بلوچستان: کیچ ءُ گوادر ءَ ھئور ءِ سبب ءَ زندمان ءِ سر ءَ سان

بلوچستان ءِ کیچ ءُ گوادر ءِ جتاجتائیں دمگاں یکشلیں ھوراں زندمان ءِ سر ءَ سکا سان کپتگ۔ روکپت ءِ نیمگ ءَ چہ تُرندیں گوات ءِ سبب ءَ سرجمیں مکران ڈویژن ءَ ھئور ریکارڈ کنگ بوتگ ایشی ءِ آسر ءَ جھلیں دمگ آپ ءَ کپتگ انت، سڑک آماچ سانمند بیتگ انت ءُ بازیں دمگاں بجلی ءِ اڑانک بوتگ۔

کیچ ءِ بنجاھی شےر تربت ءَ میونسپل کارپوریشن ءِ نیمگ ءَ ہور ءَ پد جم بوتگیں آپ ءِ کشگ ءِ ھاتر ءَ ایمرجنسی بنیاد ءَ سپائی ءُ ڈرینج ءِ کار بندات کنگ بوتگ۔ واکدار ءِ رد ءَ کارندہ جتا جتائیں دمگاں آپ ءِ کشگ، ھاکانی روپگ ءُ مشینری ءِ درچ ءَ سڑکانی پچ کنگ ءِ کار ءَ گوں بندوک انت وھدے کہ اے امل انگت ءَ برجاہ انت۔

بنشون ءِ رد ءَ ھور ءَ چہ آماچ بوتگیں سڑکانءُ زوتیں رنگ ءَ جوڑ کنگ ھم بندات کنگ بوتگ۔ ڈیٹ فارم تربت ءِ ٹیم ءَ ایرپورٹ روڈ ءَ بگر داں ڈی بلوچ روڈ ءَ جتاجتائیں جاگھاں سڑکانی پُر کنگ ءُ سڑکانی پچ کنگ ءِ کار سرجم کتگ۔ انتزامیہ ءِ گشگ انت کہ شھریاں شریں سپری آسراتی ءِ پھجارینگ بنداتی انت ءُ انفراسٹرکچر ءِ پچکنگ ءِ ھاترا درستیں زور کارمرد کنگ بوگ ءَ انت۔

کیچ ءِ دمگ بھمن ءَ ھور ءِ آپ لوگانی تہ ءَ مانرتکگ بوتگ کہ ایشی ءَ چہ دمگی آبادی سکیں جنجالانی دیمپان بوتگ انت۔ اے جاور ھال ءِ رد ءَ دمگی انتزامیہ، پی ڈی ایم اے ءُ میونسپل کارپوریشن ءِ یکجائی ٹیماں ڈنک، بھمن، شائی تمپ ءَ ھوار جتا جتائیں دمگانی تر ءُ تاب کتگ ءُ تاوان ءِ ارزشت داتگ انت۔

آدینگ ءِ روچ ءَ 27 مارچ ءَ ھور ءَ پد میرانی ڈیم ءِ آپ ءِ کچ 242 فٹ ءَ سر بوتگ کہ ایشی ءَ چہ آپ ءِ مچی ءِ تہ ءَ گھتری ءِ اُمیت گندگ ءَ کیت۔

تربت ءِ دمگ واستو بازار ءَ ھئور ءِ سبب ءَ سئے فٹ ءَ چہ گیش آپ جم بوتگ کہ ایشی ءَ چہ لوگ ءُ دکاناں تاوان ءِ ترس پیداک بوتگ۔ دمگ ءِ نندوکیں مردماں زوتیں آپ ءِ کشگ ءِ گامگیج لوٹ کتگ انت۔

دومی نیمگ ءَ تربت ءُ بلیدہ ءِ راہ ھم بازیں جاھاں تاوان بوتگ کہ اود ءَ زمین چِل چِل بوتگ ھاسیں رنگ ءَ پُھلانی نزیک ءَ۔ لس مھلوک ءَ ھم سڑک ءِ مھّ جوڑیشت ءِ سر ءَ زھر ءِ درشان کتگ۔

دومی نیمگ ءَ جیوانی، پِلیری، پیشکان، چوب ریکانی، سربندن ، کلانچ ءُ گوادر ءِ شھر ءِ دمگ ءَ ھئور ءِ ھمراھی ءَ تُرندیں ھور ریکارڈ کنگ بوتگ۔ پیشکان ءَ ھئور ءِ سبب ءَ لوگانی بامانی سر ءَ ایریں سولر پینل چہ وتی جاہ ءَ کپتگ اَنت ءُ بازیں جاھاں بجلی ءِ ڈنڈی کپتگ اَنت ءُ دمگ کوراسی ءِ آماچ بوتگ ءُ کلانچ ءَ ھم مھلوک ءِ لوگ آپ ءَ بڈینتگ انت ءُ اود ءَ بنداں ھم برتگ ءُ مھلوک ءَ مالی تاوانانی دیمپانی بیتگ انت۔

محکمہ موسمیات ءَ کوھی دمگاں آپ ءِ ھترہ ءِ دیم ءَ آرگ ءَ چہ شھری لاچاری ءَ ابید سپر کنگ ءَ چہ پھریزگ ءِ کڈن کتگ انت۔