کراچی ءَ بلوچانی آبادیں دمگ لیاری ءَ یک ورنا یے پاکستانی لشکر ءَ دزگیر کنگ ءَ پد بیگواہ کتگ۔
بیگواھیں ورنا ءِ پجار عاصم اصغر ءِ نام ءَ بوتگ ۔ اھوالانی رد ءَ گوستگیں روچاں لیاری ءِ دمگ شرافی گوٹھ ءَ فٹبال ءِ میدان ءَ چہ دزگیر کنگ بوتگ۔ چہ بندیگ کنگ ءَ پد آئی ءِ بابت ءَ ھچ وڑیں ھال ءُ اھوال دیم ءَ آرگ نہ بوتگ انت ۔
دمگی مردم ءُ کھول ءِ گْوشگ انت کہ عاصم اصغر ءَ را سادہ پوشیں کارمنداں برتگ ءُ چہ ایشی ءَ پد آ انگت ءَ بیگواہ اِنت۔
اے گپ یات بہ بیت کہ بلوچستان ءَ ھوار کراچی ءِ جتا جتائیں دمگاں بلوچ ورناھانی زورانسرج بیگواہ کنگ ءِ وئیل چَہ دھکاں برجاہ اَنت۔ انسانی ھکانی جھدکار ءُ سانمندیں ھانداناں دیر انت کہ اے وئیلانی سر ءَ دلپدردی درشان کتگ ءُ بیگواھیں مردمانی یل کنگ ءِ لوٹ ءَ کنگ ءَ انت۔