوناھیگا اِے تبک چہ بُندر ءَ ھرابیں مُردم اَنت انچوشکہ سِلکاریں دمگی رھشُون(کرپٹ لوکل لیڈرز) شَپُکی، دُزّ ءُ ڈُنگ ءِ وڑیں مردم اَنت کہ آیاں مُدام زورگیریں سرکار راجی جُنزانی ھلاپ ءَ کُمکّ کن اَنت کہ ھمے کاسگ چٹّ راجدوستیں مردماں تُرس ءُ بیھار ءِ آماچ بہ کن اَنت، چہ سرکار ءِ دست ءَ ورناھیں جُھدکارانی آوار جنگ ءُ بیگواہ کنگ ءَ دژمن ءِ بلاھیں کُمکّ بنت ءُ دُژمن پہ وتی پائدگ ءِ ھاتر ءَ آیاں دگہ بازیں جاھاں ھم کارمرز کن اَنت انچوشکہ پہ سرکار ءِ ھکّ ءَ روانکے کَشگ، راجی جُنز ءِ ھلاپ پوتاری کنگ، اگاں کسے زورگیر ءِ ھلاپ ءَ ھبرے بہ کنت گُڑا تچک ءَ ھمے ھبر ءَ دُژمن ءِ بُنجاہ سر کنگ ءِ کارمرزی اَنت۔ بزاں شھر ءُ میتگاں شپ داں روچ پہ دُژمن ءِ کاسگ چٹّی ءَ کار کن اَنت۔ ماں راجی جُنزاں اِے تبک ءِ مردم راجدْراھی ءَ شُمار بنت ءُ وھدیکہ گُلامیں راج آزات بنت گُڑا نوکیں آجو بیتگیں راجمان ءُ راجمستری سرکار اے تبک ءِ راجی گُناھکاراں تْرُندیں سزا ءُ ڈنڈ بند اَنت۔
سئمی تبک: اے ھما تبک ءِ مردم اَنت کہ پہ زورگیر ءِ کُمک ءَ دُژمن ءِ سِلاہ زُور اَنت ءُ راجی آجوئی لوٹوکیں گھگرانی ھلاپ ءَ جنگ کن اَنت۔ چوناھیگا دُژمن ءِ لشکر گُلامیں راج ءِ زُبان ءَ وَ سرپد نہ اِنت، زورگیریں دُژمن زیردستیں راج ءِ سرڈگار ءِ کوہ، لد، جنگل، کُوچگ، شھر ءُ میتگاں ھم ناشناس اِنت پمیشکا دُژمن اے تبک ءِ مردماں پہ وتی جنگی اُرش ھوار کنت، راجی آجوئی ءِ سِلاھبندیں گلانی بُنجاھاں سرکنگ ءَ کارمرز کنت ءُ اِے دابیں مردم راج ءِ لس مھلوک ءِ کُشگ ءَ ھم کارمرز بنت۔ اِے دابیں گلانی سروک دمگی میر، نواب، ڈُنگ ءُ نیکراھی مردم ھم بنت۔
اگاں ما شھنشاہ ءُ زورگیرانی ھلاپ ءَ دنیا ءِ ھر راجی جُنزاں بہ وان این ءُ چمشانکے بہ دے ایں گُڑا مارا بازیں راجدْروہ ءِ نام پہ وانگ ءَ رس ایت ءُ ما سرپد بِہ ایں کہ ماں راجی آجوئی ءِ جُزاں راجدْروھی چنکس بلاھیں ناْراھی یے انچوشکہ اگاں ما برتانیہ شھنشاہ ءِ ھلاپ ءَ آزات ھندوستان ءِ راجدوستیں رھشُونانی راجی جُنز ءَ ھورت بہ وان ایں گُڑا ما سرپد بہ ایں کہ شھنشاھیں برتانیہ ءَ کانگریس ءِ ھلاپ ءَ، سرسید اھمد ھان، ھمد اَلی جناہ ءُ لیاکت اَلی ھان وڑیں راجدْروہ دیم ءَ آورتگ اَنت کہ چہ ھمے بدواھیں مردمانی کِرداں ھندوستان دو سَے بھر ءَ پْروشت چریشی ءَ ھندوستان ءِ جھمندیں مسلمان نزور تراتگ اَنت انچوشکہ اِے بابت ءَ کانگریس ءِ رھشُون ھندوستان راج ءِ راجی نمیران واجہ مولانا ابولکام آزات ءَ 1946 ءَ ماں لاھور ءِ روتاک “چٹان” ءَ گوں واجہ شورش کاشمیری ءَ یک گُلگدارے ءَ پیشگْوھی کُتگ اَت۔
اگاں ما 1955 تا 1975 ءَ امریکہ ءِ ویتنام جنگ ءَ وان ایں اود ءَ مارا راجدْروہ واجہ نگودینا ڈئیم، ایشی ءِ برات نگودینا نُو، نگیون وان تائیُون ءُ کاؤ وان وین ءِ وڑیں وتگڑیں رھشُون پہ وانگ ءَ رس اَنت کہ آیاں پہ امریکہ ءِ کُمکّ ءَ بے شُمار ویتنامی راجی سِلاہ بندیں جُھدکار ءُ ویتنام ءِ لس مھلوک کُشتگ اَنت بلے وھدیکہ امریکہ ءَ ماں اِے جنگ ءَ پْروش وارتگ گُڑا اے وڑیں دْراھیں راجدْروہ ءُ کاسگ چٹّ کسے راج ءِ لس مھلوک ءِ دست ءَ کُشگ بیتگ ءُ لھتیں پد ءَ دزگیر ءُ سرکاری رھبندانی رِد ءَ کُشگ ءُ سزا دیگ بیتگ اَنت۔
روان اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت