پنجگور، کیچ : ریاستی چیرستیں ڈیتھ اسکواڈ ءِ تیرگواری ءَ چہ ورنا کشگ بیتگ، دو ماہ ءَ بیست ءَ چہ گیش لاش دزکپتگ- بی وائی سی

بلوچ یکجھتی کمیٹی ءَ پنجگور ءَ بلوچ ورنایانی کوش ءِ وئیلانی سر ءَ سک ایر جتگ گْوشتگ کہ بلوچستان ءَ زورانسری آوار جنی ، درکانودی کوش ءُ ٹارگٹ کلنگ ءِ دْرچ یکشل ءَ برجاہ ءَ اِنت-

بی وائی سی رِد ءَ دہ مارچ 2026 ءِ بیگاہ ءِ کساس پنچ نیم ءَ پنجگور ءِ دمگ مواچ چوک ءَ بیست ھپت سالی ئیں عبداللہ بلوچ ء کریم جان ریاستی چیردستیں ڈیتھ اسکواڈ ءَ تیرگواری کتگ کُشتگ-

درشان ءِ تہ ءَ گوشگ بیتگ کپ ھمے وڑ سنگ آباد ءِ جھمنندیں ھژدہ سالی ئیں آصف بلوچ ء نظیر کہ یک ڈرائیورے بیتگ آ ھم تیرگواری کتگ کُشتگ- آصف بلوچ یک لس شھری یے بیتگ کہ وتی لوگ ءَ والینگ ءِ ھاتر ءَ مزدوری کنگ ءَ بیتگ-

ھمے وڑ چار مارچ 2026 ءَ کیچ ءِ دمگ چہ شاپک ءَ سیادی داروکیں بیست شش سالی ئیں دکاندار حاتم بلوچ ء خدا بخش ھم ڈیتھ اسکواڈ ءَ تیرگواری ءِ نشانگ کتگ کشتگ- ھالانی رِد ءَ سلاہ بندیں مردم یک اسپیت رنگیں گاڑی ءِ سر ءَ اَتکگ اَنت ءُ آئی ءَ دکان چہ ڈن آیگ ءِ لوٹ اِتگ- وھدے حاتم بلوچ ءَ اود ءَ چہ دراھگ ءِ جُھد کتگ گُڑا اُرشکاراں آئی ءِ سر ءَ تیرگواری کتگ چریشی ءَ چہ آ جاہ پہ جاھی بیران بیتگ- حاتم بلوچ یک نزگاریں بلوچ کھولے ءَ چہ سیادی داروکیں مردمے بیتگ ءُ وتی دکان ءَ چہ کھول ءِ والینوک بیتگ-

بی وائی سی ءَ گْوشتگ کہ سرجمیں بلوچستان ءَ بلوچ ورنایاں نشانگ کنگ، زورانسری بیگواہ کنگ ءُ آیانی لاشانی دورگ دیگ ءِ دْرچ ھمکروچی ھساب ءَ جوڑبیتگ، تھنا گوستگیں دو ماہ ءِ میان ءَ پنجگور ءِ جتاجتائیں دمگاں گہ بلوچ مردم آیانی تہ ءَ نودربر ھم ھوار اَنت، کہ بیست ءَ چہ گیش لاش دزکپتگ اَنت-

گل ءِ رِد ءَ اے وئیل انگاھی نہ اَنت بلکیں بلوچ راج ءِ تُرسینگ، آیاں چہ وتی سرڈگار ءَ زبھر کنگ ءُ بلوچستان ءَ آزاتی ءِ گوما زندگ ءِ واھگاں لپاشگ ءِ یک مھکمیں مھم ءِ بھر اَنت-

درشان ءِ رِد ءَ سرجمیں ریاستی زوراکی، تیراں ءُ تُرس ءِ ماھول ءَ اَبید بلوچ راج انساپ ءِ جُھد ءَ چہ دزکش نہ بیت-