چہ بلوچستان ءِ جتاجتائیں دمگاں زورانسری آوار جنی ءُ بیگواھیں مردمانی یل بیگ ءِ رپورٹ دیم ءَ اَتکگ اَنت-
گیشیں ھالانی رِد ءَ پنجگور ءِ دمگ پروم ءِ جھمنندیں چار مردم زورانسری بیگواہ کنگ بیتگ اَنت- بیگواھیں مردمانی تہ ءَ محسن ء مسلم، یحیٰی ء محمد یاسین ءُ عبدالاھد ء ملا نزار ھوار اَنت، آ شانزدہ مارچ 2026 ءِ سھب ءَ جیرک کراسنگ پوائنٹ ،پروم پنجگور ءَ پاکستانی پوج ءَ آوار جتگ اَنت-
ھمے دمگ ءَ چہ سیادی دارؤکیں کریم ء عبدالرشید، کہ زمیاد ڈرائیورے، دو اپریل 2026 ءَ نیمروچ دو نیم ءَ چہ جوسک، تربت ءَ پاکستانی پوج ءِ دست ءَ زورانسری بیگواہ کنگ بیتگ – اِھوالکار ءِ رِد ءَ کریم اشی ءَ ساری ھم زورانسری آوار جنی ءِ نشانگ بیتگ-
دومی نیمگ ءَ بازیں بیگواہ بیتگیں مردمے یل کنگ بیتگ اَنت – شال ءِ دمگ جیلانی دگ ءِ جھمنندیں فھیم سمالانی ء محمد عثمان یک مارچ 2026 ءَ زورانسری بیگواہ کنگ بیتگ، 21 مارچ ءَ ائیرپورٹ دگ،شال ءَ یل کنگ بیتگ-
ھُزدار ءِ دمگ چہ گزگی ءَ سیادی داروکیں زالبول حیات بی بی دختر احمد، آئی ءِ گوستانک سیادی آواران ءِ دمگ نوکجو مشکے ءَ بیتگ، بیست فروری 2026 ءَ آوار جتگ، پد ءَ آ ھُزدار ءَ یل کنگ بیتگ-
گوادر ءِ جھمنند نظام ء حمید، کہ ھشت دسمبر 2025 ءَ بیگواہ بیتگ، بیست مارچ 2026 ءَ یل کنگ بیتگ-
ھُزدار ءِ دمگاں چہ سیادی داروکیں یاسر احمد ء گل محمد ( بیگواہ : پنچ جون 2023 ) ءُ نوید احمد ءِ عبدالراشد (بیگواہ : 29 اپریل 2023 )ھم ھژدہ مارچ 2026 ءَ شال ءَ یل بیگ ءَ ھال سر بیتگ-
ھمے وڑ سوراب ءِ جتاجتائیں دمگاں چہ 28 مارچ 2026 ءَ زورانسری بیگواہ کنگ بیتگیں بازیں مردمے، آیانی تہ ءَ وحید بلوچ ء محمد توبل، اکرام بلوچ ء حاجی عالم خان، ستار بلوچ ء عبدالخالق ءُ عبدالغفار بلوچ ء عبدالخالق ھوار اَنت، کہ سی یک مارچ 2026 ءَ بُنجاھی آر سی ڈی سوراب ءَ یل کنگ بیتگ اَنت-
دمگی اِھوالکار ءِ رِد ءَ بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، وھدے کہ کھول ءِ نیمگ ءَ چہ بیگواھیں مردمانی یل کنائینگ ءِ ھاتر ءَ زھرشانی دزبندی ھم دیم ءَ آیگ ءَ اَنت- انسانی ھکانی کارکنان اے وئیلانی سر ءَ دلپدردی درشان کنان ءَ لوٹ کن اَنت زورانسری آوار جنی ءِ دْرچ زوت بند کنگ بہ بیت ءُ سرجمیں بیگواھیں مردم دیم ءَ آرگ بہ بنت-