کیچ ءِ دمگ کڈان ءَ پاکستانی لشکر ءِ بنجاھی بنجل اُرش ءِ نشانگ جوڑ کنگ بیتگ، وھدیکہ لشکر ءِ کمک ءَ سر بوھوکیں کاروان ءِ سر ءَ اُرش کنگ بوتگ۔ سلاہ بندیں مردماں لیویز پولیس اسٹیشن ءُ نادر ءِ کارگس ھم کنٹرول کتگ انت۔
کڈان ءِ دمگ ءَ گوستگیں شپ ءِ شپ ءِ وھد ءَ مزنیں تیرگواری ءُ تراک بندات بوتگ کہ تاں شپ ءِ نزیک ءَ 10 بج ءَ برجاہ بوتگ انت۔
دمگی مردماں ٹی بی پی ءَ گوں تران کنان ءَ گْوشتگ کہ اے اُرش ءَ مزنیں کساسے ءَ سلاہ بندیں مردماں لشکر ءِ بنجاھی بنجل نشانگ جوڑ کتگ ءُ لشکر ءِ کمک ءَ سر بوھوکیں کاروان ءِ سر ءَ ھم اُرش کنگ بیتگ کہ اود ءَ بمب تراک ءَ لشکر ءِ بکتر بندیں گاڑی تباہ بوتگ۔
دمگی مردمانی رد ءَ سلاہ بندیں مردماں لیویز پولیس اسٹیشن ءُ نادر ءِ کارگس ھم دستیگ کتگ انت ءُ کارندھانی سلاہ دست کپتگ اَنت۔
اے درگت ءَ انگت ءَ واکداراں ھچ وڑیں ھال ءُ اھوال نہ داتگ۔
گوستگیں شپ ءَ شال ءَ گوں ھمگرنچیں لکپاس ءَ پاکستانی لشکر ءِ پوسٹ ءِ سر ءَ سلاہ بندیں مردمانی اُرش بوتگ ءُ اُرش کنوکاں اُرش ءِ وھد ءَ کوہ ءِ سر ءَ ایریں ریڈار سسٹم ھم سوتکگ ءُ تباہ کتگ۔
ایشی ءَ چہ پیسر ضلع واشک ءِ شمسی ایربیس ءِ سر ءَ بی ایم 12 راکٹ اُرش کنگ بوتگ۔
گوستگیں روچ ءَ جھل مگسی ءَ تھانہ ءِ کنٹرول ءَ پد دمگ ءَ سر بوتگیں فوج ءِ کاروان ءِ اُرش ءَ نشانگ جوڑ کنگ بوتگ کہ ایشی ءِ آسر ءَ فوج ءِ سئے گاڑی تباہ بوتگ ءُ بازیں کارندہ بیران بوتگ اَنت۔
مارچ ءَ چہ برجاہ بوتگیں اے اُرشانی سلسلگ ءِ زمہ واری بلوچ لبریشن آرمی ءَ زرتگ انت۔
بی ایل اے ءِ جارچین جیئند بلوچ ءَ گوستگیں شپ ءَ یک کسانیں بیانے ءِ تہ ءَ گْوشتگ کہ بلوچستان ءِ سرجمیں دمگاں پاکستانی لشکر ءِ سر ءَ مئے ھمگرنچیں اُرش سرجمیں زور ءَ برجاہ اَنت۔
جارکش ءِ رد ءَ تاں انوگ ءَ جھل مگسی، شال، مستونگ، نوشکی، واشک، دلبندین، خاران، پنجگور ءُ کیچ ءَ ھوار جتا جتائیں دمگاں پاکستانی لشکر ءِ کیمپ، فوجی تنسیبات ءُ زور گیر لشکر ءِ ”ڈیتھ اسکواڈ“ ءِ سر ءَ سی ءَ چہ گیش اُرش کنگ بوتگ انت۔