بلوچ یکجھتی کمیٹی ءَ وتی ءُ آئی ءِ بنجاھی رھشون ڈاکٹر صبیحہ بلوچ ءِ سر ءَ جنگ بوتگیں بے بن ءُ سیاسی بھتام تُرندی ءَ ایر جتگ اَنت۔ گل ءِ گشگ انت کہ بی وائی سی یک پرامن سیاسی زرمبشتے کہ آئی ءَ مدام بلوچستان ءَ انسانی ھک ءُ انساپ ءِ رکینگ ءِ ھاتر ءَ وتی توار چست کتگ ۔
جارکش ءِ رد ءَ سرکاری ادارگاں پروپیگنڈا مھم ءُ پریس کانفرنس ءِ برجم داشتگ انت تانکہ راستیں جیڑہ بے دلگوش کنگ بہ بنت ۔ گوستگیں روچ ءَ دسمبر 2025 ءَ چہ خضدار ءَ زورانسری ءَ بیگواہ کنگ بوتگیں فرزانہ زہری ءَ سروزیر سرفراز بگٹی ءُ پولیس ءِ انسپکٹر جنرل ءَ پریس کانفرنس ءَ پیش کتگ۔ سئے ماہ ءَ چہ گیش بیگواہ دارگ ءَ پد آئی ءِ سر ءَ بی وائی سی ءِ ھلاپ ءَ بیان دیگ ءِ ھاتر ءَ گمانی زور دیگ بوتگ۔
جارکش ءَ گوشت کہ اے جیڑہ آئینی ءُُ کانونی جست ءُُ پرس ءِ سبب جوڑ بیت۔ اے دور ءَ فرزانہ زہری کجا بوتگ؟ پرچا آمیدگس ءِ دیم ءَ آرگ نہ بوتگ؟ ءُ پرچا آ کانونی بندی جاہ ءِ بدل ءَ چیریں بندیگ جاہ ءَ دارگ بوتگ ؟ اے وڑیں جاوراں ھرچ بیانے کہ داتگ آ ھچ وڑ ءَ وتسر نہ بیت۔
بیان ءِ تہ ءَ گیش گْوشگ بیتگ کہ اے کار ءِ درور ءَ بی وائی سی ءِ سروکی ءِ ناجائزیں دزگیر کنگ ءِ جواز ءِ دیم ءَ آرگ ءُ یک پرامنیں زرمبشتے ءِ بدنام کنگ ءِ کوشست اِنت۔ اے بھتامانی بارو ءَ ڈاکٹر صبیحہ بلوچ یا گل ءِ ھلاپ ءَ ھچ وڑیں مھکمیں سبوت نیست۔
بلوچ یکجھتی کمیٹی ءَ چہ سر وزیر سرفراز بگٹی ءُ ھمگرنچیں واکاں لوٹ کتگ کہ اے بھتامانی راستیاں زوت لس مھلوک ءِ دیم ءَ پیش بہ کن اَنت اگاں ناں لس پھلی لوٹگ بہ بیت۔
بی وائی سی ءَ وتی جزم ءِ پد ءَ زور داتگ کہ آ ھر وڑیں زور ءُ آزار ءِ پد ءَ ھم وتی ایمنیں جنز ءَ برجاہ دار ایت ءُ بلوچستان ءَ انسانی ھکانی لگتمالی ءِ ھلاپ ءَ وتی توار ءَ چست کنت۔