مستونگ : پاکستانی پوج ءَ لوگے ءِ سر ءَ ڈرون اُرشے کتگ، ورنایے بیران، زالبول ٹپی

پاکستانی پوج ءَ آپریشن ءِ میان ءَ یک لوگے ڈرون اُرش ءَ چہ نشانگ کتگ-

گیشیں ھالانی رِد ءَ بلوچستان ءِ دمگ مستونگ ءِ ھند گردگاپ ءَ پاکستانی پوج ءَ آپریشن ءِ میان ءَ یک ڈرون اُرشے ءَ یک ورنایے بیران بیتگ وھدے کہ بازیں زالبولی ٹپی بیتگ اَنت-

دمگی رسانکدر ءِ رِد ءَ پاکستانی پوج ءَ مستونگ گردگاپ ءِ ھند گرگینہ کلی موسیٰ خان ءَ یک لوگے ءِ سر ءَ کواڈ کاپٹر ءَ چہ اُرش کتگ ، چریشی ءِ آسر ءَ عبدالصمد ء عبدواحد سرپرہ سک ٹپی بیتگ ،وھدے کہ لوگ ءَ ساڑی زالبول ھم ٹپی بیتگ اَنت-

اے میان ءَ اُرش ءَ ٹپی ئیں ورنا عبدالصمد پہ الاج ھاتر ءَ شال ءَ برگ ءَ بیتگ اَنت، بلے آئی ءَ ٹپّانی درد نہ سگ اِتگ ءُ راہ نیم ءَ بیران بیتگ-

زانگ بہ بیت اے دمگ ءَ گوستگیں روچاں بلوچ آجوئی لوٹوکانی اُرش ءَ بازیں پاکستانی پوج ءُ ایس ایس جی کارندہ بیران بیتگ اَنت، چریشی ءَ پد پوج ءَ دمگ ءَ مزنیں کچے ءَ آپریشن بندات کہ انگت برجاہ ءَ اِنت-

اِھوالکار ءِ رِد ءَ مستونگ ءَ ڈرون اُرش ءَ ٹپی زالبول دمگی ھسپتال ءَ برگ ءَ پد پہ گیشیں الاج ھاتر ءَ شال ءَ برتگ اَنت-

زانگ بہ بیت اشی ءَ ساری ھم بلوچستان ءِ جتاجتائیں دمگاں لَس آبادیانی سر ءَ ڈرون اُرش کنگ بیتگ ءُ بازیں کچے ءَ جانی تاوان بیتگ-

ھیومن رائٹس کمیشن آف پاکستان ءَ ھوار بازیں انسانی ھکانی گلاں ءُ بلوچ سیاسی پارٹیاں اے اُرشاں شھری نشانگ کنگ ءِ سر ءَ دلپدردی درشان کنان ءَ ھکومت ءَ چہ زوت کاروائی ءُ اے وڑیں اُرشانی دارگ لوٹ کتگ-