بی ایل اے ءَ آپریشن ھیروپ ٹو ءَ ھواریں دگہ چار نمیرانیں ھمراھانی اکس ءُ اھوال شنگ کتگ انت

بلوچ لبریشن آرمی ءَ وتی آفیشل چینل ھکل ءَ آپریشن ھیروپ ٹو ءَ ھواریں چار دگہ نمیرانیں ھمراھانی اکس ءُ اھوال شنگ کتگ انت-

اولی ءِ پجار مزمل بلوچ پنام ءِ رؤف ء محمود بلوچ جھمنند خدابادان پنجگور ءِ نام ءَ کتگ- آئی ءَ 2022 بی ایل اے ءَ بھر زرتگ ءُ زراب یونٹ ءِ بھر بیتگ- آئی ءَ وانگ چہ بلوچستان یونیورسٹی ءَ بی ایس اکنامکس کتگ ءُ شال ءَ آپریشن ھیروپ ٹو ءَ شھید بیتگ-

ھکل ءِ رد ءَ مزمل بلوچ پنام ءِ رؤف ءِ زھنکاری ءُ بھادری ءُ جپاکشی دیستگ آ گل ءِ انٹیلیجنس ونگ زراب ءَ ھوار کتگ- اود ءَ آئی ءَ زمہ واری ءُ مھنت ءُ رازادی ءُ کار کتگ-

انٹیلیجنس ءِ تک ءَ کار کنگ جھلانکی ءِ درچ ءُ اوپار ءُ سرجمیں زانتکاری ءِ سنچ ءَ دار ایت- رؤف ھمے گچینیانی سرمچار بوتگ- آئی ءِ فکر زانتگ ءُ املی کار درچ ءَ ھما مردماں ھوار کتگ کہ پشت ءَ بیتگ ءُ زرمبشت ءِ واستا جوان کرد اش پیلو کتگ-

آپریشن ھیروپ ٹو ءِ وھد ءَ شال ءَ جاڑیگ بیتگ ءُ سریاب ولی جیٹ ءَ دشمن ءِ ھلاپ ءَ ترندین جنگے ءِ وھد ءَ شھید بیتگ ءُ آجوئی ءِ زرمبشت ءِ تاکاں وتی نام نبشتگ کتگ-

دومی ءِ پجار غلام جیلانی پنام ءِ میران ء غلام ربانی جھمنند فیض آباد ڈھاڈر کچھی ءِ نام ءَ کتگ کہ آ 2024 ءَ بی ایل اے ءَ ھوار بوتگ ءُ ایس ٹی او ایس ءِ بھر بیتگ ءُ آپریشن ھیروپ ٹو ءَ شال ءَ شھید بیتگ-

ڈھاڈر کچھی ءِ ھاک ءَ سیادی داروکیں غلام جیلانی ھما سرمچاراں ھوار بیتگ کہ آیاں راجی گلامی ءِ تقدیر ءِ منگ ءَ ابید آئی ءِ ھلاپ ءَ گھگیری ءِ راہ گچین کتگ – آئی ءَ وتی امل ءُ کرد ءَ منینتگ کہ یک زانتکاریں انسانے وھدیکہ وتی راج ءِ آجوئی ءَ زندگی ءِ مول بہ کنت گڑا آئی ءِ گام کجام ترس ءُ جیڑہ ءِ دیم ءَ نہ اوشت انت- ھمے درچ ءُ آ گل ءِ اسپیشل ٹیکٹیکل آپریشن اسکواڈ( ایس ٹی او ایس) ءِ بھر بیتگ-

آپریشن ھیروپ ٹو ءَ آ شال ءَ جاڑیگ بوتگ ءُ میران وتی ھمراھانی ھواری ءَ دشمن ءِ ھلاپ ءَ پرکار بیتگ – شال سریاب ولی جیٹ ءَ دشمن ءِ ھلاپ ءَ ترندیں جنگے ءِ وھد ءَ مھکم بیتگ ءُ مھکمی ءَ جنگ کنان ءَ وتی ساہ ندر کتگ-

سیمی ءِ پجار ظھور بلوچ پنام ءِ پھلی ء شاہ مھمد جھمنند اسپلنجی مستونگ ءِ نام ءَ کتگ- آ میڈیکل ءِ اسٹوڈنٹے بیتگ ءُ آ ایس ٹی او ایس ءِ بھر بیتگ ءُ آپریشن ھیروپ ٹو ءَ شال ءَ شھید بیتگ-

ھکل میڈیا ءِ رد ءَ ظھور بلوچ ھما سرمچاراں ھوار بوتگ کہ آیانی زندمان پرکاری، کربانی ءُ دراجکشین گھگیری ءِ چیدگ بوتگ انت- یک میڈیکل اسٹوڈنٹے ءِ بوگ ءَ ابید ھم آئی ءَ وتی آرامیں زندمان یل داتگ ءُ راجی آجوئی ءِ جنگ گچین کتگ- آئی ءِ دل ءَ آجوئی ءِ ھنچیں ستکے جاڑیگ بوتگ کہ چریشی ءَ آ ترس ءِ دیم ءَ مِک بوگ ءِ سکین داتگ-

شال ءِ میدان ءَ جاڑیگ بوتگ آ وتی ھمراھانی ھواری ءَ اوشتوک بوتگ ءُ اے منیتگ کہ آشوبی سپاھی ئیگی ءِ مچانکی تاکت آئی ءِ پکاھی ءُ زانشت ءَ بیت انت- آئی ءَ وتی ھاک ءِ آجو کنگ ءِ واستا آپریشن ھیروپ ٹو ءِ وھد ءَ شال ءَ سریاب ولی جیٹ ءَ دشمن ءِ ھلاپ ءَ گڈی ساھت ءَ داں جنگ کنان ءَ وتی ساہ ندر کتگ ءُ وری کربانی ءِ درچ ءَ اے کلوہ داتگ کہ آجوئی ءِ راہ ءَ اوشتوکیں کردار راجدپتر ءَ ھروھد ءَ زندگ بیت انت-

چارُمی ءِ پجار شاھد بنگلزئی پنام ءِ کمانڈو ء عبدالواحد بنگلزئی بنکی ھنکین گرانی مستونگ ءُ انی شال ھزار گنجی ءَ نندوک بوتگ- آئی ءَ 17 دسمبر 2024 ءَ بی ایل اے ءَ بھر زرتگ ءُ ایس ٹی او ایس ءِ بھر بوتگ ءُ آپریشن ھیروپ ٹو ءِ وھد ءَ شال ءَ شھید بیتگ-

شاھد بنگلزئی آپریشن ھیروپ ٹو ءِ وھد ءَ شال ءَ جاڑیگ بوتگ – آئی ءِ تچکی ءُ زمہ واریانی سبب ءَ آ گل ءِ اسپیشل ٹیکٹیکل آپریشن اسکواڈ ( ایس ٹی او ایس) ءَ ھوار کتگ- آ آپریشن ھیروپ ٹو ءِ وھد ءَ شال ءَ جاڑیگ بوتگ اود ءَ آئی ءَ دشمن ءِ توپکداریں کارندہ ھیلنگ کتگ انت- سریاب ولی جیٹ ءَ دشمنیں فون ءِ دیم پہ دیم ءَ جنگ ءِ وھد ءَ آ وتی ھمراھانی ھواری ءَ جنگ کنان ءَ شھید بیتگ-

شاھد بنگلزئی ءِ جد ءُ جھد ءُ کربانی ءِ راستی پدر کن انت کہ بلوچ سرمچار وتی بھادری، جوانیں گامگیج ءُ جپاکشی ءِ سبب ءَ دشمن ءِ سر ءَ مھکم ءَ چہ مھکمیں کلاتاں زمین ءَ ڈروھینت ءُ دور دیگ ءِ زور ءَ دار ایت-

بی ایل اے ءَ آپریشن ھیروپ ٹو ءَ ھواریں دگہ چار نمیرانیں ھمراھانی اکس ءُ اھوال شنگ کتگ انت

الم بوانیت

نوکتریں