آزمانک: نا وشّیں زِند
(چہ براہوئی ادب ءَ)
آزمانکار: عبدالرازق ابابکی
رجانک: ھلیل بلوچ
دی بلوچستان پوسٹ
زرینہ ءِ گِندگ ءَ گوں سلیم ءَ گْوشت “ھُداوند ءِ کُربان بِہ باں چُشیں ڈولدار ءُ شوکیں اِنسان جوڑ کَنت ءُ پدا پہ چارگ ءِ مکن ھَم کَنت۔” سلیم دَپ یلا ئِے اَت، آئی ءِ گوما آئی ءِ نزّیکیں سنگتے بوت اِنت گُڑا آئی ءَ ھِچّ ءِ آسرا نہ کُت، بَلے اِد ءَ اے وڑ گْوشگ ءَ آ شرمسار بُوت، پرچا کہ آئی ءِ اے گَپّاں گوں زرینہ ءِ گُشئے سرا چکّر کُرت کہ چیھالے جت ئِے زمین ءَ تچک بُوت۔ سلیم ھبکّہ بُوت ءُ وتی کَش ءَ اوشتاتگیں ڈاکٹر بیدل ءَ گْوشت ئِے “ھُدا بہ جَنت منی زُبان ءَ، چو ھَم زاناں کہ منی چمّ گْرنت بَلے بسم اللہ گْوشگ ءَ چہ دِل ءَ بر آں، اللہ اِزّت بہ دَنت اے جِنِک ءَ، منا دوست بُوتگ اَت بِسم اللہ وَ بہ کُتیں، بزّگ اِت دیست دَمان ءَ شِپور گِپت زمین ءَ تچک بُوت۔”
“اِنّا اے تئی میار نہ اِنت کہ ایشی ءَ گوں چُش بُوت، اے وَت ھَرچ دو سئے اَدار ءِ تہا یکبرے انچو بے سَما بیت، آئی ءَ را آئی ءِ جِند ءِ ھَم سَما نیست۔” ڈاکٹر بیدل زرینہ ءِ پجّاروکے اَت، میڈیکل کالج ءَ آ دوئیں ھَم تبک اِت اَنت۔ آئی ءَ سلیم گْوشت ایشی کَپگ ءِ تہا تئی ھِچ دَست مان نہ اِنت ءُ نیکہ تئی چمّاں گِپتگ۔ آئی ءِ نیمگ ءَ کسّے بہ چاریت یاں کہ مہ چاریت آئی ءِ زِند نوں ھمے وڑ اِنت، آئی ءَ را وتی سَما نیست۔”
ڈاکٹر بیدل ءِ اے گَپّانی اِشکُنگ ءَ گوں سلیم اجکّہ بُوت ءُ وتی گردن ئِے انچو چنڈینت گْوشئے رَگے ءَ گِپتگ ءُ نوں یلا ئِے داتگ۔
ڈاکٹر بیدل ءَ گْوشت “زرینہ مئے ھَم تبک اَت، آ بی ایم سی ءَ میڈیکل ءِ نودربرے اَت، گُڈّی سال ءِ گُڈّی سِمسٹر اَت کہ آ یک وَیلے ءِ دیمپان بُوت۔ ھما اِنت دنیگتا زرینہ وتی سُدّ ءُ سَما ءَ نہ اِنت، کَہول ءِ مردُم آئی ءَ را پَد ءَ وتی پیسر ءِ ھالت ءَ آرگ ءِ کوشست کن اَنت، بَلے آ جیئند ءَ بیھال کُت نہ کَنت۔ پمشکا آئی ءَ را پہ سیل ءُ سواد ءَ ڈَنّ ءَ کَشّ اَنت داں کہ ھیال ئِے کمو چَپّ بہ بیت۔ ءُ دِل ءِ کمو تاھیر بہ رسیت۔ بَلے زرینہ ھالتاک ءِ تہا شِنگ بوتگیں ھما اَکس ءَ چہ دِل ءَ ھِچ کشّ اِت نہ کَنت کہ چہ ھمائی سَوَب ءَ زرینہ روچ پہ روچ گیشتر نادْراہ بُوّان اِنت۔”
“تو چے گْوشگ ءَ ئے من ھِچ سرپد بُوّگ نہ آں؟” سلیم اجکّہ ءُ ھیران اَت ءُ ڈاکٹر بیدل ءِ بے رِد ءُ بندیں گَپّاں ھِچ سرپد نہ بُوت۔ “سرجمیں کِسّہ ءَ دیم ءَ بیار بُوت کَنت سرپد بہ باں کہ اے کودک ءِ گوما چے بُوتگ۔” سلیم ءَ گْوشت
“زرینہ ءِ کَہول ءِ سکّیں شرپدار ءُ ھانوادھیں مردُم اَنت، کَہول ءِ دْرستیں مردُم وانندہ اَنت۔ آئی ءِ دِل ءِ تَب ءَ آئی ءَ را میڈیکل ءِ وانگ ءِ موکل رَست۔ سیٹ ءِ گِرگ ءَ ھَم سوبین بُوت۔ وانگ سکّ شرّی ءَ دیم ءَ رَوان اَت۔ زرینہ ءَ را وانگ ءِ سکّ واھگ اَست اَت پمشکا چکّاساں ھِچ وڑیں پریشانی ءِ دیمپان نہ بُوت، پَد ءَ آئی ءِ بے تُکّ ءُ تَواری ءِ سَوَب ءَ دْرستیں نودربراں آئی ءَ را اِزّت ءَ دات۔ ھمد ءَ مئے کلاس ءَ یک بے تواریں بچکّے اَست اَت کہ آئی ءِ نام جیئند اَت۔ سنگتانی گوما کینٹین ءَ چاہ ءِ ورگ ءَ ابید جیئند دگہ ھِچ وڑیں سیل ءُ سواد ءَ دَر نہ کَپت۔ تھنا وَنت ئِے۔ آئی ءِ اے بے تواری ءِ راز ءَ کسّے سرپد نہ اَت۔ پرچا کہ ما ھَم آئی ءِ سنگت ات ایں، ھَم تَبَک ات ایں، ءُ آئی ءِ ھَم سَند ات ایں۔۔۔ بَلے آ ھِچ مئے وڑ ءَ نہ اَت۔” بیدل ءَ آسَردے کَشّ اِت
“من دنیگتا سرپَد بُوّگ ءَ نہ آں، ءُ منی دِلی واھَگ اِنت کہ اے باروا شرّی ءَ سرپد بہ باں۔”
سلیم ءِ دِل ءَ لوٹ اِت کہ اے کِسّہ ءَ زُوتّ سرجم ءَ سرپد بہ باں
بیدل ءَ یکبرے پَدا کسّہ بِندات کُت “زرینہ ءُ جیئند ءِ تَب یکّے اَت، وانگ ءِ بابت ءَ ھَم آھانی تَہا یکوئی اَست اَت۔ ھمے سَوَب اَت کہ آھانی یکّے دومی ءِ گوما ھوال اَست اَت، ءُ وَت ماں وَت ءَ نوٹس دات ءُ زُرت اِش۔ ھمے ھاتر ءَ گوں وَت ءَ نزّیک بوت اَنت۔ یک روچے جیئند ءَ پہ تُرس ءُ لرز چہ زرینہ ءِ دزگوھار ھانی ءَ جُست کُت کہ زرینہ ءِ سانگ بُوتگ یا اِنّا؟ ھانی ءَ اول سرا وت ءَ را نا سَھی کُت، پدا جیئند ءِ شرّی ئِے دیست اَنت گُڑا گْوشت ئِے کہ زرینہ دنیگتا سانگ نہ بوتگ، بَلے تو پرچا اے جُست ءَ کنگ ئے؟ جیئند ءَ ھِچ گَپ نہ کُت رھادگ بوت۔ لھتیں روچ ءَ پَد وتی مات ءُ گُہار ئِے آھانی لوگ ءَ دیم دات اَنت، آئی ءِ مات ءَ اود ءَ گْوشت من وَتی زھگ ءِ ھاتر ءَ رَسال آرگ لوٹ آں۔
لھتیں وھد ءِ تہا اے گَپ دیم ءَ شُت۔ پد ءَ زرینہ ءَ را ھَم سما کَپت کہ آئی ءِ ھاتر ءَ چہ جیئند ءِ نیمگ ءَ رَسال آیگ ءَ اِنت۔ گُڑا آئی ءَ وتی کہول ءِ دیم ءَ رَزامندی زاھِر کُت۔ آھانی سانگ ربیدگی وڑ ءَ بوت۔ سانگ ءَ پَد دومی سنگتانی وڑ ءَ نزّیک بوت اِش نہ کُت۔ بلے گوں وَت ءَ اَھد اِش کُت کہ گُڈّی چکّاس ءَ رَند سِیر کنیں۔”
سلیم نْیام ءَ دور کُت گْوشت ئِے “بَلے زرینہ ءَ گُڈّی چکّاس دات نہ کُت، ایشی متلب اِنت کہ آھانی سِیر ھَم نہ بوت۔”
بیدل ءَ پد ءَ آسردے کشّ اِت ءُ گْوشت “زالماں بِہ اِشتیں کہ آھانی سِیر بوتیں۔ مئے تھنا یک سمسٹرے پشکپتگ اَت، ءُ گْوستگیں سمسٹر ءِ رزلٹ ھم دنیگتا نیاتکگ ات اَنت کہ جیئند ءِ بیگواھی ءِ ھال شِنگ بُوت۔ دْرستیں سنگتانی تہا اَڑکُڑے کَپت۔ آئی ءِ کَہول ءَ اَبید زرینہ ءُ آئی ءِ کہول ءِ ھاتر ءَ زمین کُٹّ اِت۔ جیئند ءِ پِیریں مات کہ آئی ءَ وتی ھزار مُرادیں بَچ اینکس وھد چہ وت ءَ جِتا کُت کہ سال ءُ کپے ءَ پد وتی لوگ ءَ شُت۔ آئی ءِ مات ءُ گُہارانی اَرمان ماں ھاکاں ھَوار بوت اَنت۔ وھدے زرینہ دومی بیگواہ بوتگیں مردُمانی بابت ءَ ھَم سَرپد اَت کہ آھاں چہ کسّے ھَم زِندگ واتر نہ بوتگ۔ گڑا آ دِل یکیم اَت کہ جیئند آئی ءِ ھاترا واتر نئیت۔ ھمے سَوَب اَت کہ آ چہ وانگ ءُ چکّاس ءَ پَشکپت۔۔۔
وھدے مئے رزلٹ آھت انت گُڑا لھتیں روچ ءَ پَد ھالتاکے ءِ تہا من دیست کہ ناشُناسیں مردُمے ءِ کُنٹ دسکَپتگ۔ منی ھاترا اے نوکین ھالے نہ اَت۔ من پیسر ءِ ھمے وڑیں ھالانی وڑ ءَ آسردے کَشّ اِت ءُ گْوشت زالماں دِگہ یک ورنایے جَت ءُ دَور دات، دِگہ یک کہولے برباد اِش کُت۔ دومی روچ ءَ ڈاکٹر بالاچ ءَ منا ھال دات کہ زیکّیں روچ ءِ دَسکپتگیں کُنٹ جیئند ءِ بوتگ۔”
دلگوش:- اے آزمانک براہوئی لبزانک ءِ آزمانکار ءُ کواس واجہ عبدالرازق ابابکی ءِ آزمانکانی کتاب “بے ہندا بندغی” ءَ چہ گْچین کنگ ءُ رجانک کنگ بوتگ۔ اے آزمانک ءِ رجانک کنگ ءِ مول ءُ مُراد براہوئی لبزانک ءُ ساچشت ءَ توامیں بلوچانی گْور ءَ سر کنگ اِنت۔ داں کہ بلوچانی زُبان بلوچی ءُ براہوئی گوں وت ھمگْرنچی ءَ دیمروئی بکن اَنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔