کراچی ءِ بلوچانی گیشتریں دمگ چہ لیاری ءَ یک ورنایے زورانسری بیگواہ کنگ بیتگ-
کھول ءُ دمگی مردمانی رِد ءَ بیگواہ بیتگیں ورنا ءِ پجّار سلطان سعید نام ءَ چہ بیتگ، کہ آ گوستگیں روچ ءَ لیاری ءِ دمگ چہ گل محمد لین ءَ پاکستانی پوج ءِ کارندھاں آوار جتگ ءُ ناشناسیں جاھے ءَ برتگ، چریشی ءَ پد آئی ءِ درگت ءَ ھچ وڑیں ھال دیم ءَ نیتکگ-
کھول رِد ءَ اے اولی رند نہ اِنت کہ سلطان سعید آوار جنگ ءُ بیگواہ کنگ بیتگ- اشی ءَ ساری ھم آ 30 جنوری 2021 ءَ آوار جتگ، چریشی ءَ پد آ یل کنگ بیتگ، بلے یکرندے پد ءَ آئی ءِ زورانسری بیگواھی کھول ءَ سک سسّائی آزار ءِ تہ ءَ دور داتگ-