بلوچستان ءِ دمگ مستونگ ءَ پاکستانی پوج ءِ بُنجاھی بُنجل ءِ سر ءَ ڈرون اُرشاں نشانگ کنگ بیتگ-
مستونگ ءِ دمگ اسپلنجی ءَ مَرو کنڈ ءِ ھند سر ءَ برجاہ پاکستانی پوج ءِ بُنجل سر ءَ ڈرون اُرش کنگ بیتگ-
دمگی اِھوالکار ءِ رِد ءَ بیگاہ ءِ وھد ءَ پوج ءِ بُنجل ءِ سر ءَ بازیں ڈرون اُرش کنگ بیتگ چریشی ءِ سوب ءَ لشکر ءَ جانی تاوان ءِ ھال اِنت-
زانگ بہ بیت چیزے روچ ءَ ساری کلات ءَ پاکستانی پوج ءِ بُنجل ڈرون اُرشانی نشانگ کنگ بیتگ اَت ءُ آئی ءِ زمہ واری بلوچ لبریشن آرمی ءَ منّ اِتگ-
ھمے سال ءَ بلوچ لبریشن آرمی ءَ اولی بلوچ بُرزی یونٹ “قھر” ءِ جار جتگ اَت – جارکش جیئند بلوچ ءَ درشان ءِ تہ ءَ گوشتگ کہ گل جار جنت کہ گل ءِ نوکیں بُرزی ءُ ڈرون وارفیئر یونٹ “قھر” ” (QAHR – Qazi Aero Hive Rangers) جوڑ کنگ بیتگ ءُ آپریشن ھیروپ دومی بھرگ ءِ میان ءَ وتی بنداتی آپریشنز گوں سوبمندی سرجم کتگ-
دیمتر ءَ گوشتگ کہ ڈرون ٹیکنالوجی ءِ کارمرز کنگ گل ءَ ناں تھنا دیر جن اُرش ءِ بودناکی داتگ بلکیں دُژمن ءِ گچین ءِ دمگاں تاں سر بیگ، آیانی چاروگی ءُ نشانگ کنگ ءِ تاکت داتگ-
جارکش ءَ گوشتگ کہ بی ایل اے سدپد بیت کہ نوکیں جنگ ءِ پڑ ءَ تھنا زمین ءِ سر ءَ اناں، بُرز ءُ سائبر اسپیس ءَ ھم ءَ پراہ شگان بیتگ ءُ قھر اے گردی ءَ گل ءِ ساڑی بیگ بنداتی اِنت بلے شر وڑیں درشان اِنت-