پنجگور : پاکستانی پوج ءِ دست ءَ دو نودربر زورانسری بیگواہ کتگ

بلوچستان ءِ دمگ پنجگور ءِ ھند چہ پروم ءَ دو ورنائیں نودربر پاکستانی پوج ءَ زورانسری بیگواہ کتگ اَنت-

گیشیں ھالانی رِد ءَ پنچ اپریل 2026 ءِ بیگاہ ءِ کساس پنچ ءَ فرنٹئیر کور (ایف سی) ءِ کارندھاں پنجگور ءِ جھمنندیں دو نودربر آوار جتگ ءُ ناشناسیں جاھے ءَ برتگ-

بیگواہ کنگ بیتگیں دوئیں نودربرانی پجّار ھپدہ سالی ئیں حاتم ء حاجی محمد ءُ ھژدہ سالی ئیں مروان ء حمزہ ناماں چہ بیتگ اَنت- دوئینانی سیادی یکیں دمگ شاپتان پنجگور ءَ اِنت-

اِھوالکار ءِ رِد ءَ، دوئیں ورنا پروم ھند ءَ آوار جتگ اَنت چریشی ءَ پد آیانی درگت ءَ ھچ وڑیں ھال نیست-

زانگ بہ بیت بلوچستان ءَ زورانسری آوار جنیانی وئیل یکشل ءَ برجاہ ءَ اِنت، اود ءَ گیشتر ورنا آوار جنگ ءُ بیگواہ کنگ بنت، چریشی ءَ انسانی ھکانی گل دلپدردی درشان کن اَنت-