نوشکی ءَ دو ماہ چہ کرفیو، وانگ ءُ روزگاز سانمند، شھریانی سر ءَ پابندی ءُ انسانی ھکانی ھلاپ ورزیانی گیشی

نوشکی شھر گوستگیں دو ماہ ءَ چہ تُرندیں لاک ڈاؤن ءُ کرفیو ءِ دیمپانی کنگ ءَ اِنت، چریشی ءِ سوب ءَ شھرں سک دلسیاھی ءُ سسّائی آزار ءِ تہ ءَ اَنت-

دمگی اِھوالکار ءِ رِد ءَ شھریاں بیگاہ ءِ شش ءَ پد شھر ءَ چہ دراھگ ءُ سُھب ءِ نُھ ءَ چہ ساری شھر ءَ پُترگ ءَ مول دیگ ءَ نہ اِنت، چریشی ءَ چہ ھمکروچی زند ءِ سک سانمند بیتگ-

دیریں دمگاں چہ آؤکیں جنک ءُ بچکیں نودربر سُھب ءِ نُھ ءَ پد شھر ءَ پُترگ ءِ موکل دیگ بیتگ چریشی ءِ سوب آ وتی کلاساں چہ زبھر بیگ ءَ اَنت- اے جاوراں زانشتی نزام ءِ واستا یک سنگین جیڑھے جوڑ بیتگ-

دیمتر ءَ شھر ءَ چہ ھمگرنچ کلی غریب آباد ءِ بُنجاھی شھدگ سر ءَ برجاہ یک مڈل وانگجاھے پاکستانی پوج ءَ وتی بُنجلے ءَ مٹ کتگ، چریشی ءِ آسر ءَ ھزرانی جنک ءُ بچک زانت ءِ بُنکی ءَ ھک ءَ چہ زبھر بیتگ اَنت-

دمگ ءَ شھریاں آزاتی ءِ ھلاپ ورزی ءِ وئیل ھم نکش بیتگ اَنت، اود ءَ موٹر سائیکل سواروں دار اَنت آیانی چادراں ایر گیج اَنت ءُ آیاں سک لٹ ءُ کُٹانی نشانگ کن اَنت-

انّیگاں نوشکی ءِ دمگ ڈاک ءَ پکنک ءَ رؤکیں دو موٹر سائیکل سوارانی سر ءَ پوج ءِ نیمگ ءَ چہ تیرگواری کنگ بیتگ چریشی ءِ آسر ءَ چہ کلی مینگل ءَ سیادی داروکیں یک ورنایے لنگ ھراب بیتگ، ٹپی گیشیں الاج ھاتر ءَ شال ءَ برتگ-

اے لاک ڈاؤن ءِ ھلاپ جماعت اسلامی نوشکی ءُ آئی یکجاھی پارٹیاں یکشمبے روچ ءَ بُنجاھی جامع مسیت ءَ یک یکجاھی مچی لوٹائینگ بیتگ، چریشی ءَ آؤکیں کار دلگوش گور کنگ بیت-

زانگ بہ بیت کہ اے کرفیو یک انچیں وھدے ءَ جنگ بیتگ وھدے بلوچستان ءِ سیکیورٹی جاورھال ناگیگ اَنت- بلوچ لبریشن آرمی ءَ ھمے سال 31 جنوری ” آپریشن ھیروف دومی بھرگ ءِ نام ءَ چہ کاروائیانی نوکیں بھرے ءِ بندات کنگ جار جتگ اَت ، چریشی ءَ پد جتاجتائیں دمگاں اُرشانی ھال دیم ءَ اَتکگ-

دمگی شھریاں ءُ چاگردی پارٹیاں ھکومت ءَ چہ لوٹ کتگ کہ زوت کرفیو ءَ نرم کنگ بہ بیت، زانشتی ادارھانی پچ کنگ ءُ انسانی ھکانی ھلاپ ورزیانی گامگیج بزور اِیت ءُ زمہ وارانی ھلاپ ءَ کاروائی بکنت-