بلوچستان ءِ دمگ کیچ ءِ بُنجاھی شھر تربت ءَ دو ورنایانی زورانسری آوار جنی وئیل دیم ءَ اَتکگ اَنت-
دمگی اِھوالکار ءِ رِد ءَ یک وئیلے گوستگیں ھپتگے ءِ تربت ءِ دمگ جدگال ڈن (ڈی بلوچ ) ءَ بیتگ اود ءَ پاکستانی پوج ءَ ناکہ بندی کتگ، گوشگ بیگ ءَ اِنت کہ اے میان ءَ یک گاڑی یے داشتگ پٹ ءُ پول کتگ، ءُ اے میان ءَ بیست پنچ سالی ئیں ورنایے آوار جتگ-
اِھوالکار ءِ گوشگ اِنت آوار جنگ بیتگیں ورنا پد ءَ ناشناسیں جاھے ءَ برتگ، چریشی ءَ پد آئی ءِ درگت ءَ ھچ وڑیں ھال نیست-
بیگواھیں ورنا ءِ پجّار سمیر احمد ء محمد عارف نام ءَ چہ بیتگ، اللہ بخت کلاتک جھمنند گوشگ بیگ ءَ اِنت-
دومی نیمگ ءَ شش اپریل ءَ تربت ءِ دمگ چہ کوگدان ءَ پاکستانی پوج ءَ ورنا الیاس ء میا داد آوار جتگ،چریشی ءَ پد آ بیگواہ ءَ اِنت-
بلوچستان ءَ زورانسری آوار جنی ءِ جیڑہ یک دھکے ءَ چہ برجاہ ءَ اِنت ءُ جتاجتائیں انسانی ھکانی گلاں اے درگت ءَ دلپدردی درشان کنت-