بلوچستان ءَ اُرشانی درچ برجاہ ءَ اِنت ریل ٹریک، گیس پائپ لائن تباہ، پوج ءِ سر ءَ اُرش

بلوچستان ءَ بازیں اُرشے رپورٹ کنگ بیتگ، اود ءَ سلاہ بندیں مردمانی نیمگ ءَ چہ شھدگانی سر ءَ دستیگ کنگ، چوکیانی سر ءَ دستیگ ءُ ریل ءُ گیس پائپ لائن نشانگ کنگ ءِ ھال دیم ءَ اتکگ-

بلوچستان ءِ دمگ سبی ءِ ھند کٹ منڈائی ءَ سلاہ بندیں مردماں دو کلاکاں چہ گیش بُنجاھی شھدگ سر ءُ دستیگ کتگ – اے میان ءَ گزوکیں گاڑی پٹ ءُ پول کتگ اَنت-

دومی نیمگ ءَ مستونگ ءِ دمگ کانک ءَ سلاہ بندیں مردماں یک پولیس چوکی ءِ سر ءَ دستیگ کتگ-

اِھوالکار ءِ گوشگ اِنت کہ اُرشکار اود ءَ ساڑی کارندہ گپتگ اَنت ءُ آیانی سلاہ برتگ اَنت ءُ یک سرکاری گاڑی مانداشتگ اَنت- اے وئیل ءَ ھچ وڑیں جانی تاوان ءِ گپ دیم ءَ نیتکگ –

ھمے وڑ شال ءِ نزیک ءَ تیرہ میل ھند سر ءَ ھم تراکانی سوب ءَ ریل ٹریک ءُ یک پُھلے ءِ تاوان بیتگ- دمگی اِھوالکار ءِ رِد ءَ اے دمگاں سے تُرندیں تراکانی توار اش کنگ بیتگ-

ھمے وڑ ڈیرہ بگٹی ءِ دمگ سوئی ءَ محمد کالونی ءِ نزیک ءَ گیس پائپ لائن ھم بمب تراک ءَ چہ نشانگ کتگ-

بلوچستان ءَ اُرشانی دْرچ گوستگیں شپ ءَ پنجگور ءَ بندات بیتگ ءُ اشی ءَ پد مروچی بلوچستان ءِ جتاجتائیں دمگاں پشت ماں پُشت وئیل دیم ءَ اَتکگ اَنت-

دمگی اِھوالکار ءِ رِد ءَ پنجگور ءَ گوستگیں شپ ءَ ناشناسیں سلاہ بندیں مردم نشانگ کتگ اَنت کہ آ گوں سرکاری پلامرزی ٹولی ءَ چہ ھمگرنچ اَنت- اے اُرشاں پد مروچی سبی، مستونگ، نوشکی، شال ءُ ڈیرہ بگٹی ءَ ھوار جتاجتائیں دمگاں کاروائیانی ھال دیم ءَ اَتکگ-

تنی وھدے اے اُرشانی زمہ واری ھچ گلاں نہ زرتگ اَنت-